ព្យុះ Yagi កំពុង​វាយ​ប្រហារ​ភាគខាងត្បូងប្រទេស​ចិន

ខ្យល់ព្យុះដ៏ខ្លាំងនិងភ្លៀងធ្លាក់ខ្លាំងដែលកើតពីឥទ្ធិពលព្យុះ Yagi ដ៏ខ្លាំងបានមកដល់​ភាគខាងត្បូងប្រទេសចិន​នៅ​ថ្ងៃសុក្រ​នេះ​ ដោយសាលារៀនបានបិទទ្វារនិងជើងហោះហើរត្រូវបានលុបចោល ខណៈវាបានឆ្ពោះទៅកាន់ដីគោកតាមបណ្តោយឆ្នេរសមុទ្រខេត្ត Hainan ដែលវាត្រូវបានចាត់ទុកជាព្យុះដ៏ខ្លាំងបំផុតដែលបានវាយលុកប្រទេសអាស៊ីក្នុងឆ្នាំនេះ។ នេះបើយោងតាមការចេញផ្សាយរបស់សារព័ត៌មាន CNAនៅថ្ងៃទី០៦ខែកញ្ញានេះ។

ព្យុះ Yagi ដែលមានកម្លាំងខ្យល់អតិបរមា ២៤៥គីឡូម៉ែត្រក្នុងមួយម៉ោង បានជាប់ឈ្មោះជាព្យុះស៊ីក្លូនត្រូពិចខ្លាំងបំផុតទីពីររបស់ពិភពលោកក្នុងឆ្នាំ២០២៤​ រហូតមកដល់ពេលនេះ បន្ទាប់ពីព្យុះសង្ឃរា Atlantic ប្រភេទទី ៥ Beryl។

ព្យុះនេះមានកម្លាំងខ្លាំងជាងទ្វេដងចាប់តាំងពីការបំផ្លិចបំផ្លាញភាគខាងជើងនៃប្រទេសហ្វីលីពីនកាលពីដើមសប្តាហ៍នេះ។ Yagi ត្រូវបានគេរំពឹងថានឹងបក់កាត់ដីគោកតាមបណ្តោយឆ្នេរសមុទ្ររបស់ប្រទេសចិនចាប់ពីតំបន់ Wenchang ក្នុងខេត្ត Hainan ដល់តំបន់ Leizhou ខេត្ត Guangdong ចាប់ពីរសៀលថ្ងៃសុក្រនេះ។

ឥទ្ធិពលរបស់ព្យុះនេះបណ្ដាលឲ្យមានខ្យល់​និង​ភ្លៀង​អម​ដោយ​ផ្គរលាន់ និង​ផ្លេក​បន្ទោរ​យ៉ាង​ខ្លាំង​នៅ​ទូទាំង​តំបន់​តាំងនេះទាំង​យប់ និង​នៅ​ព្រឹក​ថ្ងៃ​សុក្រ។ដើម្បីឆ្លើយតបនឹងបញ្ហានេះសេវាដឹកជញ្ជូនឆ្លងកាត់ភាគខាងត្បូងប្រទេសចិនភាគច្រើនត្រូវបានបិទកាលពីថ្ងៃសុក្រ ជាមួយនឹងជើងហោះហើរជាច្រើនត្រូវបានលុបចោលនៅក្នុងខេត្ត ហៃណាន, ហ្គងទុង ,ហុងកុង និង ម៉ាកាវ។

លើសពីនេះការឆ្លងកាត់តាមផ្លូវសមុទ្រវែងជាងគេលើពិភពលោក ដែលជាស្ពានសំខាន់តភ្ជាប់ហុងកុងជាមួយម៉ាកាវ និងតំបន់ជូហៃក្នុងខេត្តក្វាងទុង ក៏ត្រូវបានបិទរ រួមទាំងទីផ្សារហ៊ុននិង សាលារៀននៅតែបន្តបិទនៅហុងកុងផងដែរ។

ភ្លៀងធ្លាក់ខ្លាំងដែលជាប់ទាក់ទងនឹងព្យុះ​ Yagi នឹងនាំមកនូវទឹកជំនន់និងបំណាក់ដី ដោយអាជ្ញាធរដែលនៅក្នុងតំបន់ដែល​ព្យុះនេះបកកាត់បានព្រមានអ្នកស្រុកឱ្យនៅឱ្យឆ្ងាយពីច្រាំងសមុទ្រ។ជាមួយគ្នានេះទីភ្នាក់ងារព័ត៌មានផ្លូវការ Xinhua បាននិយាយថា រដ្ឋាភិបាលរបស់ប្រទេសចិន បានបញ្ជូនកងកម្លាំងជួយសង្គ្រោះទៅកាន់ខេត្តក្វាងទុង និងហៃណាន ដើម្បីដឹកនាំការជួយសង្គ្រោះក្នុងទឹកជំនន់ និងព្យុះទីហ្វុង។

គួរបញ្ចាក់ថាព្យុះ Yagi បានបោកបក់បំផ្លាញនិងសម្លាប់មនុស្សចំនួន១៤នាក់រួចមកហើយនៅក្នុងប្រទេសហ្វីលីពីន។ ទោះយ៉ាងណាការបោកបក់របស់ព្យុះទីហ្វុង Yagi នៅហៃណានគឺកម្រណាស់ ព្រោះព្យុះទីហ្វុងភាគច្រើនដែលបោកបក់លើកោះត្រូវបានចាត់ថ្នាក់ថាមានឥទ្ធិពលខ្សោយ។ ចាប់ពីឆ្នាំ ១៩៤៩ ដល់ឆ្នាំ ២០២៣ ព្យុះទីហ្វុងចំនួន ១០៦ បានបោកបក់នៅហៃណាន ប៉ុន្តែមានតែប្រាំបួនប៉ុណ្ណោះដែលត្រូវបានចាត់ថ្នាក់ជាព្យុះទីហ្វុងមានឥទ្ធិពលខ្លាំង៕

អត្ថបទ៖ ប៊ុន​ សុភាព