ព័ត៌មានអន្ដរជាតិ

ក្រុមប្រដាប់អាវុធមីយ៉ាន់ម៉ា៖ ពលរដ្ឋស្លាប់១១នាក់ ក្រោយរបបសឹកវាយប្រហារតាមអាកាស

បានផុស

១ សប្តាហ៍ មុន

នៅ

ថ្ងៃសុក្រ ៦ កញ្ញា ២០២៤

ដោយ

អ្នកនាំពាក្យនៃក្រុមប្រដាប់អាវុធជនជាតិភាគតិចដែលកំពុងប្រយុទ្ធនឹងរបបសឹក បានប្រាប់ទីភ្នាក់ងារព័ត៌មាន AFP នៅថ្ងៃទី៦ខែកញ្ញានេះថា ការវាយប្រហារតាមអាកាសរបស់យោធាមីយ៉ាន់ម៉ានៅភាគខាងជើងរដ្ឋ Shan បានសម្លាប់ជនស៊ីវិលចំនួន ១១នាក់ និងរបួស ១១នាក់ផ្សេងទៀត។

អគារជាច្រើនត្រូវបានកម្ទេចក្រោយការវាយប្រហារតាមអាកាសរបស់របបសឹកមីយ៉ាន់ម៉ា ព្រឹកថ្ងៃទី៦ខែកញ្ញា (រូបភាព៖ CJ)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របបសឹកមីយ៉ាន់ម៉ា កំពុងបង្ក្រាបក្រុមប្រឆាំងប្រដាប់អាវុធនៅទូទាំងប្រទេសទៅនឹងរដ្ឋប្រហារឆ្នាំ២០២១របស់ខ្លួន ហើយទាហានរបស់ខ្លួនត្រូវបានរងការចោទប្រកាន់ពីបទបង្ហូរឈាម និងប្រើប្រាស់ការវាយប្រហារតាមអាកាស និងកាំភ្លើងធំដើម្បីដាក់ទណ្ឌកម្មសហគមន៍ជនស៊ីវិល។

លោកស្រី Lway Yay Oo នៃកងទ័ពរំដោះជាតិ Ta’ang (TNLA) បាននិយាយថា៖ «ពួកគេបានទម្លាក់គ្រាប់បែកនៅតំបន់ចំនួន២ក្នុងទីក្រុង Namhkam នៅថ្ងៃទី៦ខែកញ្ញា ប្រហែលម៉ោង១ព្រឹកម៉ោងក្នុងស្រុក»។ ការវាយប្រហារនេះបានឆក់យកជីវិតមនុស្ស ១១នាក់ និងរបួស ១១នាក់ ដោយលោកស្រីបានបន្ថែមថា ការិយាល័យរបស់គណបក្សនយោបាយក្នុងស្រុកមួយកន្លែងបានរងការខូចខាត។

លោកស្រី Yay Oo បានបញ្ជាក់ថា អ្នកស្លាប់មានបុរស៥នាក់ ស្ត្រី៤នាក់ និងកុមារ២នាក់។

ទីក្រុង Namhkam ស្ថិតនៅចម្ងាយប្រហែល៥គីឡូម៉ែត្រពីព្រំដែនជាមួយខេត្ត Yunnan របស់ប្រទេសចិន ដោយក្រុមយុទ្ធជន TNLA បានទាមទារការគ្រប់គ្រងទីក្រុងនេះ បន្ទាប់ពីមានការប្រយុទ្ធគ្នាជាច្រើនសប្តាហ៍ក្នុងឆ្នាំ២០២៣។

ចាប់តាំងពីឆ្នាំ២០២៣ យោធាបានបាត់បង់ទឹកដីជាច្រើននៅជិតព្រំដែនជាមួយប្រទេសចិនក្នុងភាគខាងជើងរដ្ឋ Shan ទៅក្រុមជនជាតិភាគតិចប្រដាប់អាវុធ និង «កងកម្លាំងការពារប្រជាជន» ដែលកំពុងប្រយុទ្ធដើម្បីផ្តួលរំលំរដ្ឋប្រហាររបស់របបសឹក។

ក្រុមទាំងនោះបានដណ្តើមយកបញ្ជាការយោធាក្នុងតំបន់ និងបានគ្រប់គ្រងច្រកព្រំដែនពាណិជ្ជកម្មដ៏សំខាន់ ដែលបង្កឲ្យមានការរិះគន់ជាសាធារណៈដ៏កម្រពីសំណាក់ក្រុមអ្នកគាំទ្រចំពោះមេដឹកនាំកំពូលនៃរបបសឹកយោធា។

ប្រព័ន្ធផ្សព្វផ្សាយរដ្ឋ បានរាយការណ៍ថា កាលពីដើមសប្តាហ៍នេះ ប្រមុខរបបយោធាលោកឧត្តមសេនីយ Min Aung Hlaing បានព្រមានជនស៊ីវិលនៅក្នុងទឹកដីដែលកាន់កាប់ដោយក្រុមប្រដាប់អាវុធជនជាតិភាគតិច ដើម្បីត្រៀមខ្លួនសម្រាប់ការវាយប្រហារតបតវិញដោយយោធា។

របបសឹកក៏បានប្រកាសក្នុងសប្តាហ៍នេះដែរថា ខ្លួនបានប្រកាសចាត់ទុកក្រុម TNLA ថាជាអង្គការ «ភេរវករ»។

អ្នកដែលបានរកឃើញថាគាំទ្រ ឬទាក់ទងជាមួយក្រុម TNLA ព្រមទាំងក្រុមប្រដាប់អាវុធជនជាតិភាគតិច២ផ្សេងទៀតដូចជា កងទ័ព Arakan និងកងទ័ពសម្ព័ន្ធប្រជាធិបតេយ្យជាតិមីយ៉ាន់ម៉ា ឥឡូវនេះអាចប្រឈមមុខនឹងវិធានការផ្លូវច្បាប់។

ប្រទេសមីយ៉ាន់ម៉ាបានស្ថិតក្នុងភាពចលាចលចាប់តាំងពីយោធាបានទម្លាក់រដ្ឋាភិបាលលោកស្រី Aung San Suu Kyi ក្នុងឆ្នាំ២០២១ ហើយបានបើកការបង្ក្រាបដែលបង្កឲ្យមានការបះបោរប្រដាប់អាវុធ។

បើយោងតាមអង្គការសហប្រជាជាតិ ជម្លោះចាប់តាំងពីរដ្ឋប្រហារនៅមីយ៉ាន់ម៉ា បានបង្ខំមនុស្សជាង ២,៧លាននាក់ឲ្យភៀសខ្លួនចេញពីផ្ទះសម្បែងរបស់ពួកគេ៕

ដោយ៖ ឈាង

Related Topics:ប្រទេសមីយ៉ាន់ម៉ា