ពេលនេះ ចង់ទៅលេង ឥណ្ឌូណេស៊ី ត្រូវបំពេញឯកសារបញ្ជាក់សុខភាពសិន ព្រោះតែជំងឺ mpox

ពេលនេះ ឥណ្ឌូណេស៊ី តម្រូវឲ្យអ្នកធ្វើដំណើរអន្តរជាតិទាំងអស់ ត្រូវបំពេញឯកសារបញ្ជាក់សុខភាពតាមប្រព័ន្ធអេឡិចត្រូនិចជាមុនសិន សឹមនឹងចូលប្រទេសរបស់ខ្លួន ដែលការធ្វើបែបនេះគឺដើម្បីទប់ស្កាត់ការរីករាលដាលនៃជំងឺ​ mpox។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក Kristi Endah Murni អគ្គនាយកមន្ទីរដឹកជញ្ជូនផ្លូវអាកាស ក្រោមក្រសួងដឹកជញ្ជូន បានឲ្យដឹងថា តម្រូវការនេះគឺអនុវត្តចំពោះភ្ញៀវបរទេសទាំងអស់ រួមទាំងបុគ្គលិកជើងហោះហើរផងដែរ។

អ្នកធ្វើដំណើរ ត្រូវចូលទៅកាន់គេហទំព័រ sshp.kemkes.go.id ដើម្បីបំពេញបែបបទតាមការណែនាំ, ៤៨ម៉ោងមុនពេលចេញដំណើរ។ ដូច្នេះការធ្វើបែបនេះ នឹងអនុញ្ញាតឲ្យអាជ្ញាធរអាកាសយានដ្ឋានឥណ្ឌូណេស៊ី អាចវាយតម្លៃអំពីហានិភ័យទាក់ទងនឹងការចម្លងវីរុសបាន។

លុះពេលបំពេញបែបបទចប់សព្វគ្រប់ហើយ អ្នកដំណើរនឹងទទួលបាន QR Code ដើម្បីយកមកបង្ហាញមន្ត្រីនៅអាកាសយានដ្ឋាន ពេលមកដល់ប្រទេសឥណ្ឌូណេស៊ី។

សូមបញ្ជាក់ថា ឥណ្ឌូណេស៊ី គឺជាប្រទេសសេដ្ឋកិច្ចធំជាងគេនៅអាស៊ីអាគ្នេយ៍ ហើយចាប់ពីខែមករាដល់ខែមិថុនាឆ្នាំនេះ ឥណ្ឌូណេស៊ីមានភ្ញៀវទេសចរបរទេសមកលេងកម្សាន្តចំនួន ៦.៤លាននាក់ ពោលគឺកើនឡើង២១% បើធៀបនឹងរយៈពេលដូចគ្នាកាលពីឆ្នាំមុន ខណៈប្រទេសនេះរំពឹងថា ខ្លួននឹងទទួលភ្ញៀវអន្តរជាតិរហូតដល់ទៅ ១៧លាននាក់នៅត្រឹមចុងឆ្នាំ២០២៤៕

អត្ថបទ៖ សុខ សុវណ្ណ

ចុចអាន៖ ផ្ទុះជំងឺ mpox ក្នុងពន្ធនាគារនៅអាមេរិក ឆ្លងអ្នកទោសច្រើននាក់