ព័ត៌មានអន្ដរជាតិ

គ្រូបង្រៀនកម្រិតមត្តេយ្យប្រើហិង្សាលើកុមារបង្កការខឹងសម្បាខ្លាំង

បានផុស

៥ ខែ មុន

នៅ

ថ្ងៃសៅរ៍ ៧ កញ្ញា ២០២៤

ដោយ

គ្រូបង្រៀនថ្នាក់មត្តេយ្យម្នាក់នៅទីក្រុង Daegu ប្រទេសកូរ៉េខាងត្បូងរកការស៊ើបអង្កេតពីប៉ូលិស ក្រោយរកឃើញថា គ្រូបង្រៀននោះបានធ្វើបាបកុមារអាយុ៦ឆ្នាំជាបន្តបន្ទាប់ដែលថតជាប់សកម្មភាពដោយកាមេរិកសុវត្ថិភាព CCTV។ យោងការចេញផ្សាយរបស់សារព័ត៌មានកូរ៉េ allpop នៅថ្ងៃទី៦ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរំលោភបំពានកុមារតាមរយៈការប្រើអំពើហិង្សាដែលមានរយៈពេលជាង២ខែត្រូវបានថតជាប់នៅលើវីដេអូកាំមេរ៉ា CCTV ដែលក្នុងខ្សែវីដេអូទាំងនោះបង្ហាញពីសកម្មភាពហិង្សាដ៏សាហាវព្រៃផ្សៃរបស់គ្រូមតេ្តយ្យ ដូចជា សកម្មភាពរុញក្មេងៗ វាយដើមទ្រូង និងថែមទាំងច្របាច់កទៀតផង។

សកម្មភាពផ្សេងទៀតមានដូចជាគ្រូបង្រៀនរូបនេះចាប់ដៃក្មេង ហើយបោះពួកគេទៅលើដី ដែលធ្វើឱ្យក្មេងទាំងនោះស្ទើរតែបោកក្បាលរបស់ពួកគេ ប៉ុន្តែគ្រូរូបនេះនៅតែបន្តការប្រើអំពើហិង្សានេះទៀត។ កុមារច្រើនទៀតទទួលរងការធ្វើបាបស្រដៀងគ្នានេះដែរ ខណៈគ្រូបង្រៀនរូបនេះបានប្រើសៀវភៅវាយពោះកុមារម្នាក់ ហើយពេលក្មេងៗចាប់ផ្តើមយំ គ្រូបង្រៀនបានទាញពួកគេចេញពីកន្លែងដែលកាមេរ៉ា CCTV អាចថតជាប់។

ឪពុកម្តាយរបស់កុមារនៅពេលពិនិត្យមើលវីដេអូ CCTV បានសម្តែងការរន្ធត់និងសោកស្ដាយដែលមិនបានកត់សម្គាល់ពីការរំលោភបំពានពីមុនមក។ ការរំលោភបំពាននេះបានបន្តអស់រយៈពេលជាងពីរខែ បន្ទាប់ពីបានចាប់ផ្តើមនៅក្នុងខែមីនា។ ក្រោយពីសង្កេតឃើញទង្វើមិនប្រក្រតីរបស់កូនៗ ឪពុកម្តាយបានសុំពិនិត្យមើលវីដេអូ CCTV និងរាយការណ៍ពីឧប្បត្តិហេតុនេះទៅប៉ូលិស។

នៅពេលដែលឪពុកម្តាយរបស់ក្មេងៗសាកសួរគ្រូបង្រៀនរូបនេះ គ្រូបង្រៀននេះបាននិយាយថា គាត់គ្រាន់តែមានបំណងចង់ប្រដៅក្មេងៗប៉ុណ្ណោះ ខណៈសាលាមត្តេយ្យនេះបានបដិសេធការជាប់ពាក់ព័ន្ធឬការធ្វេសប្រហែសណាមួយ ប៉ុន្តែបាននិយាយថា ពួកគេកំពុងចាត់វិធានការដើម្បីការពារឧប្បត្តិហេតុស្រដៀងគ្នានេះនាពេលអនាគត។

គួរបញ្ជាក់ថា ឥឡូវនេះប៉ូលិសកំពុងពង្រីកការស៊ើបអង្កេតរបស់ពួកគេដើម្បីពិនិត្យមើលថាតើកុមារបន្ថែមទៀតត្រូវបានរងផលប៉ះពាល់លើសពីមនុស្សបួននាក់ដែលបានឃើញនៅក្នុងវីដេអូ CCTV ដែរឬទេ។

អ្នកលេងអ៊ីនធឺណិតកូរ៉េខាងត្បូងមានការហួសចិត្តចំពោះការរំលោភបំពានដែលប្រព្រឹត្តដោយគ្រូរូបនេះ ហើយបានប្រមូលផ្តុំគ្នាក្នុងសហគមន៍អ៊ីនធឺណិតដើម្បីសម្ដែងការខឹងសម្បាររបស់ពួកគេ ដោយពួកគេបានបញ្ចេញមតិថាគ្រូបង្រៀនរូបនេះថា«គាត់គឺជាបិសាច» ខ្លះទៀតថា «គាត់ជាមនុស្សឆ្កួត» និងខ្លះថា «គាត់ជាមនុស្សវិកលចរិក»ជាដើម៕