លើកដំបូងនៅអាមេរិក! មនុស្សម្នាក់មិនធ្លាប់ប៉ះសត្វសោះ តែឆ្លងជំងឺផ្តាសាយបក្សី

កាលពីថ្ងៃសៅរ៍ទី៧ខែកញ្ញាឆ្នាំ២០២៤ មន្ត្រីសុខាភិបាលអាមេរិក បានបញ្ជាក់ពីករណីលើកដំបូងបង្អស់ ដែលជំងឺគ្រុនផ្តាសាយបក្សីកើតលើមនុស្សម្នាក់មិនធា្លប់ប៉ះពាល់នឹងសត្វសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា មជ្ឈមណ្ឌលគ្រប់គ្រងនិងការពារជំងឺ (CDC) និយាយថា អ្នកជំងឺនៅក្នុងរដ្ឋ Missouri បានព្យាបាល ជាសះស្បើយរួចទៅហើយ។ 

នេះជាករណីទី១៤នៃជំងឺគ្រុនផ្តាសាយបក្សីនៅសហរដ្ឋអាមេរិក ក្នុងឆ្នាំ២០២៤និងជាករណីទី១ ដែលមេរោគ H5 កើតលើមនុស្សមិនធ្លាប់ប៉ះពាល់ជាមួយសត្វ ប៉ុន្តែ CDC ប្រកាសថា ដោយផ្អែកលើទិន្នន័យបច្ចុប្បន្ន ហានិភ័យចំពោះសាធារណជនទូទៅនៅតែមានកម្រិតទាប ដូច្នេះសូមកុំបារម្ភ។

ផ្តាសាយបក្សី គឺជាជំងឺ ឆ្លងតាមរយៈការប៉ះពាល់ជាមួយបក្សីឬសត្វដទៃទៀតដែលឈឺ ហើយការឆ្លងរបស់មនុស្សគឺកម្រណាស់។

ឆ្នាំនេះ សហរដ្ឋអាមេរិក បានរាយការណ៍អំពីករណីឆ្លងជំងឺគ្រុនផ្តាសាយបក្សី ខ្លាំងបំផុតក្នុងចំណោមសត្វគោ។ ជាក់ស្តែង សត្វគោក្របីនៅក្នុង១៤រដ្ឋ ត្រូវរងផលប៉ះពាល់ គិតត្រឹមថ្ងៃទី៣ខែកញ្ញា។

បើនិយាយពីករណីឆ្លងរបស់មនុស្សវិញ មន្ត្រីសុខាភិបាលសហរដ្ឋអាមេរិកបានរកឃើញករណីមនុស្សកើតជំងឺផ្តាសាយបក្សីក្នុងខែមីនាឆ្នាំ២០២៤ បន្ទាប់ពីអ្នកជំងឺប៉ះពាល់ជាមួយសត្វគោឈឺ។

សូមបញ្ជាក់ថា ជំងឺផ្តាសាយបក្សី ត្រូវបានរកឃើញជាលើកដំបូងនៅប្រទេសចិនក្នុងទសវត្សរ៍ឆ្នាំ១៩៩០ ហើយចាប់តាំងពីពេលនោះមក វាក៏រីករាលដាលពាសពេញទ្វីបទាំងអស់រួមទាំងអង់តាក់ទិកផងដែរ៕

អត្ថបទ៖ សុខ សុវណ្ណ

ចុចអាន៖ ក្មេងស្រីអាយុ ១៦ ឆ្នាំនៅខេត្តស្វាយរៀង ឆ្លង​ជំងឺផ្តាសាយបក្សី ក្រោយ​ប៉ះពាល់​មាន់ទា​ងាប់