វៀតណាមជួបគ្រោះផ្ទួនៗ ​ព្យុះ​ទីហ្វុង​ផង​និង​រញ្ជួយ​ដី​​ផង

ប្រទេសវៀតណាម ត្រូវជួបគ្រោះធម្មជាតិផ្ទួនៗ ដោយព្យុះទីហ្វុងដ៏សាហាវឈ្មោះ យ៉ាកជី វាយប្រហារនិងបង្កទុក្ខលំបាករួចទៅហើយនោះ ស្រាប់តែមានការរញ្ជួយដីទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះរញ្ជួយដីកម្រិត ៣.៣រ៉ិចទ័រ កើតឡើងនៅស្រុក A Luoi ក្នុងខេត្ត Thua Thien-Hue ភាគកណ្តាលប្រទេសវៀតណាម កាលពីព្រឹកថ្ងៃអាទិត្យទី៨ខែកញ្ញាឆ្នាំ២០២៤។

តាមការបញ្ជាក់ពីលោក Dang Van Hoa ប្រធានគណៈកម្មាធិការស្វែងរក ជួយសង្គ្រោះនិងបង្ការគ្រោះមហន្តរាយធម្មជាតិ, ការរញ្ជួយដីកើតឡើងនៅម៉ោង៦:៤០នាទីព្រឹក ជាមួយជម្រៅប្រហែល ៨គីឡូម៉ែត្រ ប៉ុន្តែវារង្គើត្រឹមប៉ុន្មានវិនាទីប៉ុណ្ណោះ។

ជាធម្មតា ការរញ្ជួយដីកម្រិតពី៤ទៅ៤.៩រ៉ិចទ័រ ត្រូវបានគេចាត់ថ្នាក់ថាស្រាល ចំណែក៥ទៅ៥.៩រ៉ិចទ័រជាកម្រិតមធ្យម ដែលមិនបង្កជាគ្រោះមហន្តរាយអ្វីទេ។

ការរញ្ជួយនេះកើតឡើងចំពេលប្រទេសវៀតណាម ក៏ទទួលរងឥទ្ធិពលធ្ងន់ធ្ងរដោយសារព្យុះទីហ្វុង យ៉ាកជី ផងដែរ ដោយសម្លាប់មនុស្សចំនួន២៤នាក់ និងរបួស២២៩នាក់។

យោងតាមនាយកដ្ឋានបង្ការគ្រោះមហន្តរាយធម្មជាតិ, មនុស្សស្លាប់និងរបូសភាគច្រើនគឺដោយសារបាក់ដីសង្កត់និងដើមឈើរលំលើ ហើយក្នុងចំណោមអ្នកស្លាប់ក៏រួមមានទាំងមន្ត្រីប៉ូលិសនៅខេត្ត Quang Ninh ផងដែរ។

ក្រៅពីបណ្តាលឲ្យមនុស្សស្លាប់និងរបួស ព្យុះទីហ្វុង Yagi ថែមទាំងបានបំផ្លាញផ្ទះជាង ៨ ០១០ខ្នង និងពន្លិចកប៉ាល់ខ្នាតតូចចំនួន២៥គ្រឿងនៅខេត្ត Quang Ninh ទៀតផង ខណៈ Hai Phong, Thai Binh, Hai Duong និង Hanoi នៅតែមិនទាន់មានអគ្គិសនីប្រើប្រាស់។

លើសពីនេះ បើនិយាយពីវិស័យកសិកម្មវិញ, ស្រូវជិត ១១០ ០០០ហិកតាត្រូវបានជន់លិច ខណៈដំណាំបន្លែ ​១៧ ៩២០​ហិកតា និង​ដំណាំ​ហូប​ផ្លែ​ ៦ ៩០០​ហិកតា​ត្រូវ​ខូចខាត។

ត្បិតតែព្យុះយ៉ាកជី បានថមថយឥទ្ធិពលទៅហើយក៏ពិតមែន ប៉ុន្តែវៀតណាមព្រមានថា ហានិភ័យនៃគ្រោះទឹកជំនន់និងបំណាក់ដីនៅតែមានកម្រិតខ្ពស់៕

អត្ថបទ៖ សុខ សុវណ្ណ

ចុចអាន៖ ព្យុះ យ៉ាកជី បណ្តាលឲ្យមានមនុស្សស្លាប់២៤នាក់និងរបួស២២៩នាក់ នៅ វៀតណាម