ព័ត៌មានអន្ដរជាតិ

ទឹកជំនន់នៅអាហ្វ្រិកខាងលិចធ្វើឲ្យមនុស្សជិត១លាននាក់ភៀសខ្លួន

បានផុស

៤ ខែ មុន

នៅ

ថ្ងៃចន្ទ ៩ កញ្ញា ២០២៤

ដោយ

ភ្លៀងធ្លាក់ខ្លាំងនាពេលថ្មីៗនេះបានបង្កឱ្យមានទឹកជំនន់នៅបណ្តាប្រទេសអាហ្វ្រិកខាងលិចចំនួនបី រួមមាន ប្រទេសម៉ាលី នីហ្សេ និង នីហ្សេរីយ៉ា ដោយតម្រូវឱ្យជម្លៀសមនុស្សជិត១លាននាក់ចេញពីលំនៅឋានរបស់ពួកគេ។ នេះបើយោងតាមការចេញផ្សាយរបស់ africanews កាលពីថ្ងៃទី៨ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការសង្គ្រោះកុមារ (Save the Children) បានជូនដំណឹងកាលពីថ្ងៃសុក្រសប្ដាហ៍មុនអំពីហានិភ័យនៃជំងឺអាសន្នរោគ ភាពអត់ឃ្លានបណ្ដាលមកពីទឹកជំនន់របំផ្លាញដំណាំ និងការរំខានដល់ការអប់រំ ដែលស្ថានភាពនេះជាបញ្ហាប្រឈមចំពោះកុមាររាប់សែននាក់ដែលឥឡូវនេះត្រូវបានផ្លាស់ទីលំនៅ ខណៈដែលពេលនេះមានភ្លៀងធ្លាក់ខ្លាំងបំផុតប្រចាំឆ្នាំនៅអាហ្រ្វិកខាងលិច។

ផលប៉ះពាល់ទាំងនោះមានដូចជាទឹកជំនន់រីករាលដាលបានប៉ះពាល់ដល់រដ្ឋចំនួន២៩ក្នុងចំណោមរដ្ឋចំនួន៣៦របស់ប្រទេសនីហ្សេរីយ៉ា ខណៈទឹកជំនន់នៅក្នុងខែឧសភាបានបំផ្លាញផ្ទះសម្បែង និងបន្សល់ទុកនូវការបំផ្លិចបំផ្លាញជាបន្តបន្ទាប់។ លើសពីនេះភ្លៀងធ្លាក់ខ្លាំងបណ្តាលឱ្យមានបរិមាណទឹកច្រើន និងហៀរលើទំនប់ និងការកើនឡើងកម្រិតទឹកនៃទន្លេធំជាងគេពីរគឺ នីហ្សេ និងបេនូ។

ចំណែកតំបន់នៅក្នុងប្រទេសម៉ាលីតំបន់ចំនួនបីនៅភាគខាងលិច និងភាគឦសានក៏ត្រូវបានវាយប្រហារដោយទឹកជំនន់ផងដែរ។ សរុបមកយ៉ាងហោចណាស់មនុស្សចំនួន ៤៦០ នាក់បានស្លាប់ដោយសារទឹកជំនន់នៅក្នុងប្រទេសទាំងបី។

អង្គការ Save the Children កំពុងបង្កើតគម្រោងឆ្លើយតបទៅនឹងតម្រូវការរបស់ជនរងគ្រោះដោយទឹកជំនន់នៅក្នុងតំបន់ Segou ដែលរងផលប៉ះពាល់ខ្លាំងបំផុតក្នុងប្រទេសម៉ាលី តាមរយៈកម្មវិធីសន្តិសុខស្បៀង ការផ្ទេរសាច់ប្រាក់ ការផ្តល់ទឹកស្អាត និងអនាម័យ និងសកម្មភាពការពារកុមារ ដោយមានកុមារចំនួន១៥៦៥៦ នាក់បានរងផលប៉ះពាល់ ដែលស្មើនឹង៥១ភាគរយនៃចំនួនកុមារដែលរងផលប៉ះពាល់សរុប។

ចំណែកនៅប្រទេសនីហ្សេរីយ៉ា អង្គការ Save the Children កំពុងឆ្លើយតបនៅក្នុងរដ្ឋ Adamawa ដោយចែកចាយពូក ភួយ និងសម្ភារៈអនាម័យ ដល់គ្រួសារដែលងាយរងគ្រោះដោយទឹកជំនន់ រួមទាំងកុមារ និងមនុស្សចាស់ផងដែរ។

ដើម្បីឆ្លើយតបជាសកលចំពោះវិបត្តិអាកាសធាតុ អង្គការ Save the Children បានអំពាវនាវឱ្យរដ្ឋាភិបាលជាតិនិងអន្តរជាតិព្យាយាមស្វែករកជំនួយបន្ថែមដើម្បីជួយដល់ប្រជាជនរាប់ម៉ឺននាក់ដែលកំពុងរងនូវផលប៉ះពាល់ និងធ្វើយ៉ាងណាចូលរួមកាត់បន្ថយនូវការបំពុលបរិស្ថានដែលជាកត្តាមួយដើម្បីកុំឲ្យមានការប្រែប្រួលអាកាសធាតុខ្លាំងពេក ខណៈបច្ចុប្បន្នបញ្ហាប្រែប្រួលអាកាសធាតុកាន់តែអាក្រក់ទៅ៕