មនុស្សស្លាប់ដោយសារព្យុះកំណាចយ៉ាកជី​នៅ​វៀតណាមកើនដល់​៥៩នាក់

សារព័ត៌មាន VN Express បានរាយការណ៍នៅថ្ងៃចន្ទទី៩ខែកញ្ញាឆ្នាំ២០២៤ថា តួលេខមនុស្សស្លាប់ដោយសារព្យុះទីហ្វុង យ៉ាកជី បានកើនឡើងដល់៥៩នាក់ហើយ ខណៈរាប់រយនាក់ទៀត រងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ចុងក្រោយបំផុតពីនាយកដ្ឋានបង្ការគ្រោះមហន្តរាយ នៃក្រសួងកសិកម្មវៀតណាម, តំបន់ដែលរងគ្រោះធ្ងន់ធ្ងរជាងគេគឺភាគខាងជើងប្រទេស ព្រោះថា ឥទ្ធិពលនៃព្យុះកំណាចយ៉ាកជី បានបណ្តាលឲ្យមានភ្លៀងធ្លាក់ខ្លាំង និងបង្កជាបំណាក់ដីនៅក្នុងខេត្តចំនួន១៧។

ក្នុងនាមជាព្យុះខ្លាំងបំផុតដែលវាយប្រហារសមុទ្រខាងកើតនារយៈពេល៣ទសវត្សរ៍មកនេះ យ៉ាកជី បានបោកបក់មកលើឆ្នេរភាគខាងជើងប្រទេសវៀតណាម យ៉ាងពេញទំហឹង កាលពីរសៀលថ្ងៃសៅរ៍ទី៧ខែកញ្ញា។

ព្យុះនេះ នាំមកជាមួយនូវខ្យល់បក់ល្បឿន ១៦៦គីឡូម៉ែត្រក្នុងមួយម៉ោង និងបង្កភ្លៀងធ្លាក់ក្នុងតំបន់ជាច្រើន ដោយតំបន់ខ្លះមានភ្លៀងធ្លាក់លើសពី៣០០មិល្លីម៉ែត្រ ចន្លោះម៉ោង៨ព្រឹកថ្ងៃសៅរ៍ដល់ម៉ោង៨យប់ថ្ងៃអាទិត្យ។

ត្បិតតែព្យុះនេះកន្លងទៅផុតហើយក៏ដោយ ប៉ុន្តែគេព្យាករថា តំបន់ភាគពាយព្យ រួមទាំងទីក្រុងទេសចរណ៍ Sa Pa ផងដែរនោះ គឺនឹងមានភ្លៀងធ្លាក់ខ្លាំងបំផុតចាប់ពី១០០-២០០មិល្លីម៉ែត្រ ឬអាចលើស៤០០មិល្លីម៉ែត្រទៀតផងនៅថ្ងៃចន្ទ។

ក្រៅពីបណ្តាលឲ្យមនុស្សស្លាប់និងរបួស ព្យុះទីហ្វុង យ៉ាកជី ថែមទាំងបានបំផ្លាញផ្ទះជាង ៨ ០១០ខ្នង និងពន្លិចកប៉ាល់ខ្នាតតូចចំនួន២៥គ្រឿងនៅខេត្ត Quang Ninh ទៀតផង ខណៈ Hai Phong, Thai Binh, Hai Duong និង Hanoi នៅតែមិនទាន់មានអគ្គិសនីប្រើប្រាស់។

លើសពីនេះ បើនិយាយពីវិស័យកសិកម្មវិញ, ស្រូវជិត ១១០ ០០០ហិកតាត្រូវទឹកជន់លិច ខណៈដំណាំបន្លែ ​១៧ ៩២០​ហិកតា និង​ដំណាំ​ហូប​ផ្លែ​ ៦ ៩០០​ហិកតា​ត្រូវ​ខូចខាត៕

អត្ថបទ៖ សុខ សុវណ្ណ

ចុចអាន៖ បាក់ស្ពាននៅវៀតណាម ធ្លាក់រថយន្តនិងម៉ូតូច្រើនគ្រឿងចូលទន្លេ