ព័ត៌មានអន្ដរជាតិ

ប៉ូលិសអន្តរជាតិកំពុងតាមប្រមាញ់បុរសដែលជះកាហ្វេក្តៅលើទារក

បានផុស

២ សប្តាហ៍ មុន

នៅ

ថ្ងៃអង្គារ ១០ កញ្ញា ២០២៤

ដោយ

ប៉ូលិសអូស្ត្រាលីកំពុងធ្វើការជាមួយសមភាគីអន្តរជាតិដើម្បីស្វែងរកចាប់ខ្លួនបុរសម្នាក់ដែលបាននិរទេសខ្លួន បន្ទាប់ពីចាក់កាហ្វេក្ដៅលើទារកម្នាក់ក្នុងទីក្រុង Brisbane។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី១០ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីចុងខែសីហានិងបានបង្កការភ្ញាក់ផ្អើលនៅទូទាំងប្រទេស ដោយសារតែទង្វើនោះបានធ្វើឱ្យក្មេងប្រុសអាយុប្រាំបួនខែមានរបួសរលាកធ្ងន់ធ្ងរនៅលើមុខ ដែ និង ជើង។ បន្ទាប់ពីហេតុការណ៍នេះ ប៉ូលិសរដ្ឋ Queensland បានចេញបញ្ជាឱ្យចាប់ខ្លួនបុរសអាយុ ៣៣ឆ្នាំម្នាក់ ដែលមានបំណងបង្កគ្រោះថ្នាក់ដល់រាងកាយធ្ងន់ធ្ងរ ដែលរងការចោទប្រកាន់ជាប់ទោសមួយជីវិត។

ប៉ុន្តែកាលពីថ្ងៃចន្ទជនសង្ស័យរូបនេះ បានហោះចេញពីអាកាសយានដ្ឋានទីក្រុង ស៊ីដនី ប្រាំមួយថ្ងៃបន្ទាប់ពីឧបទ្ទវហេតុ ហើយត្រឹមតែ១២ម៉ោងប៉ុណ្ណោះ មុនពេលប៉ូលិសអាចកំណត់អត្តសញ្ញាណរបស់បុរសរូបនេះបាន។

នៅពេលកើតហេតុ ទារកនោះកំពុងអង្គុយញាំអាហារជាមួយគ្រួសារនៅសួនជាយក្រុងកាលពីថ្ងៃទី៣១សីហា ខណៈសាក្សីឃើញហេតុការណ៍នេះ បានឲ្យដឹងថា បុរសចម្លែកម្នាក់បានចូលមកជិត ដោយយកកាហ្វេក្ដៅមកចាក់លើទារកនោះ មុននឹងរត់គេចខ្លួនដោយថ្មើរជើង។ ប៉ុន្តែមូលហេតុពិតប្រាកដដែលបណ្ដាលឲ្យមានហេតុការណ៍នេះមិនទាន់ត្រូវបានដឹងនៅឡើយ និងកំពុងស្ថិតក្រោមការស៉ើបអង្កេត។

ទារកត្រូវបានជួយសង្គ្រោះជាបឋមភ្លាមៗ មុនពេលគិលានុបដ្ឋាយិកាមកដល់និងនាំយកទៅព្យាបាលនៅអគារក្បែរនោះ ដើម្បីដាក់ទារកក្នុងទឹកត្រជាក់។ ទោះបីជាយ៉ាងណាក៏ដោយ ទារកនេះបានរងរបួសយ៉ាងធ្ងន់ធ្ងរ ដែលតម្រូវឱ្យធ្វើការវះកាត់ជាច្រើនដងហើយឪពុកម្តាយរបស់ទារកក៏កំពុងប្រឈមនិងបញ្ហាថវិការដែលត្រូវចំណាយលើការព្យាបាលដើម្បីសង្គ្រោះទារករូបនេះ និងក៏កំពុងរងចាំមើលការធ្វើការរបស់ប៉ូលិសដើម្បីចាប់ខ្លួនជនសង្ស័យ ដើម្បីឲ្យកូនរបស់ពួកគេទទួលបានយុត្តិធម៌។

ប៉ូលិស បានដឹងថា ជនសង្ស័យបានរត់គេចខ្លួនទៅប្រទេសមួយ ប៉ុន្តែប៉ូលិសមិនអាចបញ្ជាក់ឈ្មោះប្រទេសនោះទេនៅពេលនេះ ព្រោះអាចបង្កផលលំបាកដល់ការស៊ើបអង្កេតរបស់ពួកគេ។ ទោះយ៉ាងណាប៉ូលិសបានឲ្យដឹងថា បុរសរូបនោះជាកម្មករដែលធ្វើដំណើរពីប្រទេសមួយទៅប្រទេសមួយទៀត និងបានធ្វើដំណើរមកប្រទេសអូស្ត្រាលីជាញឹកញាប់ចាប់តាំងពីឆ្នាំ២០១៩ និងមានអាសយដ្ឋាននៅរដ្ឋ New South Wales និង Victoria។ លើសពីនេះ ជនសង្ស័យបានដឹងពីការស៉ើបអង្កេតរបស់ប៉ូលិស និងបាននិងកំពុងធ្វើសកម្មភាពលាក់បាំងពីការឃ្លាំមើលដើម្បីគេចពីប៉ូលិស។

ទារកនេះស្ថិតក្នុងស្មារតីល្អ ប៉ុន្តែបើយោងតាមឪពុកទារកបានឲ្យដឹងថា «ប្រហែលជាត្រូវការការវះកាត់កែសម្ផស្សបន្ថែមទៀត»។ ជាមួយគ្នានេះ ទំព័ររៃអង្គាសប្រាក់តាមអ៊ីនធឺណិតសម្រាប់ទារកដែលរងគ្រោះនោះមកទល់ពេលនេះបានរៃអង្គាសប្រាក់បានជាង ១៥០០០០ដុល្លារអូស្ត្រាលីដែលស្មើនឹង ៧៦០០០ ដុល្លារសម្រាប់ឧបត្ថម្ភដល់ការព្យាបាលរបស់ទារករងគ្រោះ៕