ទឹកជំនន់​វាយប្រហារ​ចូល​ដល់​ខេត្ត​ភាគ​កណ្តាល​ថៃ​ មាន​ Ayutthaya ជាដើម​

ភ្លៀង​ធ្លាក់ជា​ច្រើន​ទៀត​ត្រូវ​បានព្យាករ​ចំពោះ​តំបន់​ក្បែរក្រុងបាងកក​ពេញ​មួយ​សប្តាហ៍​នេះ ដោយ​​មាន​ការ​បារម្ភ​ថា​ ទឹក​ជំនន់​នឹង​កើត​មាន​នៅ​ក្នុង​ខេត្ត Ang Thong និង​ខេត្ត​ Ayutthaya​​ ភាគកណ្តាល​​​ប្រទេសថៃ​​។

នាយកដ្ឋានឧតុនិយមថៃ​បានព្យាករ​ថា ស្ថានភាព​ភ្លៀង​នឹង​ធ្លាក់ច្រើនក្នុងទីក្រុងបាងកកក្នុងសប្តាហ៍នេះ។ វិទ្យាស្ថាន Hydro-Informatics បានរាយការណ៍ថា ទឹកហៀរចេញពី​ព្រែក​​សំខាន់ៗចំនួនពីរក្នុងខេត្ត Ayutthaya ខណៈនាយកដ្ឋានបង្ការនិងកាត់បន្ថយគ្រោះមហន្តរាយ បានព្រមានអំពីទឹកជំនន់នៅផ្នែកខ្លះនៃខេត្ត Ang Thong និងតំបន់ភាគច្រើននៃខេត្ត Ayutthaya ក្នុងរយៈពេល២៤ម៉ោងទៀត។

វិទ្យាស្ថាននេះ បានឱ្យដឹងថា រំហូរទឹកទន្លេចៅប្រាយ៉ាត្រូវបានវាស់នៅកម្រិត១៤៩៨ម៉ែត្រគូបក្នុងមួយវិនាទីកាលពីថ្ងៃចន្ទ តែយ៉ាងណានាយកដ្ឋាន​ធារាសាស្ត្រ​ថា ទឹក​ក្នុង​អត្រា​នេះ​នៅ​តែ​អាច​គ្រប់គ្រង​បាននៅឡើយំ ខណៈទំនប់​វារីអគ្គិសនី Chao Phraya បញ្ចេញ​កម្លាំង១៧០០ ម៉ែត្រគូបក្នុង​អំឡុង​ពេល​ទឹក​ជំនន់​ដ៏​ធំ​ឆ្នាំ ២០១១។

គួរបញ្ជាក់ថា ទីភ្នាក់ងារគ្រោះមហន្តរាយរបស់ប្រទេសនេះបាននិយាយថា ស្ថានភាពទឹកជំនន់នៅតែមាននៅក្នុងខេត្តចំនួនប្រាំគឺ Chiang Rai, Nan, Phayao, Phetchabun និង Phrae ខណៈទឹកជំនន់ក្នុងរយៈពេលកន្លងមកនេះបានសម្លាប់មនុស្សប្រមាណ ២២ នាក់រួចមកហើយ និង បំផ្លាញដីដំណាំកសិកម្មរាប់សិបហិចតា។

ទន្ទឹមនឹងនេះប្រទេសនេះក៏ទទួលរងឥទ្ធិពលរបស់ព្យុះទីហ្វុង Yagi ផងដែរបានបន្ទាបឥទ្ធិពលទៅជាប្រព័ន្ធសម្ពាធទាប បន្ទាប់ពីបានបណ្តាលឱ្យមនុស្សស្លាប់ និងបំផ្លិចបំផ្លាញនៅក្នុងប្រទេសហ្វីលីពីន វៀតណាម និងភាគខាងត្បូងប្រទេសចិន ខណៈប្រទេសវៀតណាមជាប្រទេសដែលកំពុងរងនូវការបំផ្លាញយ៉ាងធ្ងន់ធ្ងរ រួមទាំងការបាក់ស្ពានដែលបណ្ដាលឲ្យរថយន្តនិងមនុស្សជាច្រើននាក់ធ្លាក់ចូលទន្លេរ៕

អត្ថបទ៖ ប៊ុន សុភាព