ចំនួនមនុស្សស្លាប់នៅវៀតណាម ដោយសារព្យុះយ៉ាកជី កើនឡើងយ៉ាងគំហុក ឈានដល់១៤១នាក់

តួលេខមនុស្សស្លាប់នៅវៀតណាម ដោយសារព្យុះទីហ្វុងកំណាច យ៉ាកជី បានកើនឡើងយ៉ាងគំហុក​ ពោលបើគិតត្រឹមព្រឹកថ្ងៃពុធទី១១ខែកញ្ញាឆ្នាំ២០២៤ អ្នកបាត់បង់ជីវិតបានឈានដល់១៤១នាក់ហើយ និង៧៥២នាក់រងរបួសខណៈ៥៩នាក់កំពុងបាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តួលេខថ្មីនេះគឺបូករួមទាំងមនុស្សស្លាប់១៦នាក់និងបាត់ខ្លួន៤០នាក់ផងដែរ ដោយសារទឹកជំនន់វាយប្រហារភ្លាមៗនៅក្នុងខេត្ត Lao Cai។

សូម្បីតែទីក្រុងហាណូយក៏ប្រកាសអាសន្នអំពីគ្រោះទឹកជំនន់ដែរ ព្រោះថា ទឹកទន្លេក្រហមបានឡើងដល់កម្រិតគ្រោះថ្នាក់ហើយ។

សូមបញ្ជាក់ថា ព្យុះយ៉ាកជី បាននាំមកនូវជាមួយខ្យល់បក់បោកក្នុងល្បឿនជិត១៥០គីឡូម៉ែត្រក្នុងមួយម៉ោង ដោយបំផ្លាញស្ពាន បក់បំប៉ើងដំបូលអគារ រោងចក្រ និងកម្ទេចហេដ្ឋារចនាសម្ព័ន្ធនានា។

វាជាព្យុះមានឥទ្ធិពលខ្លាំងបំផុតដែលវាយប្រហារប្រទេសវៀតណាម ក្នុងរយៈពេល៣០ឆ្នាំ ហើយត្បិតតែឥឡូវព្យុះនេះកន្លងផុតទៅក៏ពិតមែន ប៉ុន្តែវាមិនទាន់អស់ចំហាយទេ ជាហេតុជំរុញឲ្យអាជ្ញាធរចេញការព្រមានអំពីទឹកជំនន់និងបំណាក់ដីក្នុងឃុំចំនួន៤០១ នៅទូទាំង១៨ខេត្តនាភាគខាងជើងប្រទេស។

មិនត្រឹមតែបណ្តាលឲ្យមនុស្សស្លាប់ ព្យុះកំណាចនេះក៏បំផ្លាញផ្ទះជាង ៨ ០១០ខ្នង និងពន្លិចកប៉ាល់ខ្នាតតូចចំនួន២៥គ្រឿងនៅខេត្ត Quang Ninh ផងដែរ ខណៈ Hai Phong, Thai Binh, Hai Duong និង Hanoi នៅតែមិនទាន់មានអគ្គិសនីប្រើប្រាស់។

បើនិយាយពីវិស័យកសិកម្មវិញ ស្រូវជិត ១១០ ០០០ហិកតាត្រូវបានជន់លិច ខណៈដំណាំបន្លែ ​១៧ ៩២០​ហិកតា និង​ដំណាំ​ហូប​ផ្លែ​ ៦ ៩០០​ហិកតា​ត្រូវ​ខូចខាត៕

អត្ថបទ៖ សុខ សុវណ្ណ

ចុចអាន៖ វៀតណាម ស្លាប់មនុស្សកាន់តែច្រើន​ដោយសារ​ព្យុះ​ ​ខណៈ​ភាគ​ខាង​ជើង ប្រឈមបំណាក់ដីធ្ងន់ធ្ងរ