ព័ត៌មានអន្ដរជាតិ

វៀតណាម ឡាវ និងថៃកំពុងប្រឈមទឹកជំនន់គួរឲ្យបារម្ភដោយសារឥទ្ធិពលព្យុះយ៉ាក់ជី

បានផុស

៥ នាទី មុន

នៅ

ថ្ងៃពុធ ១១ កញ្ញា ២០២៤

ដោយ

ឥទ្ធិពលខ្យល់ព្យុះទីហ្វុង យ៉ាក់ជី (Yagi) ដែលបានវាយប្រហារដំបូងនៅប្រទេសហ្វីលីពីនភាគខាងត្បូងចិនកាលពីសប្តាហ៍មុននោះ កំពុងបន្តវាយប្រហារតំបន់ភាគខាងជើង វៀតណាម ឡាវ និងថៃ ខណៈមហន្តរាយធ្ងន់ធ្ងរបំផុតកើតឡើងក្នុងប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍នានា ប្រទេសវៀតណាមមានមនុស្សស្លាប់យ៉ាងហោចណាស់១៤១នាក់ក្នុងហេតុការណ៍នេះគិតត្រឹមព្រឹកថ្ងៃពុធនេះ។ ឥទ្ធិពលនៃព្យុះនេះកំពុងបង្កមហន្តរាយទឹកជំនន់លិចលង់យ៉ាងធ្ងន់ធ្ងរ និងបង្កការបាក់ស្ពាន បំណាក់ដី ការខូចខាតផ្ទះសម្បែង និងកម្រិតទឹកទន្លេនៅភាគខាងជើងវៀតណាមហក់ឡើងយ៉ាងខ្លាំង។

នៅប្រទេសឡាវឯណោះវិញ ព្យុះទីហ្វុង យ៉ាកជី បានបណ្តាលឲ្យទឹកទន្លេមេគង្គកើនឡើងយ៉ាងរហ័ស។ រហូតដល់ព្រឹកថ្ងៃទី១១ខែកញ្ញា កម្រិតទឹកបានកើនឡើងយ៉ាងរហ័សនៅទន្លេ Nam Khan និងទន្លេមេគង្គដែលកំពុងបង្កការគំរាមកំហែងលិចលំនៅឋានរបស់ប្រជាពលរដ្ឋ និងឈានទៅលិចក្រុងដែលបានចុះបញ្ជីបេតិកភ័ណ្ឌពិភពលោក។ យោង The Laotian Times យោងហោចណាស់មនុស្សម្នាក់បានស្លាប់ដោយសារទឹកជំនន់ ខណៈប្រជាជនរាប់រយនាក់រងផលប៉ះពាល់។

សារព័ត៌មានថៃ Khaosod English បានរាយការណ៍នៅព្រឹកថ្ងៃទី១១ខែកញ្ញានេះ បានឲ្យដឹងថា ខេត្តឈៀងម៉ៃ ខេត្តឈៀងរ៉ៃស្ថិតនៅភាគខាងជើងប្រទេស បានរងផលប៉ះពាល់ដោយសារឥទ្ធិពលព្យុះយ៉ាកជីនេះ។ ការិយាល័យបង្ការនិងកាត់បន្ថយគ្រោះមហន្តរាយខេត្តឈៀងម៉ៃ បានឱ្យដឹងនៅព្រឹកថ្ងៃពុធនេះថា ឥទ្ធិពលភ្លៀងខ្លាំងដោយសារព្យុះយ៉ាក់ជីបានបង្កឧបទ្ទវហេតុបាក់ដីក្នុងតំបន់២ផ្សេងគ្នាប៉ះពាល់មនុស្ស៧នាក់ ក្នុងនោះ២នាក់បានបាត់បង់ជីវិត៕