ព័ត៌មានអន្ដរជាតិ

តើការជជែកដេញដោលកំណត់វាសនា លោក ត្រាំ និងអ្នកស្រី ហារីស ទៅកាន់សេតវិមានឬ?

បានផុស

៥ ខែ មុន

នៅ

ថ្ងៃពុធ ១១ កញ្ញា ២០២៤

ដោយ

អនុប្រធានាធិបតី កាម៉ាឡា ហារីស (Kamala Harris) និងអតីតប្រធានាធិបតី ដូណាល់ ត្រាំ (Donald Trump) ទំនងជាកំណត់ជោគវាសនារបស់ពួកគេរៀងៗសម្រាប់ដំណើរទៅទៅកក់កៅអីសេតវិមានដែលសល់មិនដល់២ខែទៀតនេះ តាមរយៈការជជែកដេញដោលផ្ទាល់ដំបូងរយៈពេល៩០នាទីយប់ថ្ងៃអង្គារ៍ត្រូវនឹងព្រឹកថ្ងៃពុធម៉ោងនៅកម្ពុជា។

បេក្ខជនប្រធានាធិបតីដែលមានវ័យខុសគ្នាជិត២០ឆ្នាំ គឺលោកស្រី កាម៉ាឡា ហារីស វ័យ៦០ឆ្នាំ និងលោក ដូណាល់ ត្រាំ វ័យ៧៨ឆ្នាំ បានចាប់ផ្តើមដោយការស្វាគមន៍គ្នា ដោយការកំណត់ឱ្យដើរចេញពីមកកាន់វេទិកាក្នុងរយៈចម្ងាយស្មើគ្នាពីខាងវេទិការបស់ខ្លួន ប៉ុន្តែលោកស្រី ហារីសហាក់បានដើរលឿនជាងទៅចាប់ដៃលោកត្រាំរហូតដល់ក្រោយតុវេទិការបស់លោកត្រាំ។

លោក ដូណាល់ ត្រាំ ក្នុងកម្មវិធីជជែកដេញដោលទល់លោកស្រី កាម៉ាឡា ហារីស នៅថ្ងៃពុធនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគីទាំងពីរបានចាប់រលាក់ដៃគ្នាដោយស្នាមញញឹមដាក់គ្នាក្លែងក្លាយ មុនឈានទៅវាយប្រហារគ្នាដោយពាក្យសម្តី ចាប់ចំណុចខ្សោយរបស់គ្នាទៅវិញទៅមក ដើម្បីធ្វើយ៉ាងណាឱ្យអ្នកស្តាប់ជនជាតិអាមេរិកជាពិសេសអ្នកដែលមានសិទ្ធិបោះឆ្នោតប្រមាណ២៤៤លាននាក់ជឿជាក់លើថ្វីមាត់របស់ខ្លួន។

វេទិកាជជែកដេញដោលដ៏ពិសេសដែលរៀបចំឡើងដោយប្រព័ន្ធផ្សព្វផ្សាយ ABC មុនការបោះឆ្នោតផ្លូវការនៅថ្ងៃទី៥ខែវិច្ឆិកាឈានចូលមកដល់ ក្លាយជាកន្លែងកាត់សេចក្តីមួយដ៏សំខាន់មួយសម្រាប់ប្រជាប្រិយភាពរបស់បេក្ខជនម្នាក់ៗក្នុងការប្រជែងយកកៅអីនៅសេតវិមានដែលមានអំណាចផុតលេខក្នុងសកលលោក។

ក្នុងចំណោមអ្នកបោះឆ្នោតអាមេរិកដែលមានសិទ្ធិបោះឆ្នោតប្រមាណ២៤៤លាននាក់ ប៉ុន្តែប្រជាជនអាមេរិករាប់សិបលាននាក់ក៏តែងបោះបង់សិទ្ធិនេះចោលដោយគេជឿថាអ្នកណាឈ្នះក៏បាន ឬក៏ថា អ្នកណាឈ្នះក៏ដូចអ្នកណាដែរ។ កាលឆ្នាំ២០២០ ប្រជាជនអាមេរិក៦៦,៦%បានចេញទៅបោះឆ្នោតក្នុងចំណោមប្រជាជនសរុបដែលមានសិទ្ធិបោះឆ្នោត។

ការជជែកដេញដោលក្នុងចំណោមបេក្ខជនប្រធានាធិបតីពិតជាមានសារៈសំខាន់ណាស់សម្រាប់អង្គបោះឆ្នោតប្រកាន់ជាប់ក្នុងចិត្ត ដើម្បីឈានទៅសម្រេចចិត្តបានច្បាស់លាស់លើបេក្ខជនដែលពួកគេពេញចិត្តនៅថ្ងៃទី៥ខែវិច្ឆិកា។

តាមរយៈការជជែកដេញដោលបែបនេះ វាបានរុញច្រានប្រធានាធិបតីក្នុងតំណែង គឺលោក ចូ បៃដិន វ័យជាង៨២ ឱ្យដកខ្លួនពីការប្រជែងយកកៅអីនៅសេតវិមានសម្រាប់អាណត្តិទី២ដោយសារតែការធ្លាក់ចុះប្រជាប្រិយភាពក្រោយការជជែកដេញដោលក្នុងទម្រង់ដូចគ្នានេះរៀបចំឡើងដោយបណ្តាញទូរទស្សន៍ខ្សែកាប្លិ៍ (CNN) កាលពីខែមិថុនា។

ក្រោយការជជែកដេញដោលនៅ CNN ប្រជាប្រិយភាពរបស់ដូណាល់ ត្រាំ បានកើនឡើង វ៉ាដាច់លោក ចូ បៃដិន ដែលនិយាយហាក់ភ្លេចមុខភ្លេចក្រោយដោយសារតែវ័យចំណាស់ ធ្វើឱ្យការស្ទង់មតិជាបន្តបន្ទាប់ បង្ហាញថា ប្រធានាធិបតីវ័យចំណាស់មិនអាចឈ្នះគូប្រជែងដូណាល់ត្រាំដាច់ខាត។

ប៉ុន្តែ លោក ចូ បៃដិន បានបដិសេធបោះបង់ការប្រជែងជាច្រើនលើក ដោយទទូចថាសុខភាពរបស់លោកគ្មានបញ្ហានោះទេ ព្រោះវេជ្ជបណ្ឌិតត្រួតពិនិត្យសុខភាពលោកមិនដែលប្រាប់លោកពីការធ្លាក់ចុះសុខភាពនោះទេ។

រឿងដ៏គួរឲ្យភ្ញាក់ផ្អើលគឺថា លោកចូ បៃដិន បានប្រកាសដកខ្លួនពីការប្រជែងតំណែងប្រធានាធិបតីនៅថ្ងៃទី២១ខែកក្កដា ដើម្បីបើកផ្លូវឲ្យអនុប្រធានាធិបតីរបស់លោក គឺ លោកស្រី កាម៉ាឡា ហារីស ដណ្តើមប្រជាប្រិយភាពរបស់គណបក្សប្រជាធិបតេយ្យត្រឡប់មកវិញ។

លោក ដូណាល់ ត្រាំ និង ចូ បៃដិន ក្នុងកម្មវិធីជជែកដេញដោយ កាលពីខែមិថុនា។

លោកស្រី កាម៉ាឡា ហារីស បានអន្ទងចិត្តអ្នកគាំទ្របានយ៉ាងឆាប់រហ័ស ហើយ អ្នកដែលបរិច្ចាគប្រាក់សម្រាប់ការធ្វើយុទ្ធនាការក៏បានប្រកាសឧបត្ថម្ភវិញ រហូតដល់វេទិកាកៀគរថវិការបស់គណបក្សប្រជាធិបតេយ្យបានរាប់រយលានដុល្លារក្នុងរយៈពេលប្រហែល១ខែ ចាប់ពី ចូ បៃដិន បានប្រកាសដកខ្លួន រហូតដល់គណបក្សប្រជាធិបតេយ្យធ្វើសមាជដើម្បីអនុម័តតែងតាំងលោកស្រី កាម៉ាឡា ហារីស ជាផ្លូវការកាលថ្ងៃទី២៤ខែសីហា។

ប្រជាប្រិយភាពរបស់បេក្ខជនទាំងពីរ គឺ លោកដូណាល់ ត្រាំ តំណាងគណបក្សសាធារណៈរដ្ឋ និង លោកស្រី កាម៉ាឡា ហារីស តំាង គណបក្សប្រជាធិបតេយ្យ បានរក្សាលទ្ធផលប្រកៀកប្រកិតគ្នា (neck-to-neck) ក្នុងការស្ទង់មតិដែលត្រូវបានធ្វើឡើងជាបន្តបន្ទាប់អំពីការបោះឆ្នោតប្រធានាធិបតីនោះ។

តាមរយៈការជជែកដេញដោល វាយប្រហារគ្នាទៅវិញទៅមករបស់បេក្ខជនប្រធានាធិបតីទាំងពីរលើរបៀបវារៈនយោបាយជាតិនិងសកល ដូចជាបញ្ហាសង្គ្រាមមជ្ឈិមបូព៌ា សង្គ្រាមអ៊ុយក្រែននិងរុស្ស៊ី បញ្ហារបស់អង្គការណាតូ រហូតដល់រឿងក្នុងប្រទេស ដូចជា សិទ្ធិរំលួតកូន និង បញ្ហាផ្ទាល់ខ្លួនរបស់បុគ្គលម្នាក់ៗ ការជជែកដេញដោលនោះបានធ្វើបេក្ខជនមានប្រៀបរៀងៗខ្លួន។

បញ្ហាសង្គ្រាមដែលកំពុងកើតមានក្រោមអាណត្តិរបស់លោក ចូ បៃដិន ដែលមានអ្នកស្រី កាម៉ាឡា ហារីស ជាអនុប្រធានាធិបតីស្រាប់ទំនងទាញទម្លាក់ប្រជាប្រិយភាពរបស់លោកស្រី ហារីស ដោយមិនប្រាកដក្នុងចិត្តក្នុងការបញ្ចប់សង្គ្រាម ដែលធ្វើឱ្យលោក ដូណាល់ ត្រាំ មានឱកាសបង្ហាញពីយុទ្ធសាស្រ្តចរចាបញ្ចប់សង្គ្រាមទទួលបានការពេញចេញពីអ្នកតាមដាន។

ប៉ុន្តែការគ្រប់គ្រងកំហឹងមិនបានក្នុងការឆ្លើយតប និងការវាយប្រហារលើចំណុចផ្ទាល់ខ្លួនរបស់លោកលោក ត្រាំទៅលើលោកស្រី ហារីស ក៏ជាចំណុចខ្សោយរបស់លោក ដូណាល់ ត្រាំ ប្រៀបធៀបនឹងលោកស្រី ហារីសដែរ។

ដូចនេះការជជែកដេញដោលរបស់បេក្ខជនប្រធានាធិបតី លោកស្រី កាម៉ាឡា ហារីស ដែលជាអនុប្រធានាធិបតីក្នុងតំណែង និង លោក ដូណាល់ ត្រាំ ជាអតីតប្រធានាធិបតី១អាណតិ្ត នឹងក្លាយជាការវេទិកាកំណត់ជោគវាសនារបស់ពួកគេរៀងៗខ្លួនសម្រាប់ដំណើរឆ្ពោះទៅថ្ងៃបោះឆ្នោត៕

ដោយ រ៉ាន់ រើយ