ចំនួនមនុស្សស្លាប់ដោយគ្រោះធម្មជាតិនៅវៀតណាម លោតឡើងដល់ជិត ២០០នាក់

តាមការចុះផ្សាយរបស់ VN Express, គិតត្រឹមព្រឹកថ្ងៃព្រហស្បតិ៍ទី១២ខែកញ្ញាឆ្នាំ២០២៤ ចំនួនមនុស្សស្លាប់ដោយសារគ្រោះធម្មជាតិនៅវៀតណាម បានកើនឡើងដល់១៨១នាក់នាក់ហើយ ខណៈ១៤៥នាក់ទៀត កំពុងបាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឥទ្ធិពលនៃព្យុះទីហ្វុង យ៉ាកជី ក៏បណ្តាលឲ្យកម្ពស់ទឹកទន្លេដ៏ធំបំផុតមួយរបស់វៀតណាម ឡើងដល់កម្រិតគ្រោះថ្នាក់ ដោយជន់លិចដងផ្លូវនៅក្នុងទីក្រុងហាណូយផងដែរ ខណៈដែលតំបន់រងគ្រោះធ្ងន់ធ្ងរបំផុត គឺប៉ែកខាងជើង។ 

នៅទីនោះ មានការវាយប្រហារដោយបំណាក់ដីជាបន្តបន្ទាប់ ហើយផ្ទះជាង ៥៤ ០០០ខ្នង ត្រូវបានទឹកជន់លិច។

យោងតាមនាយកដ្ឋានកាត់បន្ថយគ្រោះមហន្តរាយជាតិ, Lao Cai គឺជាខេត្តដែលរងគ្រោះខ្លាំងជាងគេ ដោយនៅទីនោះមានមនុស្សស្លាប់សរុប ៧២នាក់ និងបាត់ខ្លួនចំនួន១១១នាក់។

ងាកទៅទីក្រុងហាណូយវិញ កម្ពស់ទឹកទន្លេក្រហមបានឡើងដល់កម្រិតប្រកាសអាសន្នធ្ងន់ធ្ងរ ជាហេតុបង្ខំឲ្យជម្លៀសមនុស្សរាប់ពាន់នាក់ ថែមទាំងបិទសាលារៀនរាប់រយទៀតផង។

សូមបញ្ជាក់ថា គ្រោះទឹកជំនន់នៅហាណូយ គឺជាគ្រោះទឹកជំនន់ធ្ងន់ធ្ងរបំផុតដែលទីក្រុងនេះ មិនធ្លាប់ជួបប្រទះសោះក្នុងរយៈពេល២០ឆ្នាំចុងក្រោយ ហើយដោយសារស្ថានភាពមិនទាន់ធូរស្បើយ អ្នកក្រុងបានអំពាវនាវសុំជំនួយជាបន្ទាន់៕

អត្ថបទ៖ សុខ សុវណ្ណ

ចុចអាន៖ មិនត្រឹមទឹកជំនន់ ពេលនេះ ទីក្រុងហាណូយ ចេញការព្រមានអំពីរន្ទះបាញ់ ថែមទៀត