ព័ត៌មានអន្ដរជាតិ

តំបន់អាហ្វ្រិក៖ទំនប់វារីអគ្គិសនីបាក់នៅនីហ្សេរីយ៉ា ប៉ះពាល់មនុស្សប្រមាណ១លាននាក់

បានផុស

៥ ខែ មុន

នៅ

ថ្ងៃព្រហស្បតិ៍ ១២ កញ្ញា ២០២៤

ដោយ

បាក់ទំនប់វារីអគ្គិសនីនៅភាគឦសានប្រទេសនីហ្សេរីយ៉ា បណ្តាលឱ្យមានទឹកជំនន់យ៉ាងធ្ងន់ធ្ងរ បំផ្លាញផ្ទះរាប់ពាន់ខ្នង និងធ្វើឱ្យវិបត្តិមនុស្សធម៌ដ៏សែនធ្ងន់ធ្ងរ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១២ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរនៅក្នុងតំបន់ដែលរងផលប៉ះពាល់បានឲ្យដឹងថា ទឹកជំនន់នៅក្នុងរដ្ឋ Borno បានប៉ះពាល់ដល់មនុស្សមួយលាននាក់ ខណៈដែលអាជ្ញាធរកំពុងព្យាយាមជួយសង្គ្រោះអ្នកស្រុក និងដាក់ពួកគេនៅក្នុងជម្រកបណ្តោះអាសន្ន។

ការបាក់ទំនប់វារីអគ្គិសនីនេះបានកើតឡើងកាលពីថ្ងៃអង្គារដោយសារតែមានភ្លៀងធ្លាក់ខ្លាំង ទឹកដ៏ច្រើនបានបំផ្លាញសួនសត្វរបស់រដ្ឋ និងអនុញ្ញត្ឲ្យសត្វក្រពើ សត្វពស់ និងសត្វព្រៃផ្សេងៗទៀត ចូលទៅក្នុងសហគមន៍ដែលលិចទឹក។

បច្ចុប្បន្នមនុស្សជាច្រើនកំពុងធ្វើដំណើរចេញពីតំបន់ដែលគ្របដណ្តប់ដោយទឹកជំនន់ ស្របពេលអ្នកជួយសង្គ្រោះបានប្រើឧបករណ៍មុជទឹក ដើម្បីជួយសង្គ្រោះមនុស្សឱ្យបានកាន់តែច្រើនតាមដែលអាចធ្វើទៅបាន។ មន្ត្រីក្នុងតំបន់បានឲ្យដឹងថាវាគឺជាទឹកជំនន់ដ៏អាក្រក់បំផុតនៅក្នុងរដ្ឋនេះក្នុងរយៈពេលពីរទសវត្សរ៍មកនេះ ទោះយ៉ាងណាអាជ្ញាធរមិនទាន់បានប្រកាសអំពីអ្នកស្លាប់នៅឡើយទេ។

គួរបញ្ជាក់ថា ការបាក់ទំនប់វារីអគ្គិសនីនេះកំពុងធ្វើឱ្យមានវិបត្តិមនុស្សធម៌នៅ Borno ក្នុងរយៈពេលមួយទសវត្សរ៍កន្លងមកនេះ ដោយសារតែការបះបោររបស់ក្រុមប្រដាប់អាវុធ Boko Haram។ ការបះបោរនេះបានរាលដាលពាសពេញព្រំដែនបានសម្លាប់មនុស្សជាង ៣៥០០០ នាក់ និងបានជម្លៀសមនុស្ស ២,៦លាននាក់ផ្សេងទៀតនៅក្នុងតំបន់ភាគខាងជើងឆៀងខាងកើតរបស់ប្រទេស។

ទីភ្នាក់ងារគ្រប់គ្រងគ្រោះអាសន្នជាតិបាននិយាយថា ទឹកជំនន់នៅក្នុងប្រទេសនីហ្សេរីយ៉ាបានសម្លាប់មនុស្សចំនួន ២២៩នាក់ចាប់តាំងពីដើមឆ្នាំនេះមក។ កាលពីចុងខែសីហា ទឹកជំនន់បានសម្លាប់មនុស្សចំនួន ៤៩ នាក់ និងបានជម្លៀសមនុស្សរាប់ពាន់នាក់នៅក្នុងរដ្ឋចំនួនបីគឺ Jigawa Adamawa និង Taraba បន្ទាប់ពីមានភ្លៀងធ្លាក់ខ្លាំងនៅភាគឦសានប្រទេស ខណៈទឹកជំនន់ដ៏អាក្រក់បំផុតក្នុងរយៈពេលថ្មីៗនេះដែលបានសម្លាប់មនុស្ស ៦០០នាក់គឺនៅក្នុងឆ្នាំ ២០២២៕