កូរ៉េខាងជើង​បាញ់​មី​ស៊ី​ល​ផ្លោង​ជាច្រើន​គ្រាប់ ស្របពេល លោកគីម​ប្តេជ្ញា​ពង្រឹងនុយក្លេអ៊ែរ​​

ប្រទេសកូរ៉េខាងជើងបានបាញ់មីស៊ីលផ្លោងរយៈចម្ងាយខ្លីជាច្រើនគ្រាប់ឆ្ពោះទៅកាន់សមុទ្រនៅ​ថ្ងៃព្រហស្បតិ៍ ប៉ុន្មានថ្ងៃបន្ទាប់ពីមេដឹកនាំកូរ៉េខាងជើងលោក គីម ជុងអ៊ុន បានប្តេជ្ញាថានឹងពង្រឹងថាមពល​នុយក្លេអ៊ែររបស់ខ្លួនយ៉ាងពេញលេញដើម្បីត្រៀមធ្វើសង្គ្រាមជាគូរប្រជែងរបស់ខ្លួន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី ១២ខែកញ្ញានេះ។

អគ្គសេនាធិការចម្រុះរបស់កូរ៉េខាងត្បូងបាន​ពិនិត្យ​តាមដាន​មីស៊ីលដែលបាញ់ចេញពីរដ្ឋធានីរបស់កូរ៉េខាងជើង ដែល​ហោះ​បានចម្ងាយ៣៦០គីឡូម៉ែត្រ មុនពេលធ្លាក់ចូលក្នុងដែនទឹករវាងឧបទ្វីបកូរ៉េ និងជប៉ុន។ ជាមួយគ្នានេះ នាយករដ្ឋមន្ត្រីជប៉ុន លោក Fumio Kishida បានណែនាំមន្ត្រីឱ្យធានាសុវត្ថិភាពនាវានិងយន្តហោះ ប៉ុន្តែមិនមានរបាយការណ៍អំពីការខូចខាតនោះទេ។

ការបាញ់មីស៊ីល​​នេះបានកើតឡើង បន្ទាប់ពីកូរ៉េខាងជើងបានបង្ហោះប៉េងប៉ោងដ៏ធំរាប់រយដឹកសំរាមឆ្ពោះទៅកាន់កូរ៉េខាងត្បូងរយៈពេលប្រាំថ្ងៃជាប់គ្នារហូតដល់ថ្ងៃអាទិត្យ។ លើសពីនេះចម្ងាយនៃការបាញ់មីស៊ីលនេះត្រូវបានរចនាឡើងដើម្បីវាយប្រហារគោលដៅក្នុងប្រទេសកូរ៉េខាងត្បូង។

ការ​បាញ់​បង្ហោះ​នេះ ​ជា​សកម្មភាព​បាញ់​អាវុធ​សាធារណៈ​លើក​ដំបូង​របស់​កូរ៉េ​ខាងជើង​ក្នុង​រយៈពេល​ជាង​ពីរ​ខែ ចាប់តាំងពីថ្ងៃទី​១ខែ​កក្កដា ដែលប្រទេស​កូរ៉េ​ខាង​ជើង​ បាន​អះអាង​ថា​ បាន​សាកល្បង​អាវុធ​យុទ្ធសាស្ត្រ​ថ្មី​មួយ​ដែល​មាន​សមត្ថភាព​អាច​បញ្ជូន​ក្បាល​គ្រាប់​ប្រភេទ «ធំ»ទម្ងន់៤,៥តោន។

ពាក់ព័ន្ធបញ្ហានេះនៅក្នុងកិច្ចពិភាក្សាតាមទូរស័ព្ទត្រីភាគី រវាងអ្នកការទូតមកពីកូរ៉េខាងត្បូង ជប៉ុន និងសហរដ្ឋអាមេរិក បាន​ថ្កោលទោសការបាញ់បង្ហោះនេះថា បានគំរាមកំហែងដល់សន្តិភាពក្នុងតំបន់ និងអន្តរជាតិ។ ចំណែកទីបញ្ជាការឥណ្ឌូ-ប៉ាស៊ីហ្វិករបស់សហរដ្ឋអាមេរិក បានបញ្ជាក់ដោយឡែកថា អាមេរិកនៅតែរក្សាការប្តេជ្ញាចិត្តគាំទ្រេផ្នែកសន្តិសុខចំពោះកូរ៉េខាងត្បូង និងជប៉ុន។

នៅក្នុងសុន្ទរកថាកាលពីថ្ងៃចន្ទដែលប្រារព្ធខួបលើកទី៧៦របស់រដ្ឋាភិបាល លោក គីម បាននិយាយថា នឹង«បង្កើនកិច្ចខិតខំប្រឹងប្រែងឡើងវិញដើម្បីធ្វើឱ្យមានកម្លាំងនុយក្លេអ៊ែរយ៉ាងពេញលេញត្រៀមខ្លួនប្រយុទ្ធជាមួយសហរដ្ឋអាមេរិក និងសម្ព័ន្ធមិត្តរបស់ខ្លួន»។

លោក គីម បានសន្យាបែបនេះ ដោយលើកឡើងថា កូរ៉េខាងជើងប្រឈមមុខនឹង «ការគំរាមកំហែងយ៉ាងធ្ងន់ធ្ងរ» ដោយសារតែការពង្រីកប្លុកយោធាក្នុងតំបន់ដែលដឹកនាំដោយសហរដ្ឋអាមេរិក។

បើទោះបី លោក គីម បានធ្វើការសន្យាស្រដៀងគ្នាជាច្រើនដង ប៉ុន្តែការគំរាមកំហែងចុងក្រោយរបស់លោកអាចកើតឡើងពិតមែន នៅពេលដែលអ្នកជំនាញខាងក្រៅជឿថា កូរ៉េខាងជើងអាចធ្វើតេស្តនុយក្លេអ៊ែរ ឬការបាញ់សាកល្បងមីស៊ីល​រយៈចម្ងាយឆ្ងាយ មុនពេលការបោះឆ្នោតប្រធានាធិបតីអាមេរិកក្នុងខែវិច្ឆិកា ដើម្បីបង្កើនអានុភាពរបស់ខ្លួនក្នុងការដោះស្រាយនាពេលអនាគតជាមួយ សហរដ្ឋអាមេរិក។

ជាមួយគ្នានេះ កាលពីថ្ងៃអាទិត្យ ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានចេញផ្សាយរូបថតរបស់លោក គីម ត្រួតពិនិត្យយាន 12 axel ដែលនឹងក្លាយជាវេទិកាបាញ់មីស៊ីលដ៏ធំបំផុតរបស់ប្រទេស ដែល​ជំរុញ​ឱ្យ​មាន​ការ​រំពឹង​ទុក​ថា កូរ៉េ​ខាងជើង​អាច​នឹង​កំពុង​អភិវឌ្ឍ​មីស៊ីលឆ្លងទ្វីប​ដ៏​មាន​ឥទ្ធិពល​ជាង​មុន​ដែល​រចនា​ឡើង​ដើម្បី​វាយប្រហារ​ដីគោក​របស់​សហរដ្ឋអាមេរិក។

ចាប់តាំងពីឆ្នាំ២០២២ មកប្រទេសកូរ៉េខាងជើងបានបង្កើនសកម្មភាពសាកល្បងអាវុធរបស់ខ្លួនយ៉ាងខ្លាំងនៅក្នុងកិច្ចខិតខំប្រឹងប្រែងដើម្បីបំពេញសមត្ថភាពរបស់ខ្លួនក្នុងការបាញ់ប្រហារលើសហរដ្ឋអាមេរិក និងកូរ៉េខាងត្បូង។ទោះយ៉ាងណា សហរដ្ឋអាមេរិក និងកូរ៉េខាងត្បូងបានឆ្លើយតបដោយការពង្រីកការធ្វើសមយុទ្ធយោធា ខណៈដែលកូរ៉េខាងជើងហៅសមយុទ្ធទាំងនោះថា« ការហាត់សមការឈ្លានពាន»៕

អត្ថបទ៖ ប៊ុន សុភាព