​​​ភ្លៀង​ខ្លាំង​នឹង​​ធ្លាក់​នៅថៃ​ ឡាវ រួម​ទាំង​​កម្ពុជា​ ខណៈទឹកទន្លេមេគង្គ​​បន្តហក់​ឡើង​​ ​

​ស្របពេល​ទឹកជំនន់​​កំពុង​វាយប្រ​​ហារ​​​​ដ៏ធ្ងន់ធ្ងរ​នៅ​ភាគខាង​​លើ​​នៃ​អាង​​ទន្លេមេគង្គ​​និង​​​ផ្លូវ​ទឹក​នានា​តភ្ជាប់​​​ទន្លេមេគង្គ​ក្នុង​ប្រទេស​​ថៃ ឡាវ ​​គណៈកម្មការ​​​ទន្លេមេគង្គនៅ​ថ្ងៃទី​១២​ខែ​​កញ្ញានេះ បាន​បង្ហាញ​​ការ​ព្យាករ​​ណ៍​ទឹក​ភ្លៀងធ្លាក់​​ខ្លាំង​​នៅ​​​ប្រទេស​ថៃ ឡាវ និង​កម្ពុជា​​​ដែល​នឹង​កើត​មាន​ក្នុង​រយៈពេល​២៤​ម៉ោង​។​

​យោង​តាម​ការ​​ផ្សាយ​​​របស់គណៈកម្មការ​​ទន្លេមេគង្គ​ដែល​ជាស្ថាប័ន​អន្តររដ្ឋាភិបាល​សម្រាប់​ឃ្លាំង​មើល​​​ដំណើរ​ការ​របស់​ទន្លេ​មេគង្គ ​ ខេត្ត​របស់​ប្រទេស​កម្ពុជាដែល​នឹង​មាន​ភ្លៀង​ធ្លាក់​​ខ្លាំង​​ រួម​មាន ខេត្តកំពង់ឆ្នាំ​ង កំពត ខេត្តប៉ៃលិន ​ខេត្តបាត់ដំបង និង ខេត្តរតនៈគីរី។

សម្រាប់​ប្រទេសឡាវ មានខេត្ត​ចំនួន​៥​ដែល​នឹង​មាន​ភ្លៀង​ធ្លាក់​ខ្លាំង​ក្នុង​រយៈពេល​២៤​ម៉ោង​​ រួម​មាន​ខេត្ត Luangprabang, Vientiane, Xiengkhuang, Bolikhamxay, និង  Khammuane។​

ប៉ុន្តែ​ក្នុងរយៈពេលដូចគ្នា​នេះ ​​ប្រទេស​ថៃ​​ប្រឈម​​​ស្ថានភាព​ធ្ងន់ធ្ងរ​ដោយសារ​​ខេត្តរហូត​១៧​ នឹង​មាន​ភ្លៀង​ខ្លាំង​ ខេត្តទាំងនោះ​រួម​មាន ខេត្ត Chiangrai, Loei, Nong Khai, Bueng Kan, Nong Bua Lamphu, Udon Thani, Sakon Nakhon, Nakhon Phanom, Maha Sarakham, Chaiyaphum, Mukdahan, Kalasin, Yasothon, Khon Kaen, Amnat Charoen និង​ ខេត្ត​ Ubon Ratchathani។

​ដោយ​ឡែក​​ ចាប់​ពីថ្ងៃទី​​១៣​ដល់​ថ្ងៃទី​១៧ខែកញ្ញា​​នេះ ​ភ្លៀង​ធ្លាក់​ខ្លាំង​នៅ​​តំ​​​បន់​ភាគ​កណ្តាល​​អាងទន្លេមេគង្គ​។ អាង​ទ​​ន្លេមេគង្គ គឺ​​ រាប់​ចាប់តាំង​ពី​​ភាគខាងជើង​ប្រទេស​ថៃ ​ប្រទេសឡាវស្ទើរ​ទាំងអស់ ប្រទេសកម្ពុជា​ និង​តំបន់ភាគ​ខាងត្បូង​វៀតណាម​។​ យោងឯកសារ​​របស់​គណៈកម្មការ​ទន្លេមេគង្គ​៕​

ដោយ រ៉ាន់ រើយ​