ព័ត៌មានអន្ដរជាតិ

រុស្ស៊ីដឹកនាំ BRICS ឆ្ពោះទៅបង្កើតសណ្តាប់ធ្នាប់ពិភពលោកថ្មី

បានផុស

៧ ខែ មុន

នៅ

ថ្ងៃសុក្រ ១៣ កញ្ញា ២០២៤

ដោយ

រុស្ស៊ីដែលដឹកមុខក្នុងការប្រឆាំងមហាអំណាចបស្ចឹមប្រទេសដែលមានសហរដ្ឋអាមេរិក អង់គ្លេស និងមហាអំណាចអឺរ៉ុបខាងលិចជាច្រើនទៀត បានបើកកិច្ចប្រជុំកំពូលសន្តិសុខ BRICS នៅទីក្រុង ST. PETERSBURG ថ្ងៃទី១១-១២ខែកញ្ញានេះដើម្បីពិភាក្សាលើលទ្ធភាពនៃការរៀបចំសណ្តាប់ធ្នាប់ពិភពលោកនាពេលអនាគត។

លោក Sergey Shoigu លេខាធិការក្រុមប្រឹក្សាសន្តិសុខរុស្ស៊ី។ Getty Image

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រុស្ស៊ីបានចេញមុខប្រឆាំងបស្ចឹមប្រទេសដែលជាចងសម្ព័ន្ធភាពជិតស្និទ្ធក្នុងអង្គការប្រដាប់អាវុធណាតូ តាមរយៈការធ្វើសង្គ្រាមលុកលុយប្រទេសអ៊ុយក្រែនដែលមានបំណងចូលជាសមាជិករបស់អង្គការណាតូ។

យោងទីភ្នាក់ងារព័ត៌មានរុស្ស៊ី TASS លោក Sergey Shoigu លេខាធិការក្រុមប្រឹក្សាសន្តិសុខរុស្ស៊ី បានដឹកនាំកិច្ចប្រជុំកំពូលសន្តិសុខ BRICS ដោយមានតំណាងចូលរួមមកពីប្រទេសរុស្ស៊ី ចិន ប្រេស៊ីល ឥណ្ឌា អាហ្វ្រិកខាងត្បូង ក៏ដូចជាមកពីប្រទេសអេហ្ស៊ីប អារ៉ាប់រួម អ៊ីរ៉ង់ និងអេត្យូពី។

ក្នុងវិបត្តិនៃសង្គ្រាមនៅអ៊ុយក្រែន រុស្ស៊ីបានបាក់មុខយ៉ាងខ្លាំងនៅវេទិកានានារបស់អង្គការសហប្រជាជាតិដែលរងឥទ្ធិពលយ៉ាងខ្លាំងពីសហរដ្ឋអាមេរិក និងប្រទេសលោកសេរី ប៉ុន្តែសមាគម BRICS បានរក្សាគោលជំហររបស់រុស្ស៊ីលើឆាកអន្តរជាតិ និងមានសំឡេងប្រឆាំងបច្ចឹមប្រទេស។

សមាគម BRICS ផ្គុំឡើងដោយពាក្យកាត់តំណាងប្រទេសស្ថាបនិក ដូចជា ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។ មេដឹកនាំនៃប្រទេសទាំងនេះ ខ្លះជឿថា BRIC នឹងក្លាយជាអ្នកផ្គត់ផ្គង់ទំនិញ ផលិតសេវាកម្ម និងវត្ថុធាតុដើមដ៏សំខាន់ នៅឆ្នាំ ២០៥០។

TASS បានរាយការណ៍ថា យោងតាមរបៀបវារៈបឋម តំណាងប្រទេសក្នុងសមាគម BRICS ដែលរៀបចំកិច្ចប្រជុំនៅឆ្នាំនេះដឹកនាំដោយប្រទេសរុស្ស៊ី មានបំណងនិយាយអំពីរបៀបធ្វើការរួមគ្នាដើម្បីប្រឆាំងនឹង «បទបញ្ជាផ្អែកលើច្បាប់» ដែលដាក់ដោយលោកខាងលិច។

កិច្ចប្រជុំនេះត្រូវបានធ្វើឡើងនៅថ្ងៃទី ១១-១២ ខែកញ្ញា បានកំណត់ការពិភាក្សាអំពីការគាំទ្រយន្តការពហុភាគី និងសិទ្ធិរបស់ប្រទេសនានាក្នុងការជ្រើសរើសមាគ៌ាអភិវឌ្ឍន៍ផ្ទាល់ខ្លួនរបស់ពួកគេ ក៏ដូចជាការកែទម្រង់ប្រព័ន្ធអភិបាលកិច្ចនយោបាយ និងហិរញ្ញវត្ថុ-សេដ្ឋកិច្ចសកលជាដើម។

កិច្ចប្រជុំ BRICS នៅទីក្រុងST. PETERSBURG នៅថ្ងៃទី១២ខែកញ្ញា។ TASS

អ្នករៀបចំកិច្ចប្រជុំនេះចាត់ទុកថាកិច្ចប្រជុំមានសារៈសំខាន់ «ចំពេលមានការប្រឈមមុខដាក់គ្នាកាន់តែធ្ងន់ធ្ងរ និងភាពមិនអាចទាយទុកជាមុនបានក្នុងកិច្ចការពិភពលោក ស្ថានភាពកាន់តែអាក្រក់នៅក្នុងវិស័យសេដ្ឋកិច្ច និងហិរញ្ញវត្ថុពិភពលោក និងការបង្កើនឧបសគ្គនៅលើផ្លូវឆ្ពោះទៅរកការសម្រេចបាននូវគោលដៅនៃការអភិវឌ្ឍន៍ប្រកបដោយចីរភាព»។

ចាប់តាំងពីសង្គ្រាមនៅអ៊ុយក្រែនបានផ្ទុះឡើង រុស្ស៊ីបានរងទណ្ឌកម្មយ៉ាងធ្ងន់ធ្ងរពីសំណាក់បច្ចឹមប្រទេស ដោយការបង្កកប្រាក់រាប់ពាន់លានដុល្លារ និងការដាក់ទណ្ឌកម្មលើវិស័យសេដ្ឋកិច្ចរុស្ស៊ី។ រុស្ស៊ីបានប្រើប្រាស់វេទិកា BRICS សម្រាប់កៀរគការគាំទ្រពីប្រទេសនានាដែលមិនចំណុះឲ្យសហរដ្ឋអាមេរិក និងអឺរ៉ុប។

សមាគម BRIC បានបើកកិច្ចប្រជុំកំពូលដំបូងក្នុងឆ្នាំ ២០០៩ ហើយ ១ឆ្នាំក្រោយមក ពោលគឺឆ្នាំ ២០១០ ប្រទេសអាហ្វ្រិកខាងត្បូង បានចូលរួមជាមួយក្រុមនេះ ហើយវាត្រូវបានគេសរសេរកាត់ថា «BRICS»។ នេះបើយោងតាម brics2021.gov.in។ បច្ចុប្បន្ននេះមានប្រទេសមួយចំនួនបានស្នើពាក្យចូលជាសមាជិករបស់ BRICS ដែលបង្កើតឱកាសឱ្យរុស្ស៊ីប្រឆាំងនិងលោកខាងលិចកាន់តែស្មើមុខស្មើមាត់៕

ដោយ រ៉ាន់ រើយ