ព័ត៌មានអន្ដរជាតិ

រុស្ស៊ី ផលិតដ្រូនវាយប្រហាររយៈចម្ងាយឆ្ងាយ ដោយប្រើម៉ាស៊ីនរបស់ចិន

បានផុស

៥ ខែ មុន

នៅ

ថ្ងៃសៅរ៍ ១៤ កញ្ញា ២០២៤

ដោយ

Chheang

ប្រទេសរុស្ស៊ីបានផលិតដ្រូនវាយប្រហាររយៈចម្ងាយឆ្ងាយថ្មី ដែលមានឈ្មោះថា Garpiya-A1 ដោយដំណើរការផលិតចាប់ផ្ដើមតាំងពីឆ្នាំមុនមកម៉្លេះ ហើយប្រើម៉ាស៊ីននិងគ្រឿងបន្លាស់របស់ចិន ដែលខ្លួនបានដាក់ពង្រាយក្នុងសង្រ្គាមនៅអ៊ុយក្រែន។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃសៅរ៍ទី១៤ខែកញ្ញា ដែលដកស្រង់ចេញពីប្រភពចំនួន២ និងឯកសារពីទីភ្នាក់ងារស៊ើបការណ៍អឺរ៉ុប។

ដ្រូនរបស់រុស្ស៊ីដែលធ្លាក់នៅអ៊ុយក្រែន (រូបភាព៖ រដ្ឋាភិបាលអ៊ុយក្រែន)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពរបស់ Reuters បានបង្ហាញថា IEMZ Kupol ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតសព្វាវុធរបស់រដ្ឋរុស្ស៊ី Almaz-Antey ផលិតដ្រូន Garpiyas បានជាង២៥០០គ្រឿង ចាប់ពីខែកក្កដាឆ្នាំ២០២៣ ដល់ខែកក្កដាឆ្នាំ២០២៤។

វត្តមាននៃដ្រូនថ្មីរបស់រុស្សី ដែលមានបញ្ចូលបច្ចេកវិទ្យាចិន មិនធ្លាប់ត្រូវបានគេរាយការណ៍ពីមុនទេ។ ពាក់ព័ន្ធនឹងព័ត៌មាននេះ ក្រុមហ៊ុន IEMZ Kupol និងក្រុមហ៊ុន Almaz-Antey មិនឆ្លើយតបទៅនឹងសំណើសុំការអត្ថាធិប្បាយឡើយ។

ប្រភពស៊ើបការណ៍សម្ងាត់ទាំង២ ដែល Reuters បានចុះផ្សាយ បាននិយាយថា ដ្រូន Garpiya ត្រូវបានដាក់ពង្រាយប្រឆាំងនឹងគោលដៅយោធា និងជនស៊ីវិលក្នុងប្រទេសអ៊ុយក្រែន ដែលបណ្តាលឲ្យខូចខាតដល់ហេដ្ឋារចនាសម្ព័ន្ធសំខាន់ៗ ក៏ដូចជាមានការរងរបួសនិងស្លាប់ទាំងជនស៊ីវិល និងយោធា។

លោក Samuel Bendett ដែលជាអ្នកជំនួយការជាន់ខ្ពស់នៅមជ្ឈមណ្ឌលសម្រាប់សន្តិសុខអាមេរិកថ្មីមានមូលដ្ឋាននៅទីក្រុងវ៉ាស៊ីនតោន ឌីស៊ី បានប្រាប់ Reuters ថា បើដ្រូន Garpiya ពិតជាប្រើប្រាស់គ្រឿងម៉ាស៊ីនរបស់ចិន នោះវានឹងបង្ហាញថារុស្ស៊ីនឹងឈប់ពឹងផ្អែកលើអ៊ីរ៉ង់សម្រាប់ដ្រូនរយៈចម្ងាយឆ្ងាយរបស់ខ្លួន ដោយផ្ដោតលើការអភិវឌ្ឍក្នុងស្រុកវិញម្ដង។

លោក Bendett បានរៀបរាប់ថា៖ «ប្រសិនបើរឿងនេះកើតឡើង វាអាចបង្ហាញថារុស្ស៊ីឥឡូវនេះអាចពឹងផ្អែកលើការអភិវឌ្ឍក្នុងស្រុក ក៏ដូចជាជាក់ស្ដែងណាស់ពឹងផ្អែកលើប្រទេសចិន ដោយសារភាគីទាំងសងខាងនៅក្នុងសង្រ្គាមនេះពឹងផ្អែកលើសមាសធាតុចិនជាច្រើនសម្រាប់ការផលិតដ្រូន»។

ប្រធានាធិបតីអ៊ុយក្រែនលោក Volodymyr Zelenskiy បាននិយាយកាលពីខែឧសភាឆ្នាំមុនថា ប្រទេសអ៊ីរ៉ង់បានផ្គត់ផ្គង់ដ្រូន Shahed “kamikaze” ជាង១ពាន់គ្រឿងដល់ប្រទេសរុស្ស៊ី ចាប់តាំងពីការលុកលុយក្នុងខែកុម្ភៈឆ្នាំ២០២២។

ដ្រូនទាំងនោះត្រូវបានប្រើដើម្បីវាយប្រហារកងការពារដែនអាកាសរបស់អ៊ុយក្រែន និងវាយលុកហេដ្ឋារចនាសម្ព័ន្ធដែលស្ថិតនៅចម្ងាយឆ្ងាយពីជួរមុខ។ យ៉ាងណា អ៊ីរ៉ង់បានបដិសេធម្តងហើយម្តងទៀតថាមិនបានបញ្ជូនដ្រូនទៅរុស្ស៊ី ដើម្បីប្រើនៅអ៊ុយក្រែននោះឡើយ។

ក្រសួងការពារជាតិរុស្ស៊ីមិនបានឆ្លើយតបនឹងសំណើសុំការអត្ថាធិប្បាយសម្រាប់រឿងនេះទេ។ ចំណែកក្រសួងការបរទេសចិនបាននិយាយនៅក្នុងសេចក្តីថ្លែងការណ៍មួយទៅកាន់ Reuters ថា ទីក្រុងប៉េកាំងគ្រប់គ្រងយ៉ាងតឹងរ៉ឹងនូវការនាំចេញរបស់របរដែលមានសក្តានុពលផ្នែកយោធា រួមទាំងដ្រូនផងដែរ។

សេចក្តីថ្លែងការណ៍នោះបានឲ្យដឹងថា៖ «ទាក់ទងទៅនឹងវិបត្តិអ៊ុយក្រែន ប្រទេសចិនតែងតែប្តេជ្ញាចិត្តក្នុងការលើកកម្ពស់កិច្ចចរចាសន្តិភាព និងការដោះស្រាយនយោបាយ»។ យ៉ាងណា ចិនបានសង្កត់ធ្ងន់ថាមិនមានការរឹតបន្តឹងជាអន្តរជាតិលើការជួញដូរពាណិជ្ជកម្មរវាងចិននិងរុស្ស៊ីនោះទេ៕

ដោយ៖ ឈាង