ជា​រឿង​កម្រ! របប​សឹក​មីយ៉ាន់ម៉ា ស្នើ​សុំ​ជំនួយ​បរទេស ដើម្បីដោះស្រាយ​គ្រោះ​ទឹក​ជំនន់

ប្រមុខរបបសឹកមីយ៉ាន់ម៉ា បានធ្វើសំណើដ៏កម្រមួយ​នៅ​ថ្ងៃសៅរ៍​នេះ សម្រាប់ជំនួយបរទេស ដើម្បីទប់ទល់នឹង​គ្រោះ​ទឹកជំនន់ដ៏ធ្ងន់ធ្ងរ ដែលបានជម្លៀសប្រជាជនរាប់សិប​ម៉ឺន​នាក់។

ទឹកជំនន់ និង​​បំណាក់​ដី បានសម្លាប់មនុស្សជិត ៣០០​នាក់នៅមីយ៉ាន់ម៉ា វៀតណាម ឡាវ និងថៃ បន្ទាប់ពីព្យុះទីហ្វុង​យ៉ាកជី បាន​បង្ក​ឲ្យ​​មានភ្លៀងធ្លាក់​យ៉ាង​ខ្លាំងគិត​ចាប់​តាំង​ពី​​ចុងសប្តាហ៍មុន។

នៅក្នុងប្រទេស​មីយ៉ាន់ម៉ា មនុស្សជាង ២៣៥ ០០០​នាក់​ត្រូវបានបង្ខំឲ្យចាកចេញពីផ្ទះ​សម្បែង​របស់ពួកគេដោយសារ​ទឹកជំនន់ ដែល​ជា​​ការ​រង​គ្រោះ​ដ៏​អាក្រក់​​ត្រួត​ពី​លើ​សង្រ្គាម​ដែល​បានផ្ទុះឡើងចាប់តាំងពីយោធាបានដណ្តើមអំណាចនៅឆ្នាំ​២០២១។

យោងតាមកាសែត Global New Light of Myanmar លោក Min Aung Hlaing ប្រមុខ​របបសឹក បាននិយាយកាលពីថ្ងៃសុក្រថា៖ «មន្ត្រីរដ្ឋាភិបាលចាំបាច់ត្រូវទាក់ទងជាមួយបរទេសដើម្បីទទួលបានជំនួយ និង​ការ​សង្គ្រោះ ដើម្បី​ផ្តល់ជូនជនរងគ្រោះ»។

លោក​​បន្ត​ថា​៖ «​វា​ចាំបាច់​ក្នុង​ការ​គ្រប់​គ្រង​វិធានការ​ជួយ​សង្គ្រោះ ជំនួយ និង​ការ​ស្តារ​នីតិសម្បទា​ឲ្យ​បាន​លឿន​តាម​ដែល​អាច​ធ្វើ​ទៅ​បាន»។

របបសឹក​បាន​រាយការណ៍​​កាល​ពី​ថ្ងៃ​សុក្រ​​អំពី​​តួលេខ​អ្នកស្លាប់​ចំនួន​៣៣​នាក់ ប៉ុន្តែ​បើ​តាមនាយកដ្ឋានពន្លត់អគ្គិភ័យរបស់​មីយ៉ាន់ម៉ា​វិញ បានប្រាប់​ថា ក្រុមអ្នកជួយសង្គ្រោះបានរកឃើញសាកសពចំនួន​៣៦​នាក់។

អ្នកនាំពាក្យ​របប​សឹក បានប្រកាស​ថា ខ្លួនបានបាត់បង់ទំនាក់ទំនងជាមួយតំបន់មួយចំនួន ហើយកំពុងស៊ើបអង្កេតរបាយការណ៍ដែលថាមនុស្សរាប់សិបនាក់ត្រូវបានកប់នៅក្នុង​ហេតុការណ៍​បំណាក់​ដីនៅកន្លែង​ជីកយករ៉ែមាស​​នៃ​តំបន់ Mandalay។

សូម​បញ្ជាក់​ថា កាល​ពី​មុន របប​សឹក​យោធាមីយ៉ាន់ម៉ា​បានរារាំង ឬ​បិទ​មិន​ឲ្យ​មាន​ជំនួយមនុស្សធម៌ពីបរទេស​ឡើយ។ ​តួ​យ៉ាង​ដូចជា​នៅ​ឆ្នាំ​២០២៣ របប​សឹក​បាន​ផ្អាក​​ការ​ធ្វើ​ដំណើរ​សម្រាប់​ក្រុម​ជំនួយ​ដែល​ព្យាយាម​​ជួយ​ដល់​​ពលរដ្ឋ​ប្រហែល​១​លាន​នាក់រង​គ្រោះ​ដោយសារ​​ព្យុះ​ស៊ីក្លូន Mocha ដែល​បាន​បោកបក់​នៅ​ភាគ​ខាង​លិច​ប្រទេស៕

ដោយ៖ ឈាង