ព័ត៌មានអន្ដរជាតិ

អង់គ្លេសទំនងអនុញ្ញាតឲ្យអ៊ុយក្រែនប្រើមីស៊ីលចម្ងាយឆ្ងាយបាញ់ចូលរុស្ស៊ី

បានផុស

១ សប្តាហ៍ មុន

នៅ

ថ្ងៃអាទិត្យ ១៥ កញ្ញា ២០២៤

ដោយ

នាយករដ្ឋមន្ត្រីអង់គ្លេសលោក Keir Starmer ត្រូវបានជំរុញដោយអតីតរដ្ឋមន្ត្រីការពារជាតិ និងអតីតនាយករដ្ឋមន្ត្រី ដើម្បីអនុញ្ញាតឱ្យអ៊ុយក្រែនប្រើប្រាស់មីស៊ីលរយៈចម្ងាយឆ្ងាយនៅក្នុងទឹកដីរុស្ស៊ី ស្របពេលដែលជំហរដូចគ្នានេះត្រូវបានព្រលយដោយប្រធានាធិបតីសហរដ្ឋអាមេរិក។ យោង កាសែត The Sunday Times រាយការណ៍កាលពីថ្ងៃសៅរ៍។

នាយករដ្ឋមន្ត្រីអង់គ្លេសលោក Keir Starmer ជួបពិភាក្សាជាមួយ លោក ចូ បៃដិន កាលថ្ងៃសុក្រ។ FB/Keir Starer

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមកាសែត Sunday Times ការអំពាវនាវនេះបានមកពីអតីតរដ្ឋមន្ត្រីការពារជាតិមកពីគណបក្សអភិរក្សចំនួនប្រាំរូប រួមមានលោក Grant Shapps, Ben Wallace, Gavin Williamson, Penny Mordaunt និង Liam Fox ក៏ដូចជាពីអតីតនាយករដ្ឋមន្ត្រី Boris Johnson។

កាសែត Sunday Times បានរាយការណ៍ថា រដ្ឋមន្រ្តីទាំងនោះបានផ្តល់ការព្រមានដល់ នាយករដ្ឋមន្ត្រីអង់គ្លេសថ្មី លោក Starmer ថា៖«ការពន្យារពេលណាមួយបន្ថែមទៀតនឹងធ្វើឱ្យប្រធានាធិបតីពូទីនមានប្រៀបកាន់តែខ្លាំង»។

ប្រធានាធិបតីអ៊ុយក្រែន លោក Volodymyr Zelenskiy បានអង្វរកសម្ព័ន្ធមិត្តជាច្រើនខែកន្លងមកហើយ ដើម្បីអនុញ្ញាតឱ្យអ៊ុយក្រែនបាញ់មីស៊ីលលោកខាងលិច រួមទាំង ATACMS រយៈចម្ងាយឆ្ងាយរបស់សហរដ្ឋអាមេរិក និងមីស៊ីលល្បឿនលឿនជាងសំឡេង (Storm Shadow) របស់ចក្រភពអង់គ្លេស ចូលទៅក្នុងប្រទេសរុស្ស៊ីដើម្បីបង្អាក់សមត្ថភាពវាយប្រហាររបស់ទីក្រុងមូស្គូមកលើប្រទេសអ៊ុយក្រែន។

នាយករដ្ឋមន្ត្រីអង់គ្លេសលោក Starmer និងប្រធានាធិបតីសហរដ្ឋអាមេរិក Joe Biden បានជួបពិភាក្សាគ្នានៅទីក្រុងវ៉ាស៊ីនតោនកាលពីថ្ងៃសុក្រ ថាតើត្រូវអនុញ្ញាតឱ្យទីក្រុងកៀវ ប្រើប្រាស់មីស៊ីលរយៈចម្ងាយឆ្ងាយប្រឆាំងនឹងគោលដៅនៅក្នុងប្រទេសរុស្ស៊ីដែរឬទេ។

រហូតមកដល់ពេលនោះ មិនទាន់មានការផ្សាយណាមួយបង្ហាញថា ប្រមុខប្រទេសមហាអំណាចទាំងពីរ បានសម្រេចចិត្តនៅឡើយ ប៉ុន្តែពួកគេបានព្រលយរួចជាសម្រេចអំពីលទ្ធភាពនៃការអនុញ្ញាតឱ្យអ៊ុយក្រែនប្រើប្រាស់ ស្របពេលអ៊ុយក្រែនមានភាពក្លាយហានវាយចូលទឹកដីរុស្ស៊ីកាន់តែជ្រៅដើម្បីបង្កើនតំបន់ទ្រនាប់ការពារ។

យោងការផ្សាយរបស់រ៉យទ័រ មន្ត្រីអាមេរិកមួយចំនួនមានការងឿងឆ្ងល់យ៉ាងខ្លាំងថា ការអនុញ្ញាតឱ្យមានការប្រើប្រាស់កាំជ្រួចបែបនេះនឹងធ្វើឱ្យមានភាពខុសប្លែកគ្នាយ៉ាងខ្លាំងនៅក្នុងការប្រយុទ្ធរបស់ទីក្រុងកៀវ ប្រឆាំងនឹងការឈ្លានពានរបស់រុស្ស៊ី។

ប្រធានាធិបតី វ្ល៉ាឌីមៀ ពូទីន បាននិយាយថា លោកខាងលិចនឹងវាយប្រហាររុស្ស៊ីដោយផ្ទាល់ ប្រសិនបើអនុញ្ញាតឱ្យអ៊ុយក្រែនវាយប្រហារដោយមីស៊ីលរយៈចម្ងាយឆ្ងាយផលិតដោយលោកខាងលិចនោះ៕

ដោយ រ៉ាន់ រើយ