ពូទីន បញ្ជាឲ្យរុស្ស៊ីពង្រីកកម្លាំងទ័ពសកម្ម ១.៥លាននាក់ ឡើងឈរលេខ២លើលោក

តាមការចុះផ្សាយរបស់ RT កាលពីថ្ងៃចន្ទទី១៦ខែកញ្ញាឆ្នាំ២០២៤ ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានចុះហត្ថលេខាលើក្រឹត្យមួយ ដោយបញ្ជាឲ្យបង្កើនកងកម្លាំងប្រដាប់អាវុធដល់ទៅ ២ ៣៨៩ ១៣០នាក់ ហើយក្នុងនោះក៏មានរួមមានទាំងទាហានសកម្មចំនួន១.៥លាននាក់ផងដែរ ធ្វើឲ្យរុស្ស៊ី ឡើងឈរលេខ២នៅពីក្រោយចិន ក្នុងនាមជាប្រទេសមានទាហានសកម្មច្រើនជាងគេលើពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ លោកពូទីន ក៏បញ្ជាឲ្យរដ្ឋាភិបាល បញ្ចេញកញ្ចប់ថវិកាបន្ទាន់ដល់ក្រសួងការពារជាតិផងដែរ ដើម្បីបើកយុទ្ធនាការរើសទាហាននេះ។

ចាប់តាំងពីឆ្នាំ២០២២មក លោក ពូទីន បានចេញបញ្ជាឲ្យបង្កើនទំហំទាហានសកម្មចំនួន២លើករួចមកហើយ ដោយលើកទីមួយមួយបង្កើន ១៣៧ ០០០នាក់ និងលើកទីពីរ ១៧០ ០០០នាក់។

ជុំវិញការកែនទាហានលើកមុន អ្នកនាំពាក្យវិមានក្រឹមឡាំង លោក Dmitry Peskov ពន្យល់ថា សកម្មភាពបែបនេះ គឺដោយសារតែសង្រ្គាមខ្ចីដៃ ដែលលោកខាងលិច យកអ៊ុយក្រែន មកប្រយុទ្ធជាមួយទីក្រុងមូស្គូ។

ទន្ទឹមនោះ ក្រសួងការពារជាតិរុស្ស៊ីក៏បញ្ជាក់ដែរថា ការរើសទ័ពគឺមិនមានការបង្ខិតបង្ខំអ្វីទេ សំខាន់ឲ្យតែពលរដ្ឋស្ម័គ្រចិត្តនិងមានកិច្ចសន្យាត្រឹមត្រូវ។ ក្រសួងក៏បញ្ជាក់ដែរថា ការសម្រេចចិត្តពង្រីកទំហំកងកម្លាំង គឺដោយសារតែណាតូគំរាមកំហែងខ្លាំងពេក ជាពិសេសសមាជិកនៃប្លុកដែលដឹកនាំដោយសហរដ្ឋអាមេរិកមួយនេះ បានចល័តទ័ពនៅតាមព្រំដែនរុស្ស៊ី ដាក់ពង្រាយប្រព័ន្ធការពារដែនអាកាសបន្ថែម និងអាវុធវាយប្រហារ ច្រើនឡើងៗ៕

អត្ថបទ៖ សុខ សុវណ្ណ

ចុចអាន៖ ពូទីន​៖ សង្គ្រាម​ជាមួយ​លោក​ខាង​លិច​នឹង​ផ្ទុះ​ បើ​ហ៊ាន​ឲ្យ​អ៊ុយក្រែន​ប្រើ​មីស៊ីល​ចម្ងាយ​ឆ្ងាយ