ព័ត៌មានអន្ដរជាតិ

អាល្លឺម៉ង់ ត្រៀមជំនួយ១១១លានដុល្លារឲ្យអ៊ុយក្រែន ក្នុងរដូវរងាខាងមុខ

បានផុស

៥ ខែ មុន

នៅ

ថ្ងៃអង្គារ ១៧ កញ្ញា ២០២៤

ដោយ

Chheang

អាល្លឺម៉ង់ នឹងផ្តល់ជំនួយបន្ថែមចំនួន ១១១លានដុល្លារ សម្រាប់អ៊ុយក្រែនក្នុងរដូវរងាខាងមុខ។ នេះបើតាមការប្រកាសរបស់រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock ក្នុងអំឡុងដំណើរទស្សនកិច្ចទៅកាន់ប្រទេសម៉ុលដាវី នៅថ្ងៃអង្គារទី១៧ខែកញ្ញា។

រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock (រូបភាព៖ dpa)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Baerbock បាននិយាយក្នុងសន្និសីទថ្នាក់រដ្ឋមន្ត្រីនៅទីក្រុង Chisinau ថា ប្រទេសរុស្ស៊ីកំពុងរៀបចំផែនការ «សង្រ្គាមរដូវរងាម្តងទៀត ក្នុងគោលបំណងធ្វើឲ្យជីវិតប្រជាជនក្នុងប្រទេសអ៊ុយក្រែនកាន់តែអាក្រក់តាមដែលអាចធ្វើទៅបាន»។

រុស្ស៊ី បានវាយប្រហារជាច្រើនទៅលើហេដ្ឋារចនាសម្ព័ន្ធថាមពលរបស់អ៊ុយក្រែន ដែលបណ្តាលឲ្យមានការដាច់ចរន្តអគ្គិសនីនៅក្នុងផ្នែកខ្លះនៃប្រទេស។

កាលពីខែមិថុនា អ៊ុយក្រែន បានប្រកាសថា ការការពារដែនអាកាសបន្ថែមទៀតគឺចាំបាច់ ដើម្បីអនុញ្ញាតឲ្យខ្លួនមានពេលធ្វើការជួសជុលហេដ្ឋារចនាសម្ព័ន្ធទាំងនោះ ដើម្បីធានាបាននូវតម្រូវការរបស់ប្រជាជនសម្រាប់រដូវរងា ដែលជាពេលមានការប្រើប្រាស់ថាមពលខ្ពស់បំផុត ខណៈសីតុណ្ហភាពធ្លាក់ចុះក្រោមសូន្យ។

រុស្ស៊ីបានឈ្លានពានអ៊ុយក្រែនក្នុងឆ្នាំ២០២២ ដែលបង្កឲ្យមានការប្រឈមមុខដាក់គ្នាដ៏ធំបំផុតរវាងរុស្ស៊ី និងសម្ព័ន្ធមិត្តរបស់អ៊ុយក្រែនគឺលោកខាងលិច គិតចាប់តាំងពីសម័យសង្គ្រាមត្រជាក់។

លោកខាងលិច និងអ៊ុយក្រែនពណ៌នាការឈ្លានពានរបស់រុស្ស៊ីថាជាការដណ្តើមយកទឹកដីតាមបែបចក្រពត្តិ ហើយបានប្តេជ្ញាថានឹងកម្ចាត់រុស្ស៊ីឲ្យបាននៅលើសមរភូមិ។ បច្ចុប្បន្នរុស្ស៊ីគ្រប់គ្រងបាន១៨%នៃទឹកដីអ៊ុយក្រែន៕

ដោយ៖ ឈាង