ព័ត៌មានអន្ដរជាតិ

ភ្នាក់ងារប្រឆាំងពុករលួយឥណ្ឌូណេស៊ីកោះហៅកូនប្រុសប្រធានាធិបតី ក្រោយប្រើយន្តហោះឯកជន

បានផុស

៥៩ វិនាទី មុន

នៅ

ថ្ងៃអង្គារ ១៧ កញ្ញា ២០២៤

ដោយ

ទីភ្នាក់ងារប្រឆាំងអំពើពុករលួយរបស់ប្រទេសឥណ្ឌូណេស៊ី (KPK) បានកោះហៅកូនប្រុសរបស់ប្រធានាធិបតីឥណ្ឌូណេស៊ី លោក Joko Widodo ជុំវិញការចោទប្រកាន់ប្រព្រឹត្តខុសពាក់ព័ន្ធពុករលួយដោយសារការប្រើប្រាស់យន្តហោះឯកជនក្នុងការធ្វើដំណើរ។

លោក Kaesang Pangarep កូនប្រុសប្រធានាធិបតីឥណ្ឌូណេស៊ី Jokowi។ រូបភាព liputan6

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីមានការសាកសួរដោយភ្នាក់ងារប្រឆាំងអំពើពុករលួយ លោក Kaesang Pangarep កូនប្រុសរបស់ប្រធានាធិបតី Joko Widodo បានច្រានចោលការចោទប្រកាន់ពីបទប្រព្រឹត្តខុសលើការប្រើប្រាស់យន្តហោះឯកជនក្នុងការធ្វើដំណើរទៅក្រៅប្រទេសនាពេលថ្មីៗនេះ។

យោងសារព័ត៌មាន The Straits Times លោក Kaesang បានធ្វើដំណើរទៅកាន់ការិយាល័យរបស់ទីភ្នាក់ងារប្រឆាំងអំពើពុករលួយរបស់ប្រទេសឥណ្ឌូណេស៊ីដែលគេស្គាល់ថា KPK កាលពីថ្ងៃទី១៧ខែកញ្ញា ដើម្បីបំភ្លឺថា មុនដំបូង លោកមានផែនការជិះហោះហើរពាណិជ្ជកម្មទៅកាន់សហរដ្ឋអាមេរិកក្នុងខែសីហា ប៉ុន្តែបានសម្រេចចិត្ត «ដើរលេង» ជាមួយមិត្តម្នាក់។

គាត់បាននិយាយនៅក្នុងសេចក្តីថ្លែងការណ៍មួយថា៖«ការធ្វើដំណើររបស់ខ្ញុំទៅកាន់សហរដ្ឋអាមេរិកគឺតាមយន្តហោះរបស់មិត្តខ្ញុំ (យន្តហោះឯកជន)»។ លោកមិនបានផ្តល់ព័ត៌មានលម្អិតបន្ថែមអំពីអត្តសញ្ញាណម្ចាស់យន្តហោះដែលជាមិត្តរបស់លោកនោះទេ។

តាមការចុះផ្សាយដដែល អ្នកនយោបាយវ័យក្មេងរូបនេះបានធ្វើដំណើរជាមួយប្រពន្ធរបស់គាត់កាលពីខែសីហា ខណៈដែលការប្រមូលផ្តុំតវ៉ាដ៏ខ្លាំងក្លាបានផ្ទុះឡើងនៅក្នុងប្រទេសឥណ្ឌូណេស៊ី ដោយបានរារំាងដោយជោគជ័យនូវការផ្លាស់ប្តូរច្បាប់បោះឆ្នោតដែលនឹងអនុញ្ញាតឱ្យលោក Kaesang ចូលរួមក្នុងការប្រកួតប្រជែងតំណែងអភិបាលក្រុង។

ភ្នាក់ងារប្រឆាំងពុករលួយ KPK បានកោះហៅ លោក Kaesang នៅចុងខែសីហា ជុំវិញការប្រើប្រាស់យន្តហោះឯកជនរបស់គាត់ ដែលក្រោយមកលុបចោលការបញ្ជាទិញ បន្ទាប់ពីពីរបីថ្ងៃ។ នេះបើយោងតាមរបាយការណ៍ប្រព័ន្ធផ្សព្វផ្សាយក្នុងស្រុកដែលនិយាយថា ការពិនិត្យស្រដៀងគ្នានេះកំពុងដំណើរការនៅក្នុងផ្នែកមួយផ្សេងទៀតនៃទីភ្នាក់ងារនេះ។

លោក Kaesang បាននិយាយនៅថ្ងៃទី១៧ខែកញ្ញាថា ដំណើររបស់លោកទៅកាន់ KPK គឺមានបំណងបង្ហាញជាទង្វើនៃតម្លាភាពនិងសុជីវធម៌ដែលជា «គំនិតផ្តួចផ្តើមផ្ទាល់ខ្លួនក្នុងនាមជាពលរដ្ឋល្អហើយមិនមែនដោយសារតែដីកាការកោះហៅជាលាយលក្ខណ៍អក្សរទេ»។

ស្ថាប័នប្រឆាំងអំពើពុករលួយបានបដិសេធការចោទប្រកាន់អំពីការអន្តរាគមន៍ពីលោក Widodo ដែលត្រូវបានគេស្គាល់ជាទូទៅថា Jokowi។

ប្រធានាធិបតីឥណ្ឌូណេស៊ីជិតផុតអាណត្តិ Joko Widodo។ រូបភាព Anadolu

កូនប្រុសម្នាក់ទៀតរបស់លោក Widodo គឺអនុប្រធានាធិបតីជាប់ឆ្នោត Gibran Rakabuming Raka បានមកការពារប្អូនប្រុសរបស់គាត់មុននេះ។

លោក Gibran បានបដិសេធរបាយការណ៍ប្រព័ន្ធផ្សព្វផ្សាយដែលថាយន្តហោះឯកជននេះត្រូវបានខ្ចីដោយក្រុមហ៊ុន e-commerce របស់ Sea Ltd Shopee ដែលបានបណ្តាក់ទុននៅក្នុងទីក្រុង Solo ជាកន្លែងដែលគាត់ធ្លាប់ជាអភិបាលក្រុងពីមុន៕

ដោយ រ៉ាន់ រើយ