ត្រឹម​១​សប្ដាហ៍ កូរ៉េ​ខាងជើង​បាញ់​សាកល្បង​មីស៊ីល​ចំនួន​២​លើក

កូរ៉េខាងជើងបានបាញ់មីស៊ីល​ប៉ាលិស្ទិក​រយៈចម្ងាយខ្លីជាច្រើនគ្រាប់​នៅ​ថ្ងៃពុធ​នេះ ដែលបានធ្លាក់​ចូល​ឆ្នេរសមុទ្រភាគខាងកើត​​នៃ​ប្រទេស​របស់​ខ្លួន។ ការ​បាញ់​សាកល្បង​នេះ ធ្វើ​ឡើង​​ប៉ុន្មានថ្ងៃបន្ទាប់ពីទីក្រុងព្យុងយ៉ាង​បានបង្ហាញ​ពី​រោងចក្រ​​ចម្រាញ់សារធាតុអ៊ុយរ៉ានីញ៉ូម និងបានប្តេជ្ញាថានឹងបង្កើនឃ្លាំងអាវុធនុយក្លេអ៊ែររបស់ខ្លួន។

អគ្គសេនាធិការចម្រុះរបស់កូរ៉េខាងត្បូង (JCS) បាននិយាយថា មីស៊ីល​ត្រូវ​បាន​បាញ់ចេញពី​ទីក្រុង Kaechon ភាគខាងជើងនៃរដ្ឋធានីព្យុងយ៉ាង នៅម៉ោងប្រហែល ៦​និង​៥០​​ព្រឹក ក្នុងទិសដៅ​ទៅ​ភាគឦសាន តែ​មិនបានបញ្ជាក់​អំពី​ចំនួន​​គ្រាប់​​ដែល​បាញ់នោះទេ។

JCS បានរៀបរាប់​នៅក្នុងសេចក្តីថ្លែងការណ៍មួយថា៖ «យោធារបស់យើងកំពុងរក្សាជំហរត្រៀមខ្លួនពេញលេញ ខណៈពេលដែលពង្រឹងការឃ្លាំមើល និងការប្រុងប្រយ័ត្នក្នុងការរៀបចំសម្រាប់ការបាញ់បន្ថែម និងការចែករំលែកព័ត៌មានយ៉ាងជិតស្និទ្ធជាមួយភាគីអាមេរិក និងជប៉ុន»។

ទីបញ្ជាការឥណ្ឌូប៉ាស៊ីហ្វិករបស់អាមេរិក បាននិយាយនៅលើ​បណ្ដាញ​សង្គម​ X ថា ខ្លួន​បាន​ដឹងពីការបាញ់​មីស៊ីល​​របស់​កូរ៉េ​ខាង​ជើង និងពិគ្រោះយោបល់យ៉ាងជិតស្និទ្ធជាមួយទីក្រុងសេអ៊ូល និង​ទីក្រុង​តូក្យូ។

កូរ៉េខាងជើង បានបាញ់មីស៊ីល​ប៉ាលិស្ទិក​រយៈចម្ងាយខ្លីជាច្រើនគ្រាប់ កាលពីថ្ងៃព្រហស្បតិ៍សប្តាហ៍មុន ដែលជាការបាញ់លើកដំបូងក្នុងរយៈពេលជាង២​ខែ ហើយ​ក៏​​ជាការសាកល្បងប្រព័ន្ធគ្រាប់រ៉ុកកែត​​ប្រភេទថ្មី 600mm។

JCS របស់កូរ៉េខាងត្បូង បាននិយាយ​ទៀត​ថា ការបាញ់នេះអាចជាការសាកល្បងអាវុធសម្រាប់នាំចេញទៅកាន់ប្រទេសរុស្ស៊ី ចំពេលមានការពង្រឹងកិច្ចសហប្រតិបត្តិការយោធារវាងប្រទេសទាំង២។

សហរដ្ឋអាមេរិក កូរ៉េខាងត្បូង និងអ៊ុយក្រែន ក្នុងចំណោមប្រទេសផ្សេងទៀត បានចោទប្រកាន់ទីក្រុងព្យុងយ៉ាងថាបានផ្គត់ផ្គង់គ្រាប់រ៉ុកកែត និងមីស៊ីលទៅកាន់ក្រុងមូស្គូ សម្រាប់ប្រើប្រាស់ក្នុងសង្គ្រាមនៅអ៊ុយក្រែន ជាថ្នូរនឹងជំនួយផ្នែកសេដ្ឋកិច្ច និងយោធាផ្សេងទៀត៕

ដោយ៖ ឈាង

ចុចអាន៖ ជា​លើក​ដំបូង! កូរ៉េ​ខាង​ជើង​បង្ហាញ​រូបភាព​ពី​ទីតាំង​រោងចក្រ​ចម្រាញ់​សារធាតុ​អ៊ុយរ៉ានីញ៉ូម