ព័ត៌មានអន្ដរជាតិ

ក្មេងៗ៦លាននាក់ កំពុងរងគ្រោះដោយសារព្យុះទីហ្វុងយ៉ាកជី

បានផុស

៤ ខែ មុន

នៅ

ថ្ងៃពុធ ១៨ កញ្ញា ២០២៤

ដោយ

Chheang

អង្គការសហប្រជាជាតិ បានប្រកាសនៅថ្ងៃទី១៨ខែកញ្ញាថា ទឹកជំនន់ និងបំណាក់ដីដែលបង្កឡើងដោយព្យុះទីហ្វុងយ៉ាកជី បានប៉ះពាល់ដល់កុមារជិត៦លាននាក់នៅទូទាំងអាស៊ីអាគ្នេយ៍ ខណៈចំនួនអ្នកស្លាប់ដោយសារគ្រោះមហន្តរាយកំពុងបន្តកើនឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះទីហ្វុងយ៉ាកជី បានបង្កឲ្យមានខ្យល់បក់បោក និងភ្លៀងធ្លាក់យ៉ាងខ្លាំងនៅប្រទេសវៀតណាម ថៃ ឡាវ និងមីយ៉ាន់ម៉ា កាលពីជិត២សប្តាហ៍មុន។

ប្រទេសថៃ បានរាយការណ៍ថាមានអ្នកស្លាប់ចំនួន៣នាក់ទៀតនៅថ្ងៃទី១៨ខែកញ្ញា ដែលធ្វើឲ្យចំនួនអ្នកស្លាប់នៅក្នុងប្រទេសឡើងដល់១៨នាក់ ខណៈនៅទូទាំងតំបន់រងគ្រោះទាំងអស់នៅអាស៊ីអាគ្នេយ៍មានអ្នកស្លាប់សរុបចំនួន៥៣៧នាក់។

អង្គការយូនីសេហ្វ (Unicef) បានបញ្ជាក់នៅក្នុងសេចក្តីថ្លែងការណ៍មួយថា កុមារចំនួន៦លាននាក់ត្រូវបានរងផលប៉ះពាល់ដោយសារព្យុះទីហ្វុងយ៉ាកជី បន្ទាប់ពីមានការខូចខាតប្រព័ន្ធទឹកស្អាត ការអប់រំ ការថែទាំសុខភាព អាហារ និងទីជម្រក។

អង្គការយូនីសេហ្វ បានបន្ថែមថា នៅក្នុងប្រទេសវៀតណាម មនុស្សប្រហែល៣លាននាក់កំពុងប្រឈមមុខនឹងហានិភ័យនៃជំងឺដោយសារតែកង្វះទឹកស្អាត និងអនាម័យ។

ដោយឡែក មនុស្សជិត ៤០ម៉ឺននាក់ត្រូវបានបង្ខំឲ្យចាកចេញពីផ្ទះសម្បែង ដោយសារគ្រោះទឹកជំនន់នៅក្នុងប្រទេសមីយ៉ាន់ម៉ា ដែលជាទុក្ខជាន់លើទុក្ខបន្ទាប់ពីភ្លើងសង្រ្គាមរយៈពេលជាង៣ឆ្នាំក្រោយការផ្ដួលរំលំរដ្ឋាភិបាលដោយរបបសឹកយោធា។

កម្មវិធីស្បៀងអាហារពិភពលោក បានប្រកាសនៅថ្ងៃពុធនេះថា ខ្លួននឹងចាប់ផ្តើមការឆ្លើយតបជាបន្ទាន់នៅក្នុងប្រទេសមីយ៉ាន់ម៉ាក្នុងសប្តាហ៍នេះ ដោយចែកចាយអាហារសង្គ្រោះបន្ទាន់រយៈពេល១ខែពេញដល់ប្រជាជនចំនួនកន្លះលាននាក់។

បម្រែបម្រួលអាកាសធាតុ និងការឡើងកម្ដៅនៃមហាសមុទ្រ ដែលបង្កដោយសកម្មភាពរបស់មនុស្ស កំពុងធ្វើឲ្យអាកាសធាតុកាន់តែអាក្រក់ឡើងៗ តួយ៉ាងដូចជាព្យុះទីហ្វុងយ៉ាកជីដែលឧស្សាហ៍កើតឡើងញឹកញាប់ និងកាន់តែធ្ងន់ធ្ងរទៅៗ៕

ដោយ៖ ឈាង