ថៃ ឲ្យអ្នកទេសចរធ្វើចត្តាឡីស័កលើទូកកម្សាន្តដើម្បីរកចំណូល

ឥឡូវនេះ​ អ្នកទេសចរដែលទៅលេងប្រទេសថៃ អាចចំណាយពេលធ្វើចត្តាឡីស័ករបស់ពួកគេរយៈពេល២សប្តាហ៍នៅលើទូកកម្សាន្ត។

រដ្ឋាភិបាលសង្ឃឹមថា ការផ្តួចផ្តើមគំនិតថ្មីនេះ នឹងនាំមកនូវប្រាក់ចំណូលចំនួន១.៨ពាន់លានបាត (៥៨លានដុល្លារ) ពីការធ្វើទេសចរណ៍ដោយជិះទូកកម្សាន្ត។

គំនិតនេះ មានគោលបំណងស្រោចស្រង់ឡើងវិញនូវឧស្សាហកម្មទេសចរណ៍របស់ប្រទេសថៃ ដែលកំពុងជួបការលំបាកដោយសារតែជំងឺរាតត្បាតកូវីដ១៩។

សេចក្តីប្រកាសកាលពីថ្ងៃចន្ទបានឲ្យដឹងថា កម្មវិធីទូកកម្សាន្តធ្វើចត្តាឡីស័កនេះ នឹងអនុញ្ញាតឲ្យអ្នកទេសចរដែលធ្វើតេស្តអវិជ្ជមានជំងឺកូវីដ១៩ ចំណាយពេលរបស់ពួកគេជិះទូកកម្សាន្តឬកប៉ាល់ទេសចរណ៍ខ្នាតតូចនៅក្នុងខេត្ត ភូកេត។

កម្មវិធីនេះ បានចាប់ផ្តើមទទួលយកអ្នកជិះទូក សម្រាប់ការធ្វើដំណើរសាកល្បងរួចទៅហើយ ហើយទូកប្រហែលជា១០០គ្រឿង ត្រូវបានគេរំពឹងថានឹងចូលរួម។

អ្នកធ្វើដំណើរ ត្រូវពាក់ខ្សែដៃឆ្លាតវៃដែលត្រួតពិនិត្យសញ្ញាសំខាន់ៗរួមមាន សីតុណ្ហភាពនិងសម្ពាធឈាម ក៏ដូចជាតាមដានទីតាំងរបស់អ្នកពាក់ តាមរយៈប្រព័ន្ធ GPS ផងដែរ។

រដ្ឋាភិបាលបាននិយាយថា ឧបករណ៍នេះអាចបញ្ជូនព័ត៌មានសូម្បីតែនៅសមុទ្រក្នុងរង្វង់ចម្ងាយ១០គីឡូម៉ែត្រក៏ដោយ។

ប្រទេសអាស៊ីអាគ្នេយ៍មួយនេះ ពឹងផ្អែកយ៉ាងខ្លាំងទៅលើវិស័យទេសចរណ៍ ប៉ុន្តែកាលពីឆ្នាំមុន បានហាមឃាត់ភ្ញៀវទេសចរដើម្បីទប់ស្កាត់ការរីករាលដាលនៃជំងឺកូវីដ១៩។

ជំងឺរាតត្បាតកូវីដ១៩បានធ្វើឲ្យចំនួនភ្ញៀវទេសចរនៅតាមតំបន់ទាក់ទាញពេញនិយម មានការធ្លាក់ចុះពី៤០,០០០នាក់ទៅ៥០,០០០នាក់ក្នុងមួយថ្ងៃ មកនៅត្រឹមតែរាប់រយនាក់ប៉ុណ្ណោះ។

កាលពីខែមករា ប្រទេសនេះបានប្រកាសពីគម្រោងមួយ ដែលអនុញ្ញាតឲ្យភ្ញៀវទេសចរចំណាយពេលធ្វើចត្តាឡីស័ករបស់ពួកគេនៅទីលានវាយកូនហ្គោល៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ លំអងផ្កា​ឬ​ភាគល្អិត​តូចៗ ​អាច​បង្កើន​អត្រា​ឆ្លង​កូវីដ​ខ្ពស់ ​ដល់​អ្នក​អាឡ័កស៊ី​​​ច្រមុះ

ចុចអាន៖ អ្នកឆ្លងកូវីដ បង្ហាញរោគសញ្ញាបែបនេះក្នុងរយ:ពេល៩ថ្ងៃដំបូង