មនុស្ស៦នាក់ស្លាប់​ក្នុង​ហេតុការណ៍​បាក់ដី​នៅម៉ិកស៊ិក

បំណាក់ដីដែលបង្កឡើងដោយភ្លៀងធ្លាក់ខ្លាំងបានសម្លាប់មនុស្ស៦នាក់នៅជិតទីក្រុងម៉ិកស៊ិក ខណៈប្រទេសនានានៅអឺរ៉ុបកណ្ដាលកំពុងទទូលរងនូវគ្រោះទឹកជំនន់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​APនៅថ្ងៃទី១៨ខែកញ្ញានេះ។

រដ្ឋាភិបាលម៉ិកស៊ិកបាននិយាយនៅក្នុងសេចក្តីថ្លែងការណ៍មួយថា បំណាក់ដីកាលពីយប់ថ្ងៃចន្ទនៅ Naucalpan ដែលជាសហគមន៍មួយនៅភាគពាយព្យនៃទីក្រុងម៉ិកស៊ិក បានប៉ះពាល់ដល់ផ្ទះ និងសាលារៀន ខណៈជន​រង​គ្រោះ​មាន​ប្រុស​៤​នាក់ ស្រី​២​នាក់។ ចំណែក​មនុស្ស​៣​នាក់​ទៀត​បាន​រង​របួស​ត្រូវបានបញ្ជូន​ទៅ​សង្គ្រោះ​នៅ​មន្ទីរពេទ្យ​រដ្ឋ ខណៈក្រុម​ជួយ​សង្គ្រោះ និងកងកម្លាំងសន្តិសុខ កំពុងត្រូវបានដាក់ពង្រាយដើម្បីជួយគ្រួសារដែលរងផលប៉ះពាល់។

ជាមួយគ្នានេះ ការស្លាប់នៅ Naucalpan បានកើតឡើងប៉ុន្មានថ្ងៃបន្ទាប់ពីការរអិលបាក់ដីមួយផ្សេងទៀតបានសម្លាប់មនុស្សប្រាំបួននាក់កាលពីថ្ងៃសៅរ៍នៅ Jilotzingo ភាគខាងលិចទីក្រុងម៉ិកស៊ិកក្នុងរដ្ឋម៉ិកស៊ិក ក្នុងនោះទារកអាយុ​៣ខែម្នាក់ ស្ថិតក្នុងចំណោមជនរងគ្រោះ។ ចំណែកកុមារពីរនាក់អាយុ ១០និង ១២ឆ្នាំនិងស្ត្រីអាយុ ៣៤ ឆ្នាំត្រូវបានជួយសង្គ្រោះ។

ផ្ទះជាច្រើនខ្នងត្រូវបានរងផលប៉ះពាល់ ហើយអាជ្ញាធរជម្លៀសមនុស្សជាង ១០០នាក់ ដោយសារភ័យខ្លាចមានបំណាក់ដីបន្ថែមទៀត។ មន្ថែមពីនេះនៅក្នុងទីក្រុងដូចជា Chalco ក៏មានភ្លៀងធ្លាក់ខ្លាំងផងដែរ ខណៈហេដ្ឋារចនាសម្ព័ន្ធដែលមិនបានត្រួតពិនិត្យបានបណ្តាលឱ្យមានទឹកស្អុយចូលវាយលុកតាមដងផ្លូវ ផ្ទះ និងអាជីវកម្មជាច្រើន។

គួរបញ្ជាក់ថា បំណាក់ដី និងភ្លៀងធ្លាក់ខ្លាំងបាននិងកំពុងវាយលុករដ្ឋម៉ិកស៊ិក ចាប់តាំងពីរដូវវស្សាចាប់ផ្ដើមនៅចុងខែកក្កដា។ ស្របពេលជាមួយគ្នានេះប្រទេសជាច្រើននៅអឺរ៉ុបកណ្ដាលនិងប្រទេសនៅតំបន់អាអឺរ៉ុបកណ្តាលបានជួបប្រទះនឹងទឹកជំនន់យ៉ាងខ្លាំងនៅក្នុងតំបន់ផ្សេងៗ ខណៈប្រទេសនានានៅអាស៊ីអាគ្មេយ៍ដូចជាប្រទេសវៀតណាម ថៃ ឡាវ និងមីយ៉ាន់កំពុងទទួលរងនូវឥទ្ធិពលរបស់ព្យុះដែលបង្កជាទឹកជំនន់ធ្ងន់ធ្ងរនិងសមហ្លាប់មនុស្សរាប់សិបនាក់៕

អត្ថបទ​៖ ប៊ុន សុភាព