ការវាយប្រហារបំផ្ទុះឧបករណ៍ទាក់ទងរលកទី២ ស្លាប់និងរបួសមនុស្សជាង៤០០នាក់ទៀត នៅលីបង់

មិនដល់មួយថ្ងៃផងបន្ទាប់ពីការបំផ្ទុះឧបករណ៍ទាក់ទងសម្លាប់មនុស្សចំនួន១២នាក់ និងជិត៣ ០០០នាក់រងរបួសនៅប្រទេសលីបង់ ស្រាប់តែការវាយប្រហារទ្រង់ទ្រាយធំរលកទីពីរ បានឆក់យកជីវិតមនុស្ស២០នាក់ និងរបួសជាង៤៥០នាក់ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃព្រហស្បតិ៍ទី១៩ខែកញ្ញាឆ្នាំ២០២៤, ការបំផ្ទុះឧបករណ៍ទាក់ទងប៉េកឺ (Pager) របស់ក្រុមហេសបូឡា​ បានកើតឡើងនៅតំបន់ជាយក្រុងបេរូតភាគខាងត្បូង, ជ្រលង Bekaa និងភាគខាងត្បូងប្រទេសលីបង់ ដែលជាមូលដ្ឋានរបស់ក្រុមនេះ។

ត្បិតតែក្រុមហេសបូឡា ចង្អុលចំមុខអ៊ីស្រាអែល ថាជាអ្នកនៅពីក្រោយរឿងនេះក៏ពិតមែន ប៉ុន្តែអ៊ីស្រាអែល មិនទាន់និយាយអ្វីទាំងអស់ពាក់ព័ន្ធនឹងរឿងនេះ។

ជុំវិញបញ្ហានេះដែរ អគ្គលេខាធិការអង្គការសហប្រជាជាតិលោក Antonio Guterres បានបង្ហាញក្តីបារម្ភនិងព្រមានអំពី ហានិភ័យធ្ងន់ធ្ងរនៃការរីករាលដាលជម្លោះ ហើយអំពាវនាវឲ្យភាគីទាំងអស់ត្រូវអត់ធ្មត់ខាំមាត់សង្កត់ចិត្តឲ្យមែនទែន។

ដោយឡែក សហរដ្ឋ​អាមេរិកឯណោះ ​បាន​ចេញ​មុខ​ប្រកាស​ថា ខ្លួន​មិន​បាន​ដឹង​មុន ឬ​ក៏​ជាប់​ពាក់ព័ន្ធ​នឹង​ឧប្បត្តិហេតុ​នេះ​ឡើយ។ អ្នកនាំពាក្យក្រសួងការបរទេសអាមេរិក លោក Matthew Miller បានប្រាប់អ្នកយកព័ត៌មានថា «ខ្ញុំអាចប្រាប់អ្នកថា សហរដ្ឋអាមេរិកមិនបានចូលរួមនៅក្នុងរឿង​នេះ​ទេ សហរដ្ឋអាមេរិកមិនបានដឹងអំពីឧប្បត្តិហេតុនេះជាមុនឡើយ ហើយពេលនេះ យើងកំពុងប្រមូលព័ត៌មាន»។

ស្របពេលជាមួយគ្នានោះដែរ លោក Miller បានបដិសេធធ្វើអត្ថាធិប្បាយលើការសង្ស័យដែរថា ការបំផ្ទុះត្រូវបានធ្វើឡើងដោយអ៊ីស្រាអែល ដែលតែងតែមានការ​ប៉ះ​ទង្គិច​ប្រដាប់​អាវុធ​ជាមួយក្រុមហេសបូឡា បន្ទាប់ពីការវាយប្រហារកាលពីថ្ងៃទី​៧​ខែតុលា លើអ៊ីស្រាអែលដោយសម្ព័ន្ធមិត្តអ៊ីរ៉ង់មួយផ្សេងទៀតគឺក្រុមហាម៉ាស។

ក្រោយហេតុការណ៍ផ្ទុះឧបករណ៍ទាក់ទងនេះ ចលនាប្រដាប់អាវុធសម្ព័ន្ធអ៊ីរ៉ង់ បានប្រកាសសងសឹកអ៊ីស្រាអែល ដោយមិនប្រណីដៃ ហើយពាក់ព័ន្ធការផ្ទុះនេះដែរ អ្នកជំនាញមួយចំនួនលើកឡើងថា ប្រហែលជាមានការ hack ធ្វើឲ្យថ្មឧបករណ៍ទាក់ទងឡើងក្តៅ បណ្តាលឲ្យឧបករណ៍នេះផ្ទុះតែម្តង៕

អត្ថបទ៖ សុខ សុវណ្ណ

ចុចអាន៖ អាមេរិក ប្រកាស​មិន​ជាប់​ពាក់ព័ន្ធ​នឹង​រឿង​បំផ្ទុះ​ឧបករណ៍​ទាក់ទង​ដំណាល​គ្នា​នៅ​ទូទាំង​លីបង់