នីហ្សេរីយ៉ាព្រមានពីទឹកជំនន់ខ្លាំង​ នៅពេលកាមេរូនបញ្ចេញទឹកពីទំនប់

រដ្ឋាភិបាលនីហ្សេរីយ៉ាព្រមានអំពីទឹកជំនន់ដែលអាចកើតមាននៅក្នុងរដ្ឋចំនួន១១ បន្ទាប់ពីប្រទេសកាមេរូនដែលនៅជិតខាងនឹងបញ្ចេញទឹកពីទំនប់ Lagdo។ នេះបើយោងតាមការចេញផ្សាយរបស់របស់ទីភ្នាក់ងារព័ត៌មាន​APនៅថ្ងៃទី១៩ខែកញ្ញានេះ។

ទីភ្នាក់ងារជលសាស្ត្រនីហ្សេរីយ៉ាបាននិយាយកាលពីថ្ងៃពុធថា ទឹកនឹងត្រូវបានបញ្ចេញចេញពីទំនប់ Lagdo ប្រទេសកាមេរូនបន្តិចម្តងៗ ហើយអាចបណ្តាលឱ្យមានទឹកជំនន់ដល់ប្រទេសនីហ្សេរីយ៉ា ប៉ុន្តែមិនទាន់មានការប្រកាសអាសន្ននោះទេ។

យោងតាមអង្គការសហប្រជាជាតិ ទឹកជំនន់ដ៏ធ្ងន់ធ្ងរបានវាយលុកភាគឦសាន្ត​ប្រទេសនីហ្សេរីយ៉ាមកហើយរួច ដែលប៉ះពាល់ដល់មនុស្សជាង ៤០ម៉ឺននាក់។ ទឹកជំនន់នៅរដ្ឋ Borno បានបង្ខំប្រជាជនចេញពីផ្ទះរបស់ពួកគេទៅកាន់កន្លែងផ្លាស់ទីលំនៅ និងបានសម្លាប់មនុស្ស ៣០ នាក់នៅក្នុងរដ្ឋនេះ បន្ទាប់ពីការបាក់ទំនប់វារីអគ្គិសនីដ៏ធំមួយ ដែលបានបណ្ដាលឲ្យប្រហែល ១៥ភាគរយ នៃ Maiduguri រដ្ឋធានីរបស់រដ្ឋ Borno ស្ថិតនៅក្រោមទឹក។

ទឹកជំនន់បានធ្វើឱ្យវិបត្តិមនុស្សធម៌ក្នុងប្រទេសនីហ្សេរីយ៉ាកាន់តែអាក្រក់ទៅៗ ដែលហ៊ុមព័ទ្ធដោយអំពើហឹង្សារបស់ក្រុមប្រដាប់អាវុធ ជាពិសេសនៅតំបន់ភាគខាងជើងដែលមានបញ្ហា បានជម្លៀសមនុស្សរាប់លាននាក់រួចហើយ។ អាហ្រ្វិកខាងលិចបានជួបប្រទះនឹងគ្រោះទឹកជំនន់ខ្លាំងបំផុតក្នុងរយៈពេលជាច្រើនទសវត្សរ៍ឆ្នាំនេះ ដែលប៉ះពាល់ដល់មនុស្សជាង ២ លាននាក់ ច្រើនជាងឆ្នាំមុន៣ដង។ ក្នុងឆ្នាំ ២០២២ មនុស្សជាង៦០០ នាក់បានរងផលប៉ះពាល់ដោយទឹកជំនន់នៅក្នុងប្រទេសនីហ្សេរីយ៉ា នៅពេលដែលទឹកត្រូវបានបញ្ចេញពីទំនប់ Lagdo នៅក្នុងប្រទេសកាមេរូនដូចគ្នានឹងពេលនេះ៕

អត្ថបទ៖ ប៊ុន សុភាព