នៅអឺរ៉ុប ព្យុះ Boris បន្តទៅវាយប្រហារអ៊ីតាលី យ៉ាងចាស់ដៃ បង្ខំឲ្យជម្លៀសមនុស្សរាប់ពាន់នាក់ 

បន្ទាប់ពីបង្កទុក្ខវេទនាដល់ប្រជាជននៅអឺរ៉ុបកណ្តាលនិងខាងកើត ពេលនេះព្យុះ Boris បានបន្តទៅវាយប្រហារប្រទេសអ៊ីតាលី យ៉ាងចាស់ដៃថែមទៀត ដោយបណ្តាលឲ្យមានគ្រោះទឹកជំនន់ធ្ងន់ធ្ងរ និងជំរុញឲ្យជម្លៀសប្រជាជនរាប់ពាន់នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លែងដែលរងគ្រោះខ្លាំងជាងគេគឺទីក្រុង Faenza ដោយនៅទីនោះ កម្ពស់ទឹកទន្លេចំនួនពីរ កំពុងហក់ឡើងយ៉ាងលឿន គួរឲ្យព្រួយបារម្ភ ដូច្នេះប្រជាពលរដ្ឋនៅត្រូវជម្លៀសចេញពីផ្ទះសម្បែងទាំងកណ្តាលយប់។

ចំណែកនៅទីក្រុងភាគឦសាន Emilia Romagna វិញ, មនុស្សជាង ១ ០០០នាក់ត្រូវបានជម្លៀសទៅកាន់ទីទួលសុវត្ថិភាព ខណៈតំបន់ភាគកណ្តាល Marche, គ្រោះទឹកជំនន់កាន់តែធ្ងន់ធ្ងរ ដោយជន់លិចផ្ទះសម្បែង កាត់ផ្តាច់ការធ្វើចរាចរណ៍តាមដងផ្លូវ និងបណ្តាលឲ្យមនុស្ស២នាក់ បាត់ខ្លួនថែមទៀត។

លើសពីនេះ សាលារៀននៅទីក្រុង Emilia Romagna ក៏ត្រូវបង្ខំចិត្តបិទទ្វារផងដែរ រីឯចរាចរណ៍ផ្លូវដែកត្រូវផ្អាកជាបណ្តោះអាសន្នព្រោះតែបំណាក់ដី។

ងាកទៅទីក្រុង Falconara នៅតំបន់ឆ្នេរ Adriatic ឯណោះវិញ, ចាប់តាំងពីថ្ងៃពុធមក ទឹកភ្លៀងកម្រិត២០៤មិល្លីម៉ែត្របានធ្លាក់ចុះ ដែលអត្រានេះគឺលើសពីកម្រិតមធ្យមរបស់ខែកញ្ញាទាំងមូលទៅទៀត។

សូមបញ្ជាក់ថា មុនពេលវាយប្រហារប្រទេសអ៊ីតាលី ព្យុះ Boris បានបណ្តាលឲ្យមនុស្សស្លាប់ចំនួន២៣នាក់រួចទៅហើយនៅប្រទេសប៉ូឡូញ រ៉ូម៉ានី អូទ្រីសនិងសាធារណរដ្ឋឆែក។

នៅប្រទេសទាំងនោះ Boris មិនត្រឹមតែបណ្តាលឲ្យមនុស្សស្លាប់ទេ ប៉ុន្តែព្យុះនេះក៏បង្កជាទឹកជំនន់ ជន់លិចផ្ទះសម្បែង កម្ទេចស្ពាន បំផ្លាញផ្លូវថ្នល់ ផ្តាច់ចរន្តអគ្គិសនី និងបង្ខំឲ្យមនុស្សរាប់ម៉ឺននាក់ត្រូវជម្លៀសខ្លួនផងដែរ៕

អត្ថបទ៖ សុខ សុវណ្ណ

ចុចអាន៖ អឺរ៉ុប នៅតែធ្ងន់ធ្ងរដោយទឹកជំនន់ ខណៈមនុស្ស បន្តជម្លៀសមិនឈប់