អាមេរិក៖ អ៊ីស្រាអែល រៀបផែនការបំផ្ទុះឧបករណ៍ទាក់ទងនៅលីបង់ ១៥ឆ្នាំមកហើយ

ការវាយប្រហារបំផ្ទុះឧបករណ៍ទាក់ទងផ្ទួនៗ រញ្ជួយប្រទេសលីបង់ បានបណ្តាលឲ្យមនុស្សជាង ៣ ០០០នាក់ស្លាប់និងរបួស ហើយលីបង់ បានចង្អុលចំមុខអ៊ីស្រាអែល ថាជាអ្នកនៅពីក្រោយរឿងនេះ ខណៈបើយោងតាមប្រភពពីសហរដ្ឋអាមេរិក, តាមពិតទៅ អ៊ីស្រាអែល រៀបផែនការនេះអស់រយៈពេល១៥ឆ្នាំមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពចារកម្មអាមេរិក ប្រាប់ទៅសារព័ត៌មាន ABC News នៅថ្ងៃសុក្រទី២០ខែកញ្ញាឆ្នាំ២០២៤ថា ភ្នាក់ងារចារកម្មអ៊ីស្រាអែល «Mossad» បានចាយពេលរាប់ឆ្នាំដើម្បីរៀបចំដាក់ឧបករណ៍ ដែលអាចបញ្ជាបំផ្ទុះពីចម្ងាយបាន។

ស្របពេលជាមួយគ្នានោះ New York Times ក៏ចុះផ្សាយដែរថា ឧបករណ៍បង្កៃគ្រឿងផ្ទុះទាំងនេះចាប់ផ្តើមចែកចាយអំឡុងរដូវក្តៅឆ្នាំ២០២៣ ប៉ុន្តែប្រភពខាងលើ មិនបានបញ្ជាក់ឈ្មោះក្រុមហ៊ុនឡើយ។

ភ្លាមៗក្រោយការវាយប្រហារ ប្រទេសលីបង់ ក៏ប្រកាសសង្គ្រាមធំជាមួយអ៊ីស្រាអែល ដោយនាយករដ្ឋមន្ត្រីលីបង់ Najib Mikati អះអាងថា ការវាយប្រហារទាំងនេះគឺឆ្លងផុតបន្ទាត់ក្រហមទាំងអស់ ហើយវាជាឧក្រិដ្ឋកម្មប្រឆាំងប្រជាជនដែលគ្មានអ្វីការពារ។ 

ទន្ទឹមនោះ មេក្រុមហេសបូឡា លោក Hassan Nasrallah ក៏ប្រកាសសង្គ្រាមដែរ ព្រោះថា អ៊ីស្រាអែលបានបើកការសម្លាប់រង្គាល ដោយវាយប្រហារសមាជិករបស់ខ្លួនរាប់ពាន់នាក់នៅទូទាំងប្រទេសលីបង់។

ពាក់ព័ន្ធការវាយប្រហារនេះ ប្រទេសលីបង់ បានហាមប្រាមប្រជាជនរបស់ខ្លួន មិនឲ្យប្រើប្រាស់ឧបករណ៍ទាក់ទងឬអាយកូម ពេលឡើងជិះយន្តហោះទៅនិងមកទីក្រុងបេរូត។

តាមពិតទៅ អ៊ីស្រាអែលក៏ចាប់ផ្តើមប្រតិបត្តិការយោធាទ្រង់ទ្រាយធំនៅប្រទេសលីបង់ក្នុងឆ្នាំ ១៩៨២ដែរ ដោយសម្រេចការកាន់កាប់តំបន់ខ្លះរយៈពេល៣ឆ្នាំ ហើយក៏នាំឲ្យក្រុមហេសបូឡា កកើតឡើងក្លាយជាកម្លាំងយោធានិងនយោបាយដ៏លេចធ្លោ។ លុះមកដល់ឆ្នាំ២០០៦ អ៊ីស្រាអែល ក៏វាយលុកលីបង់ម្តងទៀត ដែលប្រតិបត្តិការនោះ ចាយពេលអស់មួយខែ៕

អត្ថបទ៖ សុខ សុវណ្ណ

ចុចអាន៖ តួលេខ​អ្នក​ស្លាប់​ដោយ​ការ​បំផ្ទុះ​ឧបករណ៍​ទាក់ទង​នៅ​លីបង់ កើន​ឡើង​ដល់​៣៧​នាក់​ហើយ