អ៊ីស្រាអែល ចាប់បុរសជ្វីហ្វម្នាក់ ដែលប៉ងធ្វើឃាតលោក Netanyahu 

តាមការចុះផ្សាយរបស់ RT នៅថ្ងៃសុក្រទី២០ខែកញ្ញាឆ្នាំ២០២៤, អ៊ីស្រាអែល បានចាប់ខ្លួនបុរសម្នាក់ឈ្មោះ Moti Maman ជាជនជាតិជ្វីហ្វ ដែលចូលរួមក្នុងគម្រោងធ្វើឃាតលោកនាយករដ្ឋមន្ត្រី Benjamin Netanyahu។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការពិតបុរសវ័យ៧៣ឆ្នាំរូបនេះ ត្រូវចាប់ខ្លួនតាំងពីខែមុនមកម្ល៉េះ ប៉ុន្តែអ៊ីស្រាអែល ទើបតែបញ្ចេញព័ត៌មានលម្អិត កាលពីថ្ងៃព្រហសត្បិ៍ប៉ុណ្ណោះ។

តាមការបញ្ជាក់ពីក្រុមស៊ើបអង្កេតអ៊ីស្រាអែល, លោក Maman រស់នៅទីក្រុង Ashkelon ធ្លាប់ធ្វើដំណើរទៅប្រទេសអ៊ីរ៉ង់ពីរដង ហើយទទួលបានប្រាក់ឲ្យមកធ្វើសកម្មភាពក្នុងនាមភ្នាក់ងារសម្ងាត់របស់អ៊ីរ៉ង់។

ពេលទៅអ៊ីរ៉ង់លើកដំបូង, Maman ត្រូវទទួលភារកិច្ចរាយការណ៍អំពីទីតាំងអាវុធ ផ្តល់ការណ៍សម្ងា​ត់ និងទាក់ទងជាមួយមន្ត្រីអ៊ីស្រាអែលជាច្រើននាក់ ដើម្បីទទួលបានព័ត៌មានផ្សេងៗ។ ក្រោយមក ក្នុងការធ្វើដំណើរលើកទី២ គាត់ក៏ទទួលបញ្ជាឲ្យធ្វើឃាតលោក Netanyahu តែម្តង។

តាមការអះអាងរបស់ភ្នាក់ងារចារកម្មអ៊ីស្រាអែល, លោក Maman ទារលុយមុនចំនួន១លានដុល្លារអាមេរិក សម្រាប់សកម្មភាពធ្វើឃាតរបស់គាត់ ប៉ុន្តែអ៊ីរ៉ង់មិនព្រម ទើបក្រោយមក ភាគីទាំងសងខាងចរចាគ្នាសម្រេចនៅត្រឹម ៥ ៥៨០ដុល្លារអាមេរិក។

ទោះបីជាយ៉ាងណាក៏ដោយ មេធាវីរបស់គាត់ បានជំទាស់ ដោយអះអាងថា ការចោទប្រកាន់ទាំងនេះ គ្មានមូលដ្ឋានច្បាស់លាស់ឡើយ។

សូមបញ្ជាក់ថា អ៊ីស្រាអែលនិង​អ៊ីរ៉ង់​ តែង​ចោទ​គ្នាជុំវិញផែនការធ្វើឃាតមន្ត្រីកំពូលៗលើទឹកដីរៀងៗខ្លួន។ តួយ៉ាងថ្មីៗ​នេះ ប្រធាន​ផ្នែក​នយោបាយ​ក្រុម​ហាម៉ាសលោក Ismail Haniyeh ត្រូវ​​គេ​ធ្វើ​ឃាត​ពេលបំពេញ​ទស្សនកិច្ច​នៅទី​ក្រុង​តេហេរ៉ង់​ក្នុង​ខែ​កក្កដា។

សាធារណរដ្ឋឥស្លាមបានស្តីបន្ទោសអ៊ីស្រាអែលចំពោះការស្លាប់របស់លោក Haniyeh ប៉ុន្តែយ៉ាងណា អ៊ីស្រាអែល​មិនបញ្ជាក់ ឬ​បដិសេធ​ចំពោះរឿងនេះឡើយ៕

អត្ថបទ៖ សុខ សុវណ្ណ

ចុចអាន៖ នាយករដ្ឋមន្ត្រី​អ៊ីស្រាអែល ថា​មិន​​ដក​ទ័ព​ចេញ​ពី​ព្រំដែន​ហ្គាហ្សា​ដាច់ខាត