ភាគកណ្តាលជប៉ុន ប្រកាសអាសន្ននិងជម្លៀសមនុស្សទ្រង់ទ្រាយធំ ដោយសារទឹកជំនន់

ពេលនេះគ្រោះទឹកជំនន់បានបន្តទៅវាយលុកប្រទេសជប៉ុនម្តង ដោយជំរុញឲ្យមានការប្រកាសអាសន្ននិងជម្លៀសមនុស្សទ្រង់ទ្រាយធំនៅភាគកណ្តាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ NHK នៅថ្ងៃសៅរ៍ទី២១ខែកញ្ញាឆ្នាំ២០២៤, ទីក្រុងចំនួន២ក្នុងខេត្ត Ishikawa លើកោះ Honshu គឺជាកន្លែងរងគ្រោះធ្ងន់បំផុត ខណៈភ្លៀងធ្លាក់ដូចហែកមេឃ នៅតែបន្តវាយប្រហារមិនធូរស្រាល។

នៅទីក្រុង Wajima មនុស្សប្រហែល ១៨ ០០០នាក់ ត្រូវបានជម្លៀសជាបន្ទាន់ទៅកាន់ទីទួលសុវត្ថិភាព ចំណែកនៅទីក្រុង Suzu ក៏មានការជម្លៀសមនុស្ស ១២ ០០០នាក់ដែរ។

ស្របពេលជាមួយគ្នានោះ រដ្ឋាភិបាលជប៉ុន បង្ហាញក្តីបារម្ភថា ភ្លៀងធ្លាក់ខ្លាំង កំពុងបណ្តាលឲ្យទឹកទន្លេចំនួន១២នៅក្នុងតំបន់នេះ ឡើងលើសកម្រិតប្រកាសអាសន្ន ព្រមទាំងមានហានិភ័យបំណាក់ដី និងទឹកជំនន់រហ័សនៅតាមបណ្តាតំបន់មួយចំនួនទៀតផង។

តាមការព្យាករ, នៅប៉ុន្មានថ្ងៃខាងមុខ តំបន់ Hokuriku និង Shikoku នឹងមានភ្លៀងធ្លាក់កម្រិតរហូតដល់ទៅ ២០០មិល្លីម៉ែត្រ ចំណែកនៅ Tokai និង Chugoku មានកម្រិត ១៨០មិល្លីម៉ែត្រ រីឯនៅ Tohoku, Kinki និង Kyushu មានកម្រិត ១៥០មិល្លីម៉ែត្រ។

អាស្រ័យហេតុដូច្នេះហើយ ទើបអាជ្ញាធរ ជូនដំណឹងដល់ប្រជាពលរដ្ឋឲ្យប្រុងប្រៀបខ្លួននិងប្រយ័ត្នប្រយែង ហើយត្រូវតាមដានព័ត៌មានឲ្យជាប់ជានិច្ច។

សូមបញ្ជាក់ថា តំបន់ទាំងប៉ុន្មានខាងលើនេះ គឺសុទ្ធសឹងជាកន្លែងរងគ្រោះខ្លាំង ដោយការរញ្ជួយដីដ៏សាហាវកម្លាំង ៧.៥រ៉ិចទ័រ នៅថ្ងៃចូលឆ្នាំសកល ដែលបណ្តាលឲ្យមនុស្សជាង២៨០នាក់ស្លាប់៕

អត្ថបទ៖ សុខ សុវណ្ណ

ចុចអាន៖ តើ​​គ្រោះ​មហន្តរាយ​ទឹកជំនន់​​​​​​បង្កវិនាសកម្មអ្វីខ្លះតាមទ្វីប​នីមួយ​ៗ​​?