មន្ត្រីអាមេរិក៖ ឃាតករ ៥ក្រុម កំពុងតាមសម្លាប់លោក ត្រាំ

ដោយទទួលបានប្រភពពីក្រសួងសន្តិសុខមាតុភូមិអាមេរិក, តំណាងរាស្រ្តគណបក្សសាធារណរដ្ឋលោក Matt Gaetz អះអាងថា បច្ចុប្បន្ននេះ មានឃាតករចំនួន៥ក្រុម កំពុងតាមសម្លាប់អតីតប្រធានាធិបតីសហរដ្ឋអាមេរិក ដូណាល់ ត្រាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT នៅថ្ងៃសៅរ៍ទី២១ខែកញ្ញា, លោក Gaetz បានលើកឡើងថា ថ្មីៗនេះលោកបានជួបជាមួយមន្ត្រីម្នាក់នៅក្រសួងសន្តិសុខមាតុភូមិ ហើយប្រាប់ថា មានឃាតករចំនួន៥ក្រុមកំពុងកំណត់គោលដៅលើលោកត្រាំ និងតាមសម្លាប់គាត់។ ក្នុងនោះ មាន៣ក្រុមនៅបរទេស និង២ក្រុមនៅក្នុងស្រុក ហើយក្រុមនៅបរទេសនោះទៀតសោត គឺជាក្រុមដែលមានទំនាក់ទំនងជាមួយអ៊ុយក្រែន អ៊ីរ៉ង់ និងប៉ាគីស្ថាន។

ទោះបីជាយ៉ាងណាក៏ដោយ មិនទាន់មានការឆ្លើយតបពី FBI ឬ CIA ទេ ចំពោះការលើកឡើងនេះ។

ការអះអាងរបស់លោក Gaetz កើតឡើងត្រឹមប៉ុន្មានថ្ងៃប៉ុណ្ណោះ បន្ទាប់ពីលោក ត្រាំ ត្រូវខ្មាន់កាំភ្លើងប៉ងធ្វើឃាតជាថ្មី នៅឯទីលានវាលកូនហ្គោលអន្តរជាតិរបស់គាត់ ក្នុងទីក្រុង West Palm Beach នៃរដ្ឋ ហ្វ្លរីដា។

ទោះបីជាយ៉ាងណាក៏ដោយ បេក្ខជនឈរឈ្មោះបោះឆ្នោតគណបក្សសាធារណរដ្ឋរូបនេះ មិនមានរបួសអ្វីទេ ហើយត្រូវជម្លៀសទៅកាន់កន្លែងសុវត្ថិភាព ខណៈជនសង្ស័យឈ្មោះ Ryan Wesley Routh ត្រូវនាំទៅឃុំឃាំង។

ភ្លាមៗនោះដែរ ប្រធានាធិបតីសហរដ្ឋអាមេរិក ចូ បៃដិន ក៏បានចេញបញ្ជាដាច់ណាត់ឲ្យសេវាសម្ងាត់ ត្រូវចាត់វិធានការម៉ឺងម៉ាត់ ​ដើម្បីការពារសុវត្ថិភាពរបស់បេក្ខជនឈរឈ្មោះបោះឆ្នោតខាងគណបក្សសាធារណរដ្ឋ។

នោះគឺជាការប៉ងសម្លាប់លើកទីពីរ ក្រោយពេលលោកត្រាំ បានរួចរស់ជីវិតពីការលបធ្វើឃាតលើកដំបូង អំឡុងពេលជួបជុំអ្នកគាំទ្រនៅរដ្ឋ Pennsylvania៕

អត្ថបទ៖ សុខ សុវណ្ណ

ចុចអាន៖ លោក ត្រាំ ត្រូវគេប៉ងធ្វើឃាតម្តងទៀត