ព័ត៌មានអន្ដរជាតិ

យុទ្ធនាការរបស់ហារីសចំណាយលើសត្រាំ រហូត៣ដង ប៉ុន្តែមិនប្រាកដឈ្នះឆ្នោតទេ

បានផុស

៣ ខែ មុន

នៅ

ថ្ងៃសៅរ៍ ២១ កញ្ញា ២០២៤

ដោយ

ប្រជាប្រិយភាពរបស់លោកស្រី កាម៉ាឡា ហារីស (Kamala Harris) ដែលជាបេក្ខភាពប្រធានាធិបតីសហរដ្ឋអាមេរិកមកពីគណបក្សប្រជាប្រធិបតេយ្យកើនឡើងក្រោយប្រធានាធិបតី ចូ បៃដិន បោះបង់ការប្រកួតប្រជែងរបស់លោក បានធ្វើឲ្យបក្សប្រជាធិបតេយ្យប្រមូលបានមូលនិធិយ៉ាងច្រើន។

ទន្ទឹមនឹងការប្រមូលបានប្រាក់ជាងរយលានដុល្លារពីការបរិច្ចាគ យុទ្ធនាការបោះឆ្នោតរបស់បេក្ខភាពប្រធានាធិបតី កាម៉ាឡា ហារីស គេត្រូវបានរាយការណ៍ថា បានចំណាយប្រាក់ជិតបីដងធៀបយុទ្ធនាការរបស់គូប្រជែងគឺ លោក ដូណាល់ ត្រាំ (Donald Trump) កាលពីក្នុងខែសីហា។

លោក ដូណាល់ ត្រាំ និង លោកស្រី កាម៉ាឡា ហារីស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍របស់ទីភ្នាក់ងារព័ត៌មានរ៉យទ័រ ដោយយោងតាមរបាយការណ៍ហិរញ្ញវត្ថុដែលបានដាក់នៅថ្ងៃទី២០ខែកញ្ញារបស់គណបក្សប្រជាធិបតេយ្យនៅមុនការបោះឆ្នោតប្រធានាធិបតីថ្ងៃទី៥ខែវិច្ឆិកា ស្របពេលដែលយុទ្ធនាការរបស់គណបក្សទាំងពីរកំពុងឈានចូលដល់វគ្គចុងក្រោយនៃការប្រកួតប្រជែងប្រធានាធិបតីដ៏តឹងតែងបំផុត។

របាយការណ៍ហិរញ្ញវត្ថុដែលត្រូវបានបង្ហាញដល់គណៈកម្មការបោះឆ្នោតសហព័ន្ធ បានឲ្យដឹងថា យុទ្ធនាការរបស់ លោកស្រី ហារីស អនុប្រធានាធិបតីសហរដ្ឋអាមេរិក បានចំណាយ១៧៤លានដុល្លារ ដែលបានបើកយុទ្ធនាការចាប់តាំងពីថ្ងៃទី២១ខែកក្កដា ពេលដែលលោក ចូ បៃដិន បោះបង់ការមហិច្ឆតាប្រកួតប្រជែងសម្រាប់តំណែងប្រធានាធិបតីជាលើកទី២។

ក្នុងពេលស្របគ្នានេះ យុទ្ធនាការរបស់អតីតប្រធានាធិបតី ដូណាល់ ត្រាំ ដែលជាបេក្ខភាពប្រកួតប្រជែងមកពីគណបក្សសាធារណៈរដ្ឋ បានរាយការណ៍ដាច់ដោយឡែកពីគ្នានូវការចំណាយចំនួន៦១លានដុល្លារប៉ុណ្ណោះ។

ខណៈពេលដែលអត្ថប្រយោជន៍ផ្នែកហិរញ្ញវត្ថុរបស់លោកស្រី ហារីសនឹងជួយដល់ការផ្សាយពាណិជ្ជកម្មតាមកញ្ចក់ទូរទស្សន៍សម្រាប់ការបោះឆ្នោតនៅពេលខាងមុខនេះ ប៉ុន្តែវាមិនប្រាកដថា លោកស្រីហារីសនឹងទទួលបានជ័យជម្នះដោយសារការចំណាយច្រើននេះនោះទេ។

បេក្ខភាពប្រធាធិបតីទាំងពីរគឺមានលទ្ធផលប្រកៀកប្រកិតគ្នាយ៉ាងខ្លាំងនៅក្នុងការស្ទង់មតិជាច្រើន រួមទាំងនៅក្នុងរដ្ឋដែលពួកគេគ្មានកំណត់ត្រាឈ្នះជាអាទិភាព ដែលអាចកំណត់អ្នកឈ្នះនោះក៏ដោយ។

រ៉យទ័របានកត់សម្គាល់ឃើញថា ក្នុងការប្រកួតប្រជែងតំណែងប្រធានាធិបតីឆ្នាំ ២០១៦ លោក ដូណាល់ ត្រាំ បានយកឈ្នះលោកស្រី ហ៊ីឡារី ឃ្លីនតុន (Hillary Clinton) ថ្វីបើបានចំណាយប្រាក់តិចជាងគណបក្សប្រជាធិបតេយ្យក៏ដោយ។

នៅក្នុងខែសីហា លោកស្រី កាម៉ាឡា ហារីស និងលោក ដូណាល់ ត្រាំ បាននិយាយថា ការចំណាយរបស់ពួកគេភាគច្រើនគឺទៅលើការផ្សាយពាណិជ្ជកម្ម ជាមួយនឹងចំនួនតិចជាងចំណាយសម្រាប់ការជួបជុំ ការធ្វើដំណើរ និងប្រាក់ខែបុគ្គលិកយុទ្ធនាការ។

យុទ្ធនាការរបស់លោកស្រី ហារីស ក៏បានរាយការណ៍ពីការបរិច្ចាគប្រាក់ ៧៥០០០ដុល្លារអាមេរិកដល់មូលនិធិ Detroit Unity ដែលជាអង្គការមិនរកប្រាក់ចំណេញដែលធ្វើការដើម្បីបង្កើនចំនួនអ្នកបោះឆ្នោតស្បែកខ្មៅនៅក្នុងរដ្ឋ Michigan ដែលជារដ្ឋប្រកួតប្រជែងដ៏សំខាន់នៅក្នុងការបោះឆ្នោតឆ្នាំ២០២៤។

ការចូលទៅក្នុងការប្រណាំងរបស់លោកស្រី ហារីស ត្រឹមតែប៉ុន្មានសប្តាហ៍បន្ទាប់ពីលោក បៃដិន ឡើងជជែកដេញដោលមិនបានល្អតទល់នឹងលោក ត្រាំ បានជំរុញឱ្យមានការកើនឡើងនៃការបរិច្ចាគដល់យុទ្ធនាការរបស់លោកស្រី ដែលបានបញ្ចប់ខែសីហាជាមួយនឹងទឹកប្រាក់ចំនួន២៣៥លានដុល្លារ លើសពីអ្វីដែលវាមាននៅដើមខែ៕