ព័ត៌មានអន្ដរជាតិ

មេដឹកនាំអ៊ុយក្រែន ទៅដល់អាមេរិក ត្រៀមថ្វីមាត់បញ្ចុះបញ្ចូលអាមេរិកអំពី «ផែនការជ័យជម្នះ»

បានផុស

២ នាទី មុន

នៅ

ថ្ងៃចន្ទ ២៣ កញ្ញា ២០២៤

ដោយ

ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃអាទិត្យបានមកដល់សហរដ្ឋអាមេរិក សម្រាប់ដំណើរទស្សនកិច្ចដ៏សំខាន់មួយដើម្បីបង្ហាញពីផែនការរបស់ទីក្រុងកៀវ ក្នុងការបញ្ចប់សង្រ្គាមរយៈពេលពីរឆ្នាំកន្លះជាមួយប្រទេសរុស្ស៊ី។

ក្បួនរថយន្តរបស់លោក Volodymyr Zelenskyy ក្នុងរដ្ឋ Pennsylvania (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Zelenskyy នឹងបង្ហាញសំណើ ដែលលោកហៅថា «ផែនការជ័យជម្នះ» ទៅកាន់ប្រធានាធិបតីអាមេរិកលោក ចូ បៃដិន (Joe Biden) ក៏ដូចជាបេក្ខភាពប្រធានាធិបតីចំនួន២រូបគឺ លោកស្រី កាម៉ាឡា ហារីស (Kamala Harris) និងលោក ដូណាល់ ត្រាំ (Donald Trump)។

ដំណើរទស្សនកិច្ចនេះ ធ្វើឡើងបន្ទាប់ពីការប្រយុទ្ធគ្នាដ៏ខ្លាំងក្លាកាលពីរដូវក្ដៅ ដោយទីក្រុងមូស្គូបានវាយសម្រុកទៅមុខយ៉ាងលឿននៅភាគខាងកើតអ៊ុយក្រែន និងទីក្រុងកៀវបន្តកាន់កាប់តំបន់ Kursk របស់រុស្ស៊ី។ ដំណើរទស្សនកិច្ចនេះ ក៏ធ្វើឡើងផងដែរ នៅពេលដែលទីក្រុងកៀវកំពុងអំពាវនាវអស់រយៈពេលជាច្រើនសប្ដាហ៍ឲ្យលោកខាងលិចអនុញ្ញាតឲ្យខ្លួនប្រើប្រាស់អាវុធរយៈចម្ងាយឆ្ងាយ ដើម្បីវាយប្រហារគោលដៅចូលជ្រៅទៅក្នុងប្រទេសរុស្ស៊ី ប៉ុន្តែរហូតមកដល់ពេលនេះ មិនទាន់មានលទ្ធផលអ្វីទាំងអស់។

លោក Zelenskyy បានបង្ហោះសារនៅលើបណ្ដាញសង្គមថា៖ «យើងបានមកដល់សហរដ្ឋអាមេរិក។ ផែនការសម្រាប់ជ័យជម្នះរបស់អ៊ុយក្រែននឹងស្ថិតនៅលើតុសម្រាប់សម្ព័ន្ធមិត្តរបស់យើងទាំងអស់»។

មេដឹកនាំអ៊ុយក្រែន បានបន្ថែមថា លោកកំពុងចាប់ផ្តើមធ្វើដំណើរនៅក្នុងរដ្ឋ Pennsylvania សម្រាប់ «ទស្សនកិច្ចពិសេស» ដោយមិនផ្តល់ព័ត៌មានលម្អិត មុនពេលធ្វើដំណើរទៅកាន់រដ្ឋ New York និង Washington។

សូមបញ្ជាក់ថា នៅក្នុងការអត្ថាធិប្បាយមុនដំណើរទស្សនកិច្ច លោក Zelenskyy បានលើកឡើងថា សហរដ្ឋអាមេរិក និងចក្រភពអង់គ្លេសមិនបានផ្តល់ការអនុញ្ញាតឲ្យអ៊ុយក្រែនប្រើប្រាស់អាវុធរយៈចម្ងាយឆ្ងាយនោះទេ ព្រោះពួកគេខ្លាចមានការកើនឡើងនៃការប្រឈមមុខគ្នាជាមួយរុស្ស៊ី ប៉ុន្តែលោកបានប្រាប់ថា លោកមិនបានបោះបង់ចោលក្តីសង្ឃឹមដែលថា លោក បៃដិន នឹងផ្លាស់ប្ដូរគំនិតវិញនោះទេ៕

ដោយ៖ ឈាង