ព័ត៌មានអន្ដរជាតិ

ចិន ជំរុញឲ្យប្រជាជនខ្លួនប្រញាប់់ចាកចេញពីអ៊ីស្រាអែលតាមដែលអាចធ្វើបាន

បានផុស

២ ខែ មុន

នៅ

ថ្ងៃចន្ទ ២៣ កញ្ញា ២០២៤

ដោយ

Chheang

ប្រទេសចិន បានជំរុញពលរដ្ឋរបស់ខ្លួនក្នុងប្រទេសអ៊ីស្រាអែលឲ្យចាកចេញ «យ៉ាងឆាប់រហ័សតាមដែលអាចធ្វើបាន» ខណៈដែលភាពតានតឹងរវាងអ៊ីស្រាអែល និងក្រុមសកម្មប្រយុទ្ធហេសបូឡាដែលគាំទ្រដោយអ៊ីរ៉ង់នៅក្នុងប្រទេសលីបង់ កាន់តែកើនឡើងខ្លាំង។

ការប៉ះទង្គិចគ្នានៅតាមព្រំដែនលីបង់ និងអ៊ីស្រាអែល (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថានទូតចិនប្រចាំនៅអ៊ីស្រាអែល បានប្រកាសនៅក្នុងសេចក្តីថ្លែងការណ៍មួយកាលពីថ្ងៃទី២២ខែកញ្ញាថា៖ «បច្ចុប្បន្ននេះ ស្ថានភាពនៅតាមព្រំដែនអ៊ីស្រាអែល-លីបង់ មានភាពតានតឹងខ្លាំង ដោយមានជម្លោះយោធាជាញឹកញាប់»។

សេចក្តីថ្លែងការណ៍បានបន្ថែមថា៖ «ស្ថានភាពសន្តិសុខក្នុងប្រទេសអ៊ីស្រាអែលនៅតែធ្ងន់ធ្ងរ ស្មុគស្មាញ និងមិនអាចទាយទុកជាមុនបាន»។

ស្ថានទូតបានជំរុញពលរដ្ឋចិនក្នុងប្រទេសអ៊ីស្រាអែលឲ្យ «ត្រឡប់ទៅផ្ទះវិញឬផ្លាស់ទីទៅកាន់តំបន់សុវត្ថិភាពឲ្យបានឆាប់តាមដែលអាចធ្វើទៅបាន»។

អ៊ីស្រាអែល និងក្រុមហេសបូឡា បានគំរាមកាលពីថ្ងៃអាទិត្យពីការបង្កើនការវាយប្រហារឆ្លងព្រំដែនរបស់ពួកគេ បើទោះបីជាមានការអំពាវនាវជាអន្តរជាតិឲ្យភាគីទាំងពីរថយម្នាក់មួយជំហានជៀសវាងការផ្ទុះសង្គ្រាមទ្រង់ទ្រាយធំក៏ដោយ។

ការវាយប្រហារតាមអាកាសរបស់អ៊ីស្រាអែលនៅក្នុងមូលដ្ឋានរបស់ក្រុមហេសបូឡា នៅភាគខាងត្បូងទីក្រុងបេរូត កាលពីថ្ងៃសុក្រ បានសម្លាប់ប្រមុខកងកម្លាំង Radwan របស់ហេសបូឡា គឺលោក Ibrahim Aqil។

ភាពតានតឹងចុងក្រោយនេះ បានកើតឡើងបន្ទាប់ពីហេតុការណ៍បំផ្ទុះឧបករណ៍ទាក់ទងព្រមៗគ្នានៅទូទាំងប្រទេសលីបង់កាលពីថ្ងៃអង្គារ និងថ្ងៃពុធសប្ដាហ៍មុន ដែលបានសម្លាប់មនុស្ស ៣៩នាក់ និងរបួសជិត ៣០០០នាក់។ ត្បិតគ្មានអ្នកចេញមុខអះអាងថាជាអ្នកបង្កហេតុក៏ដោយ ក៏ក្រុមហេសបូឡា និងលីបង់បានចោទប្រកាន់ថាអ្នកនៅពីក្រោយឧបទ្ទវហេតុដ៏អាក្រក់នេះគឺជា អ៊ីស្រាអែល៕

ដោយ៖ ឈាង