ព័ត៌មានអន្ដរជាតិ

កូរ៉េខាងត្បូង ព្រមានថា គីម ជុងអ៊ុន អាចបាញ់សាកល្បងអាវុធនុយក្លេអ៊ែរ អំឡុងពេលអាមេរិកបោះឆ្នោត

បានផុស

៤ ខែ មុន

នៅ

ថ្ងៃអង្គារ ២៤ កញ្ញា ២០២៤

ដោយ

ក្នុងកម្មវិធីព័ត៌មានរបស់ទូរទស្សន៍ YTN កាលពីថ្ងៃចន្ទទី២៣ខែកញ្ញាឆ្នាំ២០២៤, ប្រធានការិយាល័យសន្តិសុខជាតិកូរ៉េខាងត្បូង លោក Shin Won-sik បានព្រមានថា ប្រទេសកូរ៉េខាងជើង អាចនឹងបាញ់សាកល្បងអាវុធនុយក្លេអ៊ែរជាថ្មី អំឡុងពេលសហរដ្ឋអាមេរិក រៀបចំការបោះឆ្នោតជ្រើសរើសប្រធានាធិបតីនាខែវិច្ឆិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Shin អះអាងថា គ្មានអ្វីជាបញ្ហាចោទឡើយ បើមេដឹកនាំ គីម ជុងអ៊ុន សម្រេចចិត្តធ្វើតេស្តនុយក្លេអ៊ែរលើកទី៧មែន ព្រោះថា ទីក្រុងព្យុងយ៉ាង មានសមត្ថភាពគ្រប់គ្រាន់ក្នុងការធ្វើរឿងនេះ ហើយពួកគេអាចបាញ់សាកល្បងគ្រប់ពេលដែលពួកគេចង់។

លោក Shin បានព្រមានបែបនេះដោយសំអាងទៅលើដំណើរចុះត្រួតពិនិត្យរបស់លោក គីម ទៅកាន់រោងចក្រចម្រាញ់សារធាតុអ៊ុយរ៉ានីញ៉ូមកាលពីដើមខែនេះ។ លោក Shin មានជំនឿចិត្តថា កូរ៉េខាងជើង កំពុងព្យាយាមទាញចំណាប់អារម្មណ៍ពីពិភពលោក ឲ្យងាកមកផ្តោតការយកចិត្តទុកដាក់លើកម្មវិធីនុយក្លេអ៊ែររបស់ខ្លួនវិញ អំឡុងពេលអាមេរិកបោះឆ្នោត។

ការព្រមានរបស់លោក Shin នេះទៀតសោត កើតឡើងមួយសប្តាហ៍បន្ទាប់ពី រដ្ឋាភិបាលក្រុងព្យុងយ៉ាង អះអាងពីជោគជ័យនូវការបាញ់សាកល្បងមីស៊ីលប៉ាលិស្ទិកប្រភេទថ្មី ដែលមានសមត្ថភាពអាចបំពាក់ក្បាលគ្រាប់យក្ស។

លោក គីម ជុងអ៊ុន មេដឹកនាំកូរ៉េខាងជើង កំពុងឈរមើលការបាញ់សាកល្បងមីស៊ីល (រូបភាព៖ KCNA)

តាមការចុះផ្សាយរបស់ KCNA, មីស៊ីលប្រភេទថ្មីរបស់កូរ៉េខាងជើង ឈ្មោះ Hwasongpho-11-Da-4.5 មានបំពាក់ក្បាលគ្រាប់ទម្ងន់៤.៥តោន ហើយការបាញ់សាកល្បងនេះ មានគោលបំណងបញ្ជាក់អំពីភាពត្រឹមត្រូវនៃការបាញ់ខ្នាតមធ្យមនៅរយៈចម្ងាយ៣២០គីឡូម៉ែត្រ និងថាមពលបំផ្ទុះនៃក្បាលគ្រាប់ខ្នាតយក្សជាមួយនឹងមីស៊ីលដែលបាញ់ចេញដោយប្រើក្បាលគ្រាប់ប្រភេទនេះ។

ក្បាលគ្រាប់យក្ស គឺជាអាវុធមួយនៅក្នុងចំណោមសព្វាវុធបច្ចេកវិទ្យាជាន់ខ្ពស់របស់កូរ៉េខាងជើង ដែលលោក គីម ធ្លាប់ប្រកាសអភិវឌ្ឍអំឡុងកិច្ចប្រជុំបក្សក្នុងឆ្នាំ២០២១ ហើយកាលណោះលោកក៏បានលើកឡើងអំពីការអភិវឌ្ឍផ្កាយរណបឈ្លបការណ៍យោធា និងមីស៊ីលប៉ាលិស្ទិកអន្តរទ្វីបដោយប្រើប្រភេទឥន្ធនៈរឹងផងដែរ។

លើសពីនេះ នៅខែកក្កដា កូរ៉េខាងជើងបានបញ្ជាក់ថា ខ្លួនទទួលជោគជ័យក្នុងការបាញ់សាកល្បងនូវមីស៊ីលបំពាក់ក្បាលគ្រាប់ច្រើនក្នុងពេលតែមួយ ប៉ុន្តែពេលនោះខាងយោធាកូរ៉េខាងត្បូង បានច្រានចោល ដោយនិយាយថា ការលើកឡើងនេះគឺជា «ការបោកប្រាស់» ពោលគឺការបាញ់សាកល្បងទទួលបរាជ័យ និងមីស៊ីលបានផ្ទុះនៅកណ្ដាលអាកាស៕

អត្ថបទ៖ សុខ សុវណ្ណ

ចុចអាន៖ កូរ៉េខាងជើង បាញ់សាកល្បងមីស៊ីលបំពាក់ក្បាលគ្រាប់យក្សដោយជោគជ័យ