ព័ត៌មានអន្ដរជាតិ

ប្អូនស្រីលោក គីម៖ នាវាមុជទឹកនុយក្លេអ៊ែរ អាមេរិកដែលចតនៅកូរ៉េខាងត្បូង ជាការគំរាមកំហែង

បានផុស

៥ ខែ មុន

នៅ

ថ្ងៃពុធ ២៥ កញ្ញា ២០២៤

ដោយ

Chheang

អ្នកស្រី គីម យូជុង (Kim Yo Jong) ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង បានរិះគន់វត្តមានរបស់នាវាមុជទឹកនុយក្លេអ៊ែររបស់អាមេរិកនៅក្នុងកំពង់ផែ Busan របស់កូរ៉េខាងត្បូង។ នេះបើយោងតាមការចុះផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA កាលពីថ្ងៃទី២៤ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី គីម បានចាត់ទុកទង្វើនេះថាជាភស្តុតាងនៃមហិច្ឆតារបស់សហរដ្ឋអាមេរិកក្នុងការ «បង្អួតធនធានយុទ្ធសាស្ត្រនុយក្លេអ៊ែររបស់ខ្លួន បង្ហាញភាពខ្លាំងរបស់ខ្លួន និងបង្កើនការគំរាមកំហែង»។

ទីភ្នាក់ងារសារព័ត៌មានកូរ៉េខាងត្បូង Yonhap បានរាយការណ៍ដោយដកស្រង់សម្តីរបស់កងទ័ពជើងទឹកក្រុងសេអ៊ូលថា នាវាអាមេរិក USS Vermont បានមកដល់មូលដ្ឋានទ័ពជើងទឹកនៅទីក្រុង Busan កាលពីថ្ងៃទី២៣ខែកញ្ញា ដើម្បីរៀបចំសម្ភារៈឡើងវិញ និងអនុញ្ញាតឲ្យនាវិកសម្រាក។

ការលើកឡើងរបស់អ្នកស្រី គីម បានធ្វើឡើងបន្ទាប់ពីរដ្ឋមន្ត្រីការបរទេសកូរ៉េខាងត្បូង សហរដ្ឋអាមេរិក និងជប៉ុនបានជួបប្រជុំគ្នាកាលពីថ្ងៃទី២៣ខែកញ្ញា នៅក្រៅមហាសន្និបាតអង្គការសហប្រជាជាតិ។

ក្រសួងការបរទេសកូរ៉េខាងត្បូង បានប្រកាសនៅក្នុងសេចក្តីថ្លែងការណ៍មួយថា ពួកគេបានសម្តែងការព្រួយបារម្ភអំពីការលាតត្រដាងនាពេលថ្មីៗនេះរបស់កូរ៉េខាងជើងអំពីរោងចក្រចម្រាញ់សារធាតុអ៊ុយរ៉ានីញ៉ូមរបស់ខ្លួន និងបន្តកិច្ចសហប្រតិបត្តិការយោធា «ខុសច្បាប់» ជាមួយរុស្ស៊ី។ ទាំងកូរ៉េខាងត្បូង អាមេរិក និងជប៉ុន បានយល់ព្រមគ្នាធ្វើកិច្ចប្រជុំកំពូលត្រីភាគីនៅក្នុងឆ្នាំ២០២៤នេះ៕