ព័ត៌មានអន្ដរជាតិ

ហ្វាំងឡង់ ប្រគល់ខ្លាឃ្មុំផេនដា២ក្បាលឲ្យចិនវិញ ព្រោះថ្លៃមើលថែខ្ពស់ខ្លាំងពេក

បានផុស

២៨ វិនាទី មុន

នៅ

ថ្ងៃពុធ ២៥ កញ្ញា ២០២៤

ដោយ

សួនសត្វមួយកន្លែងក្នុងប្រទេសហ្វាំងឡង់ បានសម្រេចចិត្តក្នុងការប្រគល់ខ្លាឃ្មុំផេនដាយក្សពីរក្បាលទៅប្រទេសចិនវិញ ព្រោះតែបញ្ហាកើនឡើងអតិផរណា និងការចំណាយថែទាំខ្ពស់ខ្លាំងពេក។ ការបញ្ជូននេះ ធ្វើឡើងលឿនជាងការគ្រោងទុកដល់ទៅ៨ឆ្នាំឯណោះ ដែលភាគីនៃប្រទេសទាំង២ធ្លាប់បានធ្វើកិច្ចព្រមព្រៀងរួមគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្លាឃ្មុំផេនដាដែលមានឈ្មោះថា Lumi និង Pyry ត្រូវបាននាំយកទៅប្រទេសហ្វាំងឡង់ក្នុងខែមករាឆ្នាំ២០១៨ ប៉ុន្មានខែបន្ទាប់ពីប្រធានាធិបតីចិនលោក ស៊ី ជីនពីង បានទៅធ្វើទស្សនកិច្ចនៅហ្វាំងឡង់ និងបានចុះហត្ថលេខាលើកិច្ចព្រមព្រៀងរួមគ្នាស្តីពីការការពារសត្វព្រៃ។

បើយោងតាមសួនសត្វ Ahtari កិច្ចព្រមព្រៀងរបស់ហ្វាំងឡង់គឺសម្រាប់ការស្នាក់នៅរយៈពេល១៥ឆ្នាំនៃសត្វខ្លាឃ្មុំផេនដា។ លោក Risto Sivonen ប្រធានសួនសត្វឯកជន Ahtari បានប្រាប់ថា ក្រុមហ៊ុនបានវិនិយោគជាង ៨លានអឺរ៉ូ (ប្រមាណ ៨,៩២លានដុល្លារ) សម្រាប់កន្លែងដែលខ្លាឃ្មុំផេនដារស់នៅ ហើយថ្លៃចំណាយប្រចាំឆ្នាំមានចំនួន ១,៥លានអឺរ៉ូ សម្រាប់ការមើលថែទាំពួកវា រួមទាំងថ្លៃអភិរក្សដែលបង់ទៅឲ្យប្រទេសចិនផងដែរ។

ចាប់តាំងឆ្នាំ១៩៤៩ សាធារណរដ្ឋប្រជាមានិតចិនបានបញ្ជូនខ្លាឃ្មុំផេនដាទៅកាន់សួនសត្វបរទេស ដើម្បីពង្រឹងទំនាក់ទំនងពាណិជ្ជកម្ម ទំនាក់ទំនងបរទេស និងលើកកម្ពស់មុខមាត់អន្តរជាតិរបស់ខ្លួន។

សួនសត្វ Ahtari ធ្លាប់បង្ហាញក្ដីសង្ឃឹមថា ខ្លាឃ្មុំផេនដានឹងទាក់ទាញអ្នកទស្សនានៅក្នុងប្រទេសហ្វាំងឡង់ ប៉ុន្តែកាលពីឆ្នាំមុនបានប្រកាសថា ខ្លូនបានបង្កើនបំណុលទៅវិញ នេះក៏ដោយសារតែជំងឺរាតត្បាតបានទប់ស្កាត់ការធ្វើដំណើរ ហើយថាខ្លួនកំពុងពិភាក្សាអំពីការបញ្ជូនខ្លាឃ្មុំផេនដាត្រឡប់ទៅប្រទេសចិនវិញ។

សួនសត្វនោះបានបន្ថែមថា ការកើនឡើងអតិផរណាបានបន្ថែមទៅលើថ្លៃចំណាយ ហើយរដ្ឋាភិបាលរបស់ប្រទេសហ្វាំងឡង់ក្នុងឆ្នាំ២០២៣ បានច្រានចោលសំណើសម្រាប់ការផ្តល់មូលនិធិរបស់រដ្ឋ។ លោក Sivonen បានប្រាប់ថា ការចរចារដើម្បីប្រគល់ខ្លាឃ្មុំផេនដាទៅចិនវិញមានរយៈពេលដល់ទៅ៣ឆ្នាំទម្រាំសម្រេចបាន។

អ្នកនាំពាក្យក្រសួងការបរទេសហ្វាំងឡង់ បាននិយាយថា ការបញ្ជូនខ្លាឃ្មុំផេនដាគឺជាការសម្រេចចិត្តអាជីវកម្មដែលធ្វើឡើងដោយសួនសត្វ ដោយមិនពាក់ព័ន្ធនឹងរដ្ឋាភិបាលហ្វាំងឡង់ឡើយ ហើយមិនគួរប៉ះពាល់ដល់ទំនាក់ទំនងរវាងប្រទេសទាំង២នោះទេ។

ស្ថានទូតចិននៅហ្វាំងឡង់ បានប្រកាសនៅក្នុងសេចក្តីថ្លែងការណ៍មួយថា ទោះបីជាមានការខិតខំប្រឹងប្រែងដោយប្រទេសចិនដើម្បីជួយដល់សួនសត្វក៏ដោយ ប្រទេសទាំង២នៅទីបញ្ចប់បានសម្រេចរួមគ្នាបន្ទាប់ពីការពិគ្រោះយោបល់ជាមិត្តភាពក្នុងការប្រគល់សត្វខ្លាឃ្មុំផេនដាត្រឡប់មកវិញ៕

ដោយ៖ ឈាង