Erdogan ស្តីឲ្យ UN ខ្លាំងៗ និងប្រដូច Netanyahu ទៅ Hitler 

នៅឯមហាសន្និបាតអង្គការសហប្រជាជាតិលើកទី៧៩ ក្នុងទីក្រុងញូវយ៉ក ប្រធានាធិបតីតួកគីលោក Recep Tayyip Erdoğan ស្តីបន្ទោស​ UN ខ្លាំងៗថា គ្មានលទ្ធភាពអាចទប់ស្កាត់អំពើប្រល័យពូជសាសន៍នៅតំបន់ហ្គាហ្សាបាន ហើយថែមទាំងប្រដូចនាយករដ្ឋមន្ត្រីអ៊ីស្រាអែល Benjamin Netanyahu ទៅនឹងមេដឹកនាំផ្តាច់ការណាស៊ីលោក Adolf Hitler ទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាកាលពីថ្ងៃអង្គារទី២៤ខែកញ្ញាឆ្នាំ២០២៤ លោក Erdogan បានថ្កោលទោសសកម្មភាពរបស់រដ្ឋាភិបាលអ៊ីស្រាអែល នៅតំបន់ហ្គាហ្សា ដោយនិយាយថា ដូចដែល Hitler ត្រូវបានបញ្ឈប់ដោយមនុស្សជាតិកាលពី៧០ឆ្នាំមុនដែរ, លោក Netanyahu និងបណ្តាញឃាតកម្មរបស់គាត់ ត្រូវតែបញ្ឈប់ដូចគ្នានេះឲ្យបាន។

លើសពីនេះ ប្រធានាធិបតីតួកគី​បាន​ចោទ​លោក Netanyahu ថា ​កំពុង​ព្យាយាមទាញ​តំបន់​ទាំង​មូល​ឲ្យ​ធ្លាក់ចូល​ក្នុង​សង្រ្គាម ដើម្បី​តែ​ប្រយោជន៍​នយោបាយ​របស់ខ្លួន។

ក្រៅពីស្តីបន្ទោសនាយករដ្ឋមន្ត្រីអ៊ីស្រាអែល, លោក Erdogan ក៏បានរិះគន់ចំៗទៅ UN ឲ្យធ្វើកំណែទម្រង់ដើម្បីឲ្យអង្គការនេះកាន់តែមានឥទ្ធិពលនិងប្រសិទ្ធភាពផងដែរ។ លោក​​បញ្ជាក់​ថា ក្រុមប្រឹក្សា​សន្តិសុខ​ ផ្តោត​​លើ​ផលប្រយោជន៍​របស់​សមាជិក​អចិន្ត្រៃយ៍​ទាំង​៥របស់​ខ្លួនខ្លាំង​ពេកហើយ ហើយមិនបានជួយ​ការពារ​សន្តិភាព និង​សន្តិសុខ​អន្តរជាតិទាល់តែសោះ។

លោក Erdogan សង្កត់ធ្ងន់ថា ងាកទៅមើលប៉ាឡេស្ទីនទៅ មានពលរដ្ឋជាង ៤១ ០០០នាក់ត្រូវសម្លាប់ ចាប់តាំងពីអ៊ីស្រាអែលបើកការវាយលុកថ្ងៃទី៧ខែតុលាឆ្នាំមុន ហើយកុមារជាង ១៧ ០០០នាក់ គឺជាគោលដៅនៃគ្រាប់ផ្លោង គ្រាប់កាំភ្លើងនិងគ្រាប់បែករបស់អ៊ីស្រាអែល។

លោកចោទសួរថា «តើអ្នកនៅរង់ចាំអ្វីទៀត ម្តេចក៏មិនទប់ស្កាត់អំពើប្រល័យពូជសាសន៍នៅហ្គាហ្សា? ម្តេចមិនបញ្ឈប់អំពើឃោរឃៅនិងព្រៃផ្សៃនេះ?»។

ជាចុងក្រោយ លោក Erdogan បានបញ្ជាក់ជាថ្មី នូវការគាំទ្ររបស់គាត់ចំពោះបណ្តឹងរបស់ប្រទេសអាហ្រ្វិកខាងត្បូងនៅតុលាការយុត្តិធម៌អន្តរជាតិ (ICJ) ដែលប្តឹងឲ្យអ៊ីស្រាអែល ទទួលខុសត្រូវចំពោះឧក្រិដ្ឋកម្មប្រឆាំងមនុស្សជាតិនៅតំបន់ហ្គាហ្សា៕

អត្ថបទ៖ សុខ សុវណ្ណ

ចុចអាន៖ លីបង់ ប្រាប់​ថា មាន​តែអាមេរិក​ទេ​ទើប​អាច​ពន្លត់​ភ្លើង​សង្គ្រាម​អ៊ីស្រាអែល-ហេសបូឡា