ឈៀងម៉ៃ កំពុងធ្ងន់ធ្ងរដោយគ្រោះទឹកជំនន់

សារព័ត៌មាន Bangkok Post បានចុះផ្សាយកាលពីថ្ងៃពុធទី២៥ខែកញ្ញាឆ្នាំ២០២៤ថា ស្ថានភាពគ្រោះទឹកជំនន់នៅ ឈៀងម៉ៃ មិនទាន់ធូរស្រាលទេ ខណៈកម្ពស់ទឹកទន្លេ Ping នៅតែបន្តហក់ឡើង បង្ខំឲ្យពលរដ្ឋជាច្រើននាក់ ត្រូវជម្លៀសទៅកាន់ទីទួលសុវត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការិយាល័យទំនាក់ទំនងសាធារណខេត្ត, គិតត្រឹមរាត្រីថ្ងៃពុធ កម្ពស់ទឹកទន្លេបានឡើងដល់ ៤.៧៥ម៉ែត្រ ដោយជន់លិចស្រុក Muang និង Chiang Dao រំខានដល់ការធ្វើដំណើរនិងជីវិតរស់នៅរបស់ប្រជាជន។

ដោយសារតែកម្ពស់ទឹកហក់ឡើងបែបនេះហើយ ទើបធ្វើឲ្យគេព្យាករថា ទឹកទន្លេមួយទៀតគឺ Mae Ngat ក៏ឡើងផុតច្រាំងដែរ ហើយបង្កការជន់លិចសហគមន៍នៅតាមដងទន្លេចាប់ពីថ្ងៃព្រហស្បតិ៍ទៅ។

ស្របពេលជាមួយគ្នានោះ អាជ្ញាធរខេត្តបានដាក់ពង្រាយម៉ាស៊ីនបូមទឹក ដើម្បីជួយបូមទឹកនៅតាមទីតាំងមួយចំនួន​ ហើយក៏បញ្ជូនមន្ត្រីឲ្យប្រចាំការជួយសង្គ្រោះពលរដ្ឋផងដែរ។

លើសពីនេះ ខេត្តបានចេញការព្រមានឲ្យពលរដ្ឋនៅភាគខាងជើង ត្រូវត្រៀមខ្លួនប្រឈមមុខជាមួយជំនន់ទឹកភ្លៀង ព្រោះ ភ្លៀងតែងតែធ្លាក់ខ្លាំងនៅពេលយប់។

អ្វីដែលគេកំពុងបារម្ភគឺថា អាងស្តុកទឹក Mae Ngat Somboon Chon កំពុងស្តុកទឹកលើកម្រិតទៅហើយពោលគឺឈានដល់ ២៧៧លានម៉ែត្រគូប ហើយប្រសិនបើស្ថានភាពមិនធូរស្រាលទេនោះ អាងនេះនឹងបើករំដោះទឹក ធ្វើឲ្យប៉ះពាល់ខ្លាំងដល់តំបន់នៅខ្សែទឹកខាងក្រោម៕

អត្ថបទ៖ សុខ សុវណ្ណ

ចុចអាន៖ ខេត្តឈៀងម៉ៃនិងឈៀងរ៉ៃ របស់ថៃ ជួបគ្រោះទឹកជំនន់ធ្ងន់ធ្ងរបំផុតក្នុងរយៈពេល៣០ឆ្នាំ