ចូ បៃដិន ជួបប្រធានាធិបតីវៀតណាមនៅអាមេរិក ដើម្បីបញ្ចុះបញ្ចូលឲ្យប្រឆាំង ចិន

សម្រាប់ដំណើរលើកដំបូងទៅកាន់សហរដ្ឋអាមេរិកក្នុងនាមជាប្រធានាធិបតីវៀតណាម, លោក To Lam បានជួបជាមួយមេដឹកនាំប្រទេសមហាអំណាច ចូ បៃដិន នៅខាងក្រៅមហាសន្និបាតអង្គការសហប្រជាជាតិ នាទីក្រុងញូវយ៉ក ដោយក្នុងជំនួបនោះ ប្រមុខសេតវិមាន ផ្តោតសំខាន់លើការរឹតចំណងមិត្តភាពជាមួយរដ្ឋាភិបាលទីក្រុងហាណូយ ហើយព្យាយាមបញ្ចុះបញ្ចូលឲ្យប្រឆាំងប្រទេសចិន។

វៀតណាម ត្រូវបានអាមេរិកមើលឃើញថា ជាប្រទេសមានឥទ្ធិពលមួយនៅក្នុងតំបន់ ទាំងលើវិស័យសេដ្ឋកិច្ចនិងភូមិសាស្រ្តនយោបាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Reuters នៅថ្ងៃព្រហសត្បិ៍ទី២៦ខែកញ្ញាឆ្នាំ២០២៤, ដោយសំដៅទៅជម្លោះដែនទឹកជាមួយចិន, ក្នុងជំនួបនោះ លោក បៃដិន និយាយថា អាមេរិក-វៀតណាម ប្រកៀកស្មាគ្នាក្នុងការប្តេជ្ញាចិត្តចំពោះសេរីភាពនៃការធ្វើនាវាចរណ៍ និងនីតិរដ្ឋ។

លើសពីនេះ ថ្នាក់ដឹកនាំវៀតណាម បានសាទរចំពោះអ្វីដែលលោកហៅថា «ការរួមចំណែកជាប្រវត្តិសាស្ត្រ» របស់លោក បៃដិន ក្នុងការលើកកម្ពស់ទំនាក់ទំនងទ្វេភាគី។ ចំណែកលោក បៃដិន ក៏និយាយដែរថា ចាប់តាំងប្រទេសទាំងពីរបើកយុគសម័យថ្មីនៃទំនាក់ទំនងកាលពីឆ្នាំមុនមក ប្រទេសទាំងពីរ បានធ្វើការវិនិយោគជាប្រវត្តិសាស្ត្រផ្នែកឧបករណ៍អេឡិចត្រូនិកនិងខ្សែសង្វាក់ផ្គត់ផ្គង់ ហើយចាប់ផ្តើមកិច្ចសហប្រតិបត្តិការដែលមិនធ្លាប់មានពីមុនមកលើសន្តិសុខអ៊ីនធឺណិត។

ក្រៅពីជួបជាមួយលោកបៃដិន, នៅញូវយ៉ក ប្រធានាធិបតីវៀតណាម ក៏ជួបជាមួយតំណាងក្រុមហ៊ុនអាមេរិក រួមទាំង Meta ផងដែរ​ ដែលបានសន្យាពង្រីកការវិនិយោគនៅក្នុងប្រទេសអាស៊ីអាគ្នេយ៍មានប្រជាជនចំនួន១០០លាននាក់មួយនេះ។

មិនត្រឹមប៉ុណ្ណឹង លោក Lam ថែមទាំងស្នើឲ្យមេដឹកនាំធុរកិច្ចទាំងឡាយ ជួយគាំទ្រការខិតខំរបស់ទីក្រុងហាណូយ ស្នើឲ្យទីក្រុងវ៉ាស៊ីនតោនដកខ្លួនចេញពីបញ្ជីនៃសេដ្ឋកិច្ចមិនមែនទីផ្សារ (NME) និងលុបចោលការរឹតបន្តឹងពាណិជ្ជកម្មផ្សេងទៀត។ 

វៀតណាម បានប្រកែកជាយូរមកហើយថា ខ្លួនគួរតែត្រូវដោះលែងពី NME ហើយថា ការរក្សាឋានៈបែបនេះ គឺមិនល្អឡើយសម្រាប់ទំនាក់ទំនងទ្វេភាគី៕

អត្ថបទ៖ សុខ សុវណ្ណ

ចុចអាន៖ មេ​ដឹក​នាំ​ថ្មី​របស់​វៀតណាម ត្រៀម​ជួប​ប្រធានាធិបតី​អាមេរិក​ក្នុង​សប្ដាហ៍​នេះ