ក្រុមហ៊ុន​ Coca-Cola ដក​ផលិត​ផល​​​ពីរ​ប្រភេទ​​ពីទីផ្សារ​ ក្រោយ​ការ​​ដាក់​ចេញ​៧ខែ

ក្រុមហ៊ុនភេសជ្ជៈខ្នាតយក្ស​លំដាប់​ពិភពលោក កូកា-កូឡា បានឱ្យ​ដឹង​​កាលពីថ្ងៃពុធថា ​ផលិតផល​របស់ខ្លួន​​ពី​រប្រភេទ​​រួម​មាន​ Coca-Cola Spiced និង Coca-Cola Spiced Zero Sugar នឹងត្រូវបានលុបចោល ហើយជំនួសដោយរសជាតិថ្មីដែលនឹងត្រូវបានបង្ហាញនៅឆ្នាំក្រោយ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី​២៦ខែកញ្ញានេះ។

ក្រុមហ៊ុន កូកាកូឡា ដែលមានមូលដ្ឋាននៅទីក្រុង Atlanta បាននិយាយនៅក្នុងសេចក្តីថ្លែងការណ៍មួយថា៖«យើងតែងតែ​សម្លឹងមើលអ្វីដែលអ្នកប្រើប្រាស់របស់យើងចូលចិត្ត និងកែសម្រួលមុខផលិតផលរបស់យើង»។ គួរម្លឹកថា ​ប្រភេទ​ផលិត​ផល​ Coca-Cola Spiced បានចេញលក់នៅសហរដ្ឋអាមេរិក និងកាណាដានៅថ្ងៃទី១៩ខែកុម្ភៈ ខណៈនៅពេលនោះ​គឺជាពេលដំបូងដែលក្រុមមហ៊ុននេះបានបន្ថែមរជាតិថ្មីនៃផលិតផលរបស់ខ្លួនជាលើកដំបូងទៅកាន់ផលប័ត្រនៅអាមេរិកខាងជើងក្នុងរយៈពេលបីឆ្នាំ។

ទោះយ៉ាងណា ក្រុមហ៊ុន ​​កូកាកូឡា មិន​បាន​បញ្ជាក់​លម្អិតអំពីភាពខុស​ឆ្គងដែលលុបចោលផលិតផលនេះនោះ​ទេ ខណៈដែល Coca-Cola Spiced មិនមានកំដៅច្រើនទេ ហើយវាមានរសជាតិដូច raspberry។ ជាមួយគ្នានេះប្រធានផ្នែកទីផ្សារអាមេរិកខាងជើងរបស់ Coca-Cola លោក Shakir Moin បានប្រាប់សារព័ត៌មាន The Associated Press នៅក្នុងខែកុម្ភៈថា Coca-Cola Spiced ត្រូវបានបង្កើតឡើងក្នុងរយៈពេលត្រឹមតែប្រាំពីរសប្តាហ៍ប៉ុណ្ណោះ ដែលជាធម្មតាក្រុមហ៊ុនកូកា កូឡាចំណាយពេលមួយឆ្នាំដើម្បីផលិតភេសជ្ជៈថ្មី។

ទីផ្សាររបស់កូកាកំពុងឆ្ពោះទៅមុខកាន់តែលឿន ដែលធ្វើឲ្យកូកាកូឡា បង្កើនការលក់ពេញមួយឆ្នាំ បន្ទាប់ពីត្រីមាសទីពីរខ្លាំងជាងការរំពឹងទុក ហើយកូកាកូឡាក៏បាននឹងកំពុងរិះរកវិធីធ្វើឱ្យអ្នកផឹកវ័យក្មេងរំភើបចិត្តចំពោះកូកាកូឡាដែលមានហត្ថលេខាលើសបកដប។

កាលពីឆ្នាំ ២០២២ ក្រុមហ៊ុននេះក៏បានដាក់លក់ Coca-Cola Creations ដែលជាស៊េរីនៃរសជាតិកូកាកូឡាដែលមានរសជាតិចម្រុះនិងដបចម្រុះពណ៌។ លើសពីនេះក៏មានការបន្ថែមរសជាតិដូង ស្ត្របឺរី ឪឡឹក និងរសជាតិផ្សេងទៀតទៅក្នុងភេសជ្ជៈ ខណៈកាល​ពី​ខែ​មុនក្រុមហ៊ុននេះបាន​ចេញ​លក់​កូកាកូឡា​មាន​រសជាតិ Oreo ដែល​មាន​ការ​វេច​ខ្ចប់​ពណ៌​ខ្មៅ​ពិសេស។

គួរបញ្ជាក់ថាកូកាកូឡាដែលមានមូលដ្ឋាននៅ Atlanta ក៏ពឹងផ្អែកការលក់ខ្លាំងទៅលើភេសជ្ជៈមានជាតិអាល់កុលផងដែរ។ ភេសជ្ជៈមានជាតិអាល់កុលដំបូងគេរបស់ក្រុមហ៊ុនអាមេរិក Topo Chico Hard Seltzer បានចេញនៅឆ្នាំ ២០២១ ហើយនៅដើមខែនេះ Coke និង Bacardi Limited បានប្រកាសកិច្ចព្រមព្រៀងមួយគ្នាដើម្បីនាំយកស្រាក្រឡុក rum-and-Coke ចម្រុះទៅកាន់អឺរ៉ុប និងម៉ិកស៊ិកនៅឆ្នាំក្រោយផងដែរ៕

អត្ថបទ៖ ប៊ុន សុភាព