បាងកក នឹងរៀបចំពិធីមង្គលការគូស្នេហ៍ស្រឡាញ់ភេទដូចគ្នា ១ ០០០គូ យ៉ាងអធិកអធម 

តាមការចុះផ្សាយរបស់ Bangkok Post នៅថ្ងៃព្រហស្បតិ៍ទី២៦ខែកញ្ញាឆ្នាំ២០២៤, គូស្នេហ៍ស្រឡាញ់ភេទដូចគ្នាចំនួន១ ០០០គូ នឹងចូលរួមពិធីរៀបអាពាហ៍ពិពាហ៍ទ្រង់ទ្រាយធំក្នុងទីក្រុងបាងកក ប្រទេសថៃ នាដើមឆ្នាំក្រោយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីដ៏អធិកអធមនេះនឹងធ្វើឡើងនៅថ្ងៃទី២២ខែមករាឆ្នាំ២០២៥ ដែលជាថ្ងៃច្បាប់សមភាពអាពាហ៍ពិពាហ៍ ចូលជាធរមាន ពោលគឺ ១២០ថ្ងៃក្រោយព្រះមហាក្សត្រថៃ មហាវិជ្ជរ៉ាឡុងកន ឡាយព្រះហស្ត។

Waddao Anne Chumaporn ស្ថាបនិកកម្មវិធី Bangkok Pride និងជាអតីតសមាជិកនៃគណៈកម្មាធិការច្បាប់សមភាពអាពាហ៍ពិពាហ៍ បាននិយាយថា «ច្បាប់នេះគឺជាជំហានដ៏សំខាន់មួយ ឆ្ពោះទៅរកភាពស្មើសិទ្ធិគ្នានៅក្នុងប្រទេសថៃ។ ការរៀបចំព្រឹត្តិការណ៍អាពាហ៍ពិពាហ៍ និងការចុះឈ្មោះសម្រាប់គូស្នេហ៍ស្រឡាញ់ភេទដូចគ្នា បានសម្រេចប្រហែល ៥០% ហើយ ដោយគិតត្រឹមពេលនេះ មានគូស្នេហ៍ចំនួន១៨៣គូ បានចុះឈ្មោះចូលរួម។ យើងសូមលើកទឹកចិត្តដល់សហគមន៍ស្រឡាញ់ភេទដូចគ្នានៅតាមបណ្តាខេត្តនានា ឲ្យរៀបចំពិធីមង្គលការទ្រង់ទ្រាយធំ ដូចយើងធ្វើនៅទីក្រុងបាងកកដែរ»។

ពាក់ព័ន្ធព្រឹត្តិការណ៍នេះ, គូស្នេហ៍ដែលអាចចុះឈ្មោះចូលរួមបាន ត្រូវតែមានអាយុ១៨ឆ្នាំឡើង។ យ៉ាងណា សម្រាប់អ្នកដែលមានអាយុក្រោម២០ឆ្នាំ ត្រូវមានការយល់ព្រមពីឪពុកម្តាយជាមុនសិន។

សូមបញ្ជាក់ជាថ្មី ក្រោយព្រះមហាក្សត្រ មហាវិជ្ជរ៉ាឡុងកន ឡាយព្រះហស្ត​, ថៃបាន​ក្លាយ​ជា​ប្រទេស​ដំបូង​គេ​នៅ​អាស៊ី​អាគ្នេយ៍ និង​ជា​ប្រទេស​មួយ​ក្នុង​ចំណោម​ប្រទេសនិងដែនដី​ចំនួន៣៧ នៅ​ជុំវិញ​ពិភពលោក​ ដែល​អនុញ្ញាតច្បាប់រៀបអាពាហ៍ពិពាហ៍​ភេទ​ដូច​គ្នា។

ច្បាប់អាពាហ៍ពិពាហ៍ថ្មីនេះ នឹងប្រើពាក្យថា «អព្យាក្រឹតយេនឌ័រ» ជំនួសឲ្យពាក្យថា «បុរស ស្ត្រី ប្តី ប្រពន្ធ» ហើយថែមទាំងផ្តល់សិទ្ធិស្មុំកូននិងផ្តល់កេរមរតកដល់គូស្នេហ៍ភេទដូចគ្នាទៀតផង៕

អត្ថបទ៖ សុខ សុវណ្ណ

ចុចអាន៖ ទីបំផុត ថៃ ក្លាយជាប្រទេសអាស៊ីទី២ អនុញ្ញាតច្បាប់ រៀបការភេទដូចគ្នា