ព័ត៌មានអន្ដរជាតិ

នាវាមុជទឹកនុយក្លេអ៊ែរថ្មីបំផុតរបស់ចិន បានលិច បង្កជាភាពអាម៉ាស់មិនស្ទើរដល់ក្រុងប៉េកាំង

បានផុស

៤ ខែ មុន

នៅ

ថ្ងៃសុក្រ ២៧ កញ្ញា ២០២៤

ដោយ

Chheang

នាវាមុជទឹកដំណើរការដោយថាមពលនុយក្លេអ៊ែរថ្មីបំផុតរបស់ប្រទេសចិន បានលិចកាលពីប៉ុន្មានខែមុន ដែលជាភាពអាម៉ាស់ដ៏ធំសម្រាប់រដ្ឋាភិបាលក្រុងប៉េកាំង ខណៈដែលខ្លួនកំពុងស្វះស្វែងពង្រីកសមត្ថភាពយោធា។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៧ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចិនមានកងទ័ពជើងទឹកដ៏ធំបំផុតនៅលើពិភពលោក ដែលមាននាវាជាង ៣៧០គ្រឿង ហើយបានចាប់ផ្តើមផលិតនាវាមុជទឹកជំនាន់ថ្មីដែលដើរដោយថាមពលនុយក្លេអ៊ែរ។

មន្ត្រីការពារជាតិជាន់ខ្ពស់អាមេរិកម្នាក់នៅក្នុងលក្ខខណ្ឌមិនបញ្ចេញឈ្មោះ បាននិយាយថា នាវាមុជទឹកវាយប្រហារដោយថាមពលនុយក្លេអ៊ែរលំដាប់ថ្នាក់ដំបូងរបស់ចិន បានលិចនៅក្បែរកំពង់ផែមួយនៅចន្លោះខែឧសភា និងខែមិថុនា។ មន្ត្រីរូបនេះ បានបន្តថា មិនមានមូលហេតុច្បាស់លាស់ដែលបណ្តាលឲ្យនាវានោះលិច ឬថាតើវាមានឥន្ធនៈនុយក្លេអ៊ែរនៅលើនាវាដែរឬក៏អត់នោះឡើយ។

មន្ត្រីអាមេរិក បានរៀបរាប់ទៀតថា៖ «បន្ថែមពីលើចម្ងល់ជាក់ស្តែងអំពីស្តង់ដារបណ្តុះបណ្តាល និងគុណភាពឧបករណ៍ ឧបទ្ទវហេតុនេះបានចោទជាសំណួរកាន់តែស៊ីជម្រៅអំពីការទទួលខុសត្រូវផ្ទៃក្នុងរបស់កងទ័ពរំដោះប្រជាជនចិន និងការត្រួតពិនិត្យឧស្សាហកម្មការពារជាតិរបស់ប្រទេសចិន ដែលបានញាំញីដោយអំពើពុករលួយជាយូរណាស់មកហើយ។ វាមិនគួរឲ្យភ្ញាក់ផ្អើលទេដែលកងទ័ពជើងទឹកចិន នឹងព្យាយាមលាក់បាំងការលិចនេះ»។

អ្នកនាំពាក្យស្ថានទូតចិនប្រចាំទីក្រុងវ៉ាស៊ីនតោន បានឆ្លើយតបថា ពួកគេមិនបានដឹងអំពីរឿងនេះឡើយ ហើយក៏គ្មានព័ត៌មានអ្វីសម្រាប់ចែករំលែកនោះដែរ។

គិតត្រឹមឆ្នាំ២០២២ ចិនមាននាវាមុជទឹកបំពាក់មីស៊ីលដើរដោយថាមពលនុយក្លេអ៊ែរចំនួន៦គ្រឿង នាវាមុជទឹកវាយប្រហារដោយថាមពលនុយក្លេអ៊ែរចំនួន៦គ្រឿង និងនាវាមុជទឹកវាយប្រហារដោយថាមពលម៉ាស៊ូតចំនួន៤៨គ្រឿង នេះបើយោងតាមរបាយការណ៍របស់មន្ទីរបញ្ចកោណស្តីពីយោធារបស់ប្រទេសចិន។ ក្រសួងការពារជាតិអាមេរិក បានប្រាប់ថា កម្លាំងនាវាមុជទឹកនោះត្រូវបានគេរំពឹងថានឹងកើនឡើងដល់៦៥គ្រឿងនៅឆ្នាំ២០២៥ និង៨០គ្រឿងនៅឆ្នាំ២០៣៥៕

ដោយ៖ ឈាង

Related Topics:ប្រទេសចិន