កូរ៉េខាងត្បូងត្រៀម​​ផ្តល់​សំណង​ដល់​កសិករ​​និង​ម្ចាស់​​កសិដ្ឋាន​​ចិញ្ចឹម​​​ឆ្កែ​យកសាច់មុន​ឆ្នាំ​២០២៧

រដ្ឋាភិបាល​កូរ៉េខាងត្បូងបានប្រកាសពីផែនការផ្តល់សំណងដល់កសិករ និងអ្នកផ្សេងទៀតនៅក្នុងឧស្សាហកម្មសាច់ឆ្កែដែលកំពុងធ្លាក់ចុះរបស់ប្រទេសនេះ មុនពេលហាមឃាត់ជាផ្លូវការចូលជាធរមាននៅឆ្នាំ២០២៧ ​ដែលជាវិធានការមួយកំពុងមានការប្រឆាំង​ទាំង​ពី​កសិករ និងពី​សកម្មជនសិទ្ធិសត្វមួយចំនួន។​ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៧ខែកញ្ញានេះ។

សភារបស់ប្រទេសកូរ៉េខាងត្បូងបានអនុម័តច្បាប់សំខាន់មួយកាលពីខែមករា ដែលនឹងហាមឃាត់ការសម្លាប់ ការបង្កាត់ពូជ ឬលក់សាច់ឆ្កែសម្រាប់មនុស្សបរិភោគ បន្ទាប់ពីរយៈពេលអនុគ្រោះរយៈពេលបីឆ្នាំ នឹងត្រូវផ្តន្ទាទោសដាក់ពន្ធនាគារពី ២ ទៅ ៣ ឆ្នាំ។

ចំណែកក្រសួងកសិកម្ម​កូរ៉េ​ខាងត្បូង​ បានឲ្យដឹងដែរថា កសិករនឹងទទួលបានសំណងចាប់ពី ២២៥០០០ វ៉ុន ស្មើ​១៧០​ដុល្លារ​និងកើនឡើងរហូតដល់ ៦០០០០ វ៉ុន ស្មើនឹង៤៥០ ដុល្លារក្នុងឆ្កែមួយក្បាល ប្រសិនបើកសិករយល់ព្រមបិទអាជីវកម្មរបស់ពួកគេទាន់ពេលវេលា។

បន្ទាប់ពីការហាមប្រាមនេះចូលជាធរមាន រដ្ឋាភិបាលមានគម្រោងជួយសម្រួលដល់ការសុំចិញ្ចឹមសត្វឆ្កែដែលនៅ​សេស​សល់​ ឬផ្លាស់ទីវាទៅកន្លែងថែទាំ។ ក្រសួងកសិកម្ម បាននិយាយថា អ្នកកាប់សាច់ក៏នឹងត្រូវបានផ្តល់សំណងផងដែរ ខណៈ​​ដែល​​អាជ្ញាធរមូលដ្ឋាននឹងទទួលខុសត្រូវចំពោះការរុះរើកសិដ្ឋានចិញ្ចឹមឆ្កែ និងកន្លែងសត្តឃាត។

អតីតកសិករ​និងអ្នកកាប់សាច់ក៏នឹងទទួលបានប្រាក់កម្ចីដែលមានការប្រាក់ទាបផងដែរ ប្រសិនបើពួកគេងាកទៅរកអាជីវកម្មកសិកម្មផ្សេងទៀត។ លើសពីនេះអាជ្ញាធរក៏នឹងផ្តល់ជំនួយហិរញ្ញវត្ថុដល់ពាណិជ្ជករ និងម្ចាស់ភោជនីយដ្ឋាន ដើម្បី​បិទ​អាជីវកម្ម​របស់​ពួកគេ និងស្វែងរកការងារថ្មី។

ទោះបីជាយ៉ាងណា សមាគមកសិករមួយបានច្រានចោលការផ្តល់ជូននេះ ដោយ​មាន​សំអាង​​ថា ពួកគេមិនអាចបោះ​បង់​ចោល​សត្វឆ្កែរបស់ពួកគេក្នុងតម្លៃទាបបែបនេះបានទេ ដោយកសិករ​​បាន​ទាមទារ​ប្រាក់​ចំនួន២លាន​វ៉ុន (១៥០៥ ដុល្លារ) ក្នុង​ឆ្កែមួយក្បាល។

ពួកគេបាននិយាយថាការហាមប្រាមនេះបានរំលោភសិទ្ធិរបស់ពួកគេក្នុងការជ្រើសរើសការងាររបស់ពួកគេ ហើយនឹងធ្វើឱ្យមានការលំបាកផ្នែកសេដ្ឋកិច្ចរបស់ពួកគេកាន់តែធ្ងន់ធ្ងរឡើង។ កសិករទាំងនោះ​នឹង​បន្ត​ការ​តស៊ូ​បើ​ទោះ​ជា​ពួកគេ​ត្រូវ​ជាប់​ពន្ធនាគារ​ក៏ដោយ ដោយកាលពីដើមសប្តាហ៍នេះ ពួកគេបានអំពាវនាវឱ្យធ្វើវិសោធនកម្មច្បាប់ ដើម្បីពង្រីករយៈពេលអនុគ្រោះ និងបន្ថែមផែនការសំណងសមស្រប។

គួរបញ្ជាក់ថា ការបរិភោគ​សាច់ឆ្កែគឺជាទម្លាប់របស់ជនជាតិកូរ៉េខាងត្បូងដែលមានអាយុកាលរាប់សតវត្សមកហើយនៅលើឧបទ្វីបកូរ៉េ ខណៈសាច់សត្វឆ្កែត្រូវបានគេបរិភោគផងដែរនៅក្នុងប្រទេសចិន វៀតណាម ឥណ្ឌូណេស៊ី និងបណ្តាប្រទេស​មួយចំនួននៅតំ​បន់​អាហ្វ្រិក។

ប៉ុន្តែ​ឧស្សាហកម្ម​សាច់​ឆ្កែ​របស់​កូរ៉េ​ខាង​ត្បូង​ បាន​ទាក់ទាញ​ការ​ចាប់​អារម្មណ៍​កាន់​តែ​ខ្លាំង​ដោយ​សារ​កេរ្តិ៍​ឈ្មោះ​របស់​ប្រទេស​នេះ​ជា​មហាអំណាច​វប្បធម៌ និង​សេដ្ឋកិច្ច ហើយវាក៏ជាប្រទេសតែមួយគត់ដែលមានកសិដ្ឋានចិញ្ចឹមឆ្កែខ្នាតឧស្សាហកម្ម។

ការស្ទង់មតិបានរកឃើញថា ប្រជាជនកូរ៉េខាងត្បូងប្រហែលម្នាក់ក្នុងចំណោមបីនាក់ប្រឆាំងនឹងការហាមឃាត់នេះ ទោះបីជាមនុស្សភាគច្រើនមិនបរិភោគសាច់ឆ្កែក៏ដោយ។ យោងតាមអនុរដ្ឋមន្ត្រីក្រសួងកសិកម្ម លោក Park Beomsu បានប្រាប់អ្នកយកព័ត៌មានថា ការសិក្សារបស់រដ្ឋាភិបាលបានរកឃើញថា សត្វឆ្កែ​ជិត​៤៧​ម៉ឹន​ក្បាលកំពុងត្រូវបានចិញ្ចឹមសម្រាប់ជាអាហារនៅទូទាំងប្រទេសកូរ៉េខាងត្បូង ដោយមន្ត្រី​នឹង​ព្យាយាម​បញ្ចុះបញ្ចូល​កសិករ​ឲ្យ​ស្ម័គ្រ​ចិត្ត​បញ្ឈប់​ការ​ចិញ្ចឹម​ឆ្កែ​មុន​ការ​ហាមឃាត់។

យុទ្ធនាការបញ្ឃប់ការញាំ​សាច់​ឆ្កែ​របស់​ប្រទេស​កូរ៉េ​ខាង​ត្បូង​ទទួល​បាន​ការ​លើក​ទឹក​ចិត្ត​យ៉ាង​ខ្លាំង​ពី​ស្ត្រី​ទី​មួយ​របស់​ប្រទេស​គឺលោកស្រី Kim Keon Hee ដែល​បាន​សម្តែង​ការ​គាំទ្រ​ម្តង​ហើយ​ម្តង​ទៀត​ចំពោះ​ការ​ហាម​ប្រាម ដែលធ្វើឲ្យលោកស្រី​រង​ការ​រិះគន់​យ៉ាង​ចាស់​ដៃ និង​ការ​ប្រមាថ​ដ៏ធ្ងន់ធ្ងរ​អំឡុង​ពេល​ធ្វើ​កសិករធ្វើបាតុកម្ម​៕

អត្ថបទ៖ ប៊ុន សុភាព