ព័ត៌មានអន្ដរជាតិ

លោក Netanyahu៖ អ៊ីស្រាអែលកំពុងស្វែងរកសន្តិភាព និងប្រយុទ្ធជាមួយសត្រូវដ៏ឃោរឃៅ

បានផុស

៤ ខែ មុន

នៅ

ថ្ងៃសៅរ៍ ២៨ កញ្ញា ២០២៤

ដោយ

Chheang

អ៊ីស្រាអែលកំពុងស្វែងរកសន្តិភាព ហើយនិងកំពុងប្រយុទ្ធផ្ដាច់ប្ដូរជីវិតរបស់ខ្លួននៅក្នុងការប្រឈមមុខនឹង «សត្រូវដ៏កាចសាហាវ»។ នេះជាការថ្លែងរបស់នាយករដ្ឋមន្ត្រីអ៊ីស្រាអែល លោក Benjamin Netanyahu នៅក្នុងសុន្ទរកថាទៅកាន់អង្គការសហប្រជាជាតិកាលពីថ្ងៃទី២៧ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Netanyahu បាននិយាយនៅក្នុងសុន្ទរកថានៅឯមហាសន្និបាតអង្គការសហប្រជាជាតិថា៖ «ប្រទេសរបស់ខ្ញុំកំពុងស្ថិតក្នុងសង្រ្គាម ប្រយុទ្ធប្ដូរជីវិត។ យើងត្រូវតែការពារខ្លួនពីឃាតករដ៏សាហាវទាំងនេះ។ ខ្មាំងសត្រូវរបស់យើងមិនត្រឹមតែចង់បំផ្លាញយើងប៉ុណ្ណោះទេ គឺពួកគេព្យាយាមបំផ្លាញអរិយធម៌ទូទៅរបស់យើង ហើយនាំយើងទាំងអស់គ្នាត្រឡប់ទៅរកយុគសម័យដ៏ខ្មៅងងឹតនៃរបបផ្តាច់ការ និងភេរវកម្ម»។

បន្ថែមពីនេះ លោក Netanyahu បានប្រាប់ថា ប្រតិបត្តិការប្រឆាំងនឹងក្រុមសកម្មប្រយុទ្ធ Hezbollah នៅក្នុងប្រទេសលីបង់ នឹងបន្ត ដោយរៀបរាប់ថា៖ «ដរាបណា ក្រុមហេសបូឡាជ្រើសរើសផ្លូវនៃសង្រ្គាម អ៊ីស្រាអែលគ្មានជម្រើសទេ ហើយអ៊ីស្រាអែលមានសិទ្ធិគ្រប់យ៉ាងក្នុងការដកចេញការគំរាមកំហែងនេះ ហើយបញ្ជូនពលរដ្ឋរបស់យើងត្រឡប់ទៅផ្ទះរបស់ពួកគេវិញដោយសុវត្ថិភាព។ ប្រតិបត្តិការប្រឆាំងនឹងក្រុមសកម្មប្រយុទ្ធនឹងបន្តរហូតដល់យើង បំពេញតាមគោលដៅរបស់យើង»។

នាយករដ្ឋមន្ត្រីអ៊ីស្រាអែល ក៏បានធ្វើការស្ដីបន្ទោសផងដែរទៅលើប្រទេសអ៊ីរ៉ង់ ដែលជាអ្នកគាំទ្រក្រុមហេសបូឡា។ លោក Netanyahu បាននិយាយថា អ៊ីស្រាអែលកំពុងការពារខ្លួនប្រឆាំងនឹងទីក្រុងតេហេរ៉ង់នៅលើរណសិរ្សចំនួន៧។

លោក Netanyahu បានប្រាប់កាលពីថ្ងៃទី២៧ខែកញ្ញាថា អ៊ីស្រាអែលនឹងបន្តពិភាក្សាលើសំណើបទឈប់បាញ់សម្រាប់ប្រទេសលីបង់នៅថ្ងៃខាងមុខ ខណៈដែលក្រុងវ៉ាស៊ីនតោនបានព្រមានថា ការកើនឡើងភាពតានតឹងបន្ថែមទៀតនឹងធ្វើឲ្យមានការលំបាកសម្រាប់ជនស៊ីវិលទាំងសងខាងក្នុងការត្រឡប់ទៅផ្ទះវិញ។

យ៉ាងណា រដ្ឋមន្ត្រីការបរទេសអ៊ីស្រាអែល លោក Israel Katz កាលពីថ្ងៃទី២៦ខែកញ្ញា បានច្រានចោលការអំពាវនាវជាសកលឲ្យមានបទឈប់បាញ់ ជាមួយក្រុមហេសបូឡា។

ទន្ទឹមនោះ យោធាអ៊ីស្រាអែលបានបន្តការវាយប្រហារតាមអាកាស ដែលបានសម្លាប់មនុស្សរាប់រយនាក់រួចមកហើយនៅក្នុងប្រទេសលីបង់ និងបង្កើនការភ័យខ្លាចនៃការផ្ទុះសង្គ្រាមធំក្នុងតំបន់។

ក្រសួងសុខាភិបាលលីបង់ បានប្រកាសថា ការវាយប្រហាររបស់អ៊ីស្រាអែលបានសម្លាប់មនុស្សជាង ៦០០នាក់គិតចាប់តាំងពីថ្ងៃទី២៣ខែកញ្ញា៕

ដោយ៖ ឈាង