ព័ត៌មានអន្ដរជាតិ

ព្រឹទ្ធសមាជិកអាមេរិកថា អ៊ីស្រាអែលប្រើអាវុធអាមេរិកសម្លាប់មេដឹកនាំហេសបូឡា

បានផុស

៦ ខែ មុន

នៅ

ថ្ងៃចន្ទ ៣០ កញ្ញា ២០២៤

ដោយ

ក្រោយមានការអះអាងយ៉ាងទូលំទូលាយថា មេដឹកនាំក្រុមសកម្មប្រយុទ្ធហេសបូឡាដ៏មានឥទ្ធិពលក្នុងប្រទេសលីបង់ លោក Sayyed Hassan Nasrallah ត្រូវបានសម្លាប់ដោយយោធាអ៊ីស្រាអែលកាលពីសប្តាហ៍មុន សមាជិកព្រឹទ្ធសភាអាមេរិក លោក Mark Kelly បាននិយាយកាលពីថ្ងៃអាទិត្យថា អ៊ីស្រាអែលប្រើអាវុធនាំផ្លូវផលិតនៅអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរ៉យទ័រដោយដកស្រង់ចេញពីកិច្ចសម្ភាសន៍ជាមួយទូរទស្សន៍ NBC លោក Mark Kelly ប្រធានអនុគណៈកម្មាធិការកងកម្លាំងប្រដាប់អាវុធ Airland របស់ព្រឹទ្ធសភាតំណាងមកពីរដ្ឋ អារីហ្សូណា បាននិយាយថា អ៊ីស្រាអែលបានប្រើប្រាស់គ្រាប់បែកស៊េរី Mark 84 ទម្ងន់ ២០០០ផោន (៩០០គីឡូក្រាម) ។ សេចក្តីថ្លែងការណ៍របស់លោកជាសញ្ញាបង្ហាញដំបូងរបស់សហរដ្ឋអាមេរិកអំពីអាវុធណាដែលត្រូវបានគេប្រើ។

ព្រឹទ្ធសមាជិក លោក Kelly បាននិយាយដោយប្រើអក្សរកាត់ដែលតំណាងឱ្យ Joint Direct Attack Munitions ថា៖«យើងឃើញការប្រើប្រាស់កាន់តែច្រើននៃគ្រាប់បែកដឹកនាំ JDAMs ហើយយើងបន្តផ្តល់អាវុធទាំងនោះ»។ គាត់បាននិយាយថា៖«គ្រាប់បែកទម្ងន់ ២០០០ផោនដែលត្រូវបានប្រើប្រាស់ នោះគឺជាគ្រាប់បែកស៊េរី Mark 84 ដើម្បីសម្លាប់ Nasrallah»។

យោធាអ៊ីស្រាអែលបាននិយាយកាលពីថ្ងៃសៅរ៍ថា ខ្លួនបានសម្លាប់មេដឹកនាំក្រុមហេសបូឡាដ៏មានឥទ្ធិពល លោក Nasrallah នៅក្នុងការវាយប្រហារមួយទៅលើទីស្នាក់ការកណ្តាលរបស់ក្រុមហេសបូឡានៅជាយក្រុងភាគខាងត្បូងនៃទីក្រុងប៊ែរូត។

យោធាអ៊ីស្រាអែលបានបដិសេធមិនធ្វើអត្ថាធិប្បាយអំពីការប្រើប្រាស់អាវុធប្រភេទអ្វីនៅទេក្នុងការវាយប្រហារឈានទៅសម្លាប់មេដឹកនាំក្រុមហេសបូឡាដែលប្រឆាំងខ្លួននោះទេ។

តាមរ៉យទ័រក្រសួងការពារជាតិសហរដ្ឋអាមេរិកក៏មិនទាន់បញ្ជាក់បញ្ហានេះ និងមិនទាន់ឆ្លើយតបចំពោះការស្នើសុំអត្ថាធិប្បាយភ្លាមៗនោះទេ។ ។

ប្រភេទអាវុធ JDAMs បំប្លែងគ្រាប់បែកគ្មានការណែនាំស្តង់ដារដោយប្រើព្រុយ និងប្រព័ន្ធណែនាំ GPS ទៅជាអាវុធដឹកនាំ។ សហរដ្ឋអាមេរិក គឺជាសម្ព័ន្ធមិត្តយូរអង្វែងរបស់អ៊ីស្រាអែល និងជាអ្នកផ្គត់ផ្គង់អាវុធដ៏ធំបំផុតក្នុងកាលៈទេសៈនៃសង្គ្រាមនៅមជ្ឈិមបូព៌ាដែលក្រុមប្រទេសអារ៉ាប់ចោមរោមខឹងសម្បារ។

ការបាញ់ផ្លោងរបស់អ៊ីស្រាអែលលើទីក្រុងប៊ែរូតប្រទេសលីបង់។ AP

យោងសារព័ត៌មាន ALJAZEERA ដែលមានមូលដ្ឋាននៅទីក្រុងដូហាប្រទេសកាតា ចាប់តាំងពីអ៊ីស្រាអែលបើកការវាយប្រហារក្រុមហេសបូឡាកាលពីសប្តាហ៍មុន អ្នកស្លាប់ក្នុងហេតុការណ៍វាយប្រហារនេះមានជាង១០០០នាក់ ខណៈអ្នករបួសជាង៦០០០នាក់។ លើសពីនេះមនុស្សរាប់ម៉ឺននាក់បានរត់ភៀសសឹក៕

ដោយ រ៉ាន់ រើយ